ڕۆژی کورد: ڕێوڕەسمی ڕێزگرتن لە حەسەن حوسێنی ناسراو بە حەسەن خاوەر گۆرانیبێژ و هونەرمەندی ناسراوی ناوچەی هەورامان، لە سەیرانگای قەڵاخانیی گوندی دەرەکێ سەربە شارستانی سەوڵاوا بە بەشداریی هونەردۆستان و خەڵکی ناوچەکە، بەڕێوە چوو.
بەپێی هەواڵی هەواڵنێری ناوەندی ڕۆژی کورد، ئەمڕۆ هەینی ڕێکەوتی ۹ی ڕەزبەری ۱۳۹٥، لە ڕێوڕەسمێکدا لەلایەن ئەنجومەنی ئەدەبیی بێسارانی (باهۆز)، لەژێر دروشمی “سیاچەمانە دەنگی ئەڤین و خۆشەویستیی هەورامان، دەبێ بە جیهانی بکرێ”، ڕێز لە حەسەن خاوەر سیاچەمانەبێژی ناسراوی ناوچەی هەورامان گیرا.
ئامانجی ئەو ڕێوڕەسمە هەڵگرتنی یەکەم هەنگاو بۆ ناساندنی مۆسیقای فولکلۆری هەورامان و لادانی پەردە لەسەر کۆمەڵێک بەرهەمی نەبیسراوی مامۆستا حەسەن خاوەر بوو.
لە چەند بڕگەیەکی ئەو ڕێوڕەسمەدا هونەرمەندانی هەورامان و چەند بەشداربوویەک بە یادی هونەرمەند حەسەن خاوەر بەرهەمی خۆیانیان پێشکەش کرد.
فەرشاد نیک ڕەفتار گۆرانیبێژی ناسراوی شاری پاوە و حەسەن عومرانی شاعیری بەناوبانگی هەورامانی تەخت لەو هونەرمەندانە بوون کە بەرهەمەکانیان پێشکەش کردن.
لە بەشێکی دیکەی ئەو ڕێوڕەسمەدا لەلایەن “محەممەد خاوەر” برای حەسەن خاوەر و جەمیل نەوسوودی سیاچەمانەبێژی ناسراو، پەردە لەسەر بەرهەمەکانی هونەرمەند حەسەن خاوەر لا درا.
هونەرمەند حەسەن خاوەر ساڵی ۱۳۲۸ لە گوندی دەرەکێ لە ڕۆژهەڵاتی کوردستان لە دایک بوو و ساڵی۱۳۸۹ی هەتاوی لە تەمەنی ٦۱ ساڵیدا بەهۆی نەخۆشی کۆچی دوایی کرد.
