ڕەوتی دەست بەسەر کران لە شاری شنۆ بەردەوامە/٢ کەسیتریش گیراون

0
595

ڕۆژی کورد: وەزارەتی ئیتلاعاتی ڕژیم لە شاری شنۆ لە دوو مانگی ڕابردوودا بە بەردەوامی هاووڵاتیانی کوردی دەستبەسەر کردووە و دەستبەسەر کردنەکان بەردەوامن.

لە ماوەی یەک حەوتوی ڕابردوودا ٤ کەس لە هاونیشتمانیانی شاری شنۆ لە لایەن هێزەکانی ئیتلاعاتی ڕژیمەوە دەستبەسەر کراون کە لە هەواڵەکانی ئەمڕۆ دووشەممە ٢٨ی پووشپەڕی ناوەندی ڕۆژی کورددا، هەواڵی دەستبەسەرکرانی کەسێکیان بە ناوی شەهاب حوسێنی خەڵک گوندی بێژاوێ ـی سەر بە شاری شنۆ بڵاو کراوە کە ڕۆژی هەینی شەممە ٢٦ی پووشپەڕی ١٣٩٥ی هەتاوی لە ماڵی خۆی و لە لایەن چەند کەسی جل شەخسیی ئیدارەی ئیتلاعاتی شاری شۆنوە دەستبەسەر کراوە و بۆ شوێنێکی نادیار ڕاگوزراوە.

هەروەها هەواڵنێری ڕۆژی کورد لە شاری شنۆ ڕایگەیاند، دوو هاووڵاتی تر بە ناوەکانی وەستا زەکەریا (ناسراو بە وەستا زەکەریای سافکار) خەڵکی مهابادو دانیشتووی شاری شنۆ و عەلی سڵامەت، هونەرمەندی گۆرانی بێژ، لە ماوەی سێ ڕۆژی ڕابردوودا لە لایەن مەئموورانی ئیدارەی ئیتلاعاتی ڕژیمەوە دەستبەسەر کراون.

دەگوترێ هۆکاری دەستبەسەر کرانی ئەو هاونیشتمانیانە، پەیوەندی بە یەکێک لە حیزبە کوردییەکانی دژبەری ڕیژیمە.

تا ئێستا هیچ هەواڵێک لەمەڕ شوێنی ڕاگیران و دۆخی جەستەیی و دەروونیی ئەو هاونیشتمانییانە لەبەر دەستدا نیە.

تا ئێستا دەست بەسەر کرانی هاووڵاتییەکی تر کە هەواڵەکەی بۆ ناوەندی ڕۆژی کورد بەڕێکراوە لەلایەن هەواڵنێری ڕۆژی کورد لە شاری شنۆوە پشتڕاست نەکراوەتەوە.

سه‌رنج و كۆمێنت

كۆمێنت