ڕۆژی کورد: هەروەک پێشتر لە هەواڵەکانی ئەمڕۆی ڕۆژی کورددا هاتووە، ئەمڕۆ هەینی ٤ی پووشپەڕی ١٣٩٥ی هەتاوی لە دەڤەری مهاباد لە نێوان هێزەکانی پێشمەرگەی حیزبی دێموکراتی کوردستانی ئێران و سپای تیرۆریستیی پاسدارانی ڕژیم، شەڕ و پێکدادان هاتۆتە ئاراوە کە تا ئێستاش بەردەوامە.
تا ئێستا ناوی یەک برینداری ڕژیم بۆ ڕۆژی کورد ئاشکرابووە کە بریتیە لە : سڵەمان نەوزەری کە جاشێکی خەڵکی مهابادە، هەروەها دەگوترێ یەکێک لە سەرۆک جاشەکانی مهاباد بە ناوی حاجی سوارە ئەحمەدی کە دەستی بە خوێنی ڕۆڵەکانی کورد شەلاڵە بی سەر و شوێنە.
حاجی سوارە بە مەبەستی یارمەتی جاشەکان لە ناوچەی شەڕی ئەمڕۆی مهاباد بۆ ئەو شوێنە چووە بەڵام بەپێی زانیاری تەواوی ڕۆژی کورد، تا ئێستا بێ سەر و شوێنە. حاجی سوارە لە سپا خانەنشین کراوە و سەرەڕای ئەوە ی کە پلەی سەرگوردی هەیە، مووچەی سەرداری وەردەگرێ بەڵام بە هۆی کورد بوونیەوە پلەی سەرگووردی هەیە، بە پێی یاسای ڕژیمی ئێران هیچ جاشێکی کورد پلەی لە سەرگوردی زیاتر پێ نادرێت
بەپێی بەدواداچوونە بێ بڕانەوەکانی ڕۆژی کورد، ئەم شەڕە ئەمڕۆ سەر لە بەیانی لە نزیک دوو گوندی مڕانێ و سەرتان ڕووی داوە و ئێستا بەرەو بێنگوین، حەسەن چەپ و دوو چۆمان هەڵکشاوە.
کەسێکی ئاگادار لەوبارەوە بە ڕۆژی کوردی ڕاگەیاند: “لە سێ کوچکەی مهاباد، ڕەبەت و بۆکان، شەڕێکی تووند لە ئارا دایە و تۆپ باران بەردەوامە”.
زانیارییەکان باس لە کوژرانی چوار جاش و هەروەها ئاغا مەنگووڕێک بریندارە کە بە پێی پشت ڕاست نەکرانەوەی ناوەکانیان لە لایەن سەرچاوەکانی ڕۆژی کورد، جارێ خۆ لە بلاو کردنەوەی ناوەکانیان دەپارێزین.
لە لایەکی تریشەوە بە پێی هەواڵی هەواڵنێری ڕۆژی کورد، لە کوێستانی ئەشکەوتان کە کوێستانێکی نێوان مەهاباد و پیرانشارە لە کاتی ئامادە کردن و وەشانی ئەو هەواڵە تۆپ بارانێکی قورسی ڕژیم لە ئارا دایە.
