ڕۆژی کورد: بەپێی زانیارییەکانی ناوەندی ڕۆژی کورد، ڕەحمان محەممەدیان، مێژوونووسی بۆکانی کۆچی دوایی کردووە.
ئەمڕۆ دووشەممە 5ی ڕەزبەری 1395ی هەتاوی، ڕەحمان محەممەدیان، مامۆستای قوتابخانە و مێژوونووسی کوردی خاڵکی باژێڕی بۆکان، بە هۆی ڕاوەستانی دڵ، کۆچی دوایی کردووە.
ڕەحمان محەممەدیان نووسەری کتێبی مێژوویی ” “بوکان له سەدەی بیستمدا“ ـە کە لە دوو بەرگدا نووسراوە.
بەرگی یەکەمی ئەم کتێبە لە ساڵی 1389ی هەتاوی بڵاوکرایەوە و لە لایەن جەماوەری کتێب خوێنەوە پشوازییەکی زۆری لێکرا و لە هەمان کاتی بڵاوکردنەوەیدا، تەواو بەرگەکانی فڕۆشرا و لە بازاڕدا نەما.
ئەم دوو بەرگە لە مێژووی “بوکان له سەدەی بیستمدا”، بەرهەمی 10 ساڵ هەوڵ و ماندووبوونی نووسەرە لە پێناو کۆکردنەوەی بەڵگە کۆنەکان لە بنەماڵە جۆراوجۆرهکانی بۆکان کە تەنیا لە بەرگی یەکەم 400 بەڵگە لە خوالێخۆشبوو بابا شێخ ئاراستە کراوە.
بەرگی دووهەمی “بوکان له سەدەی بیستمدا” لە 9 بەشدا تۆمار کراوە کە بابەتەکانی مێژووی بۆکان، شۆڕشی جووتیارانی ناوچەی فەیزوڵڵا بەگی، پەروەردە لە بۆکان، نامەگۆڕینەوەی شاعێران و کەسایەتییە ناسراوەکانی موکوریان لە خۆ دەگرێت.
شیاوی ئاماژەیە کە ئەم کتێبە لە دووتۆی 470 لاپەڕە و لە تیراژی 1100 بەرگ و لە لایەن بڵاوکەرەوەی “کۆلە پشتی”یەوە، ئاراستە کراوە.
