بە بۆنەی ١٠٠ ساڵەی سایکس- پیکۆ پارتی ئازادیی کوردستان به‌یاننامه‌یه‌كی بڵاو كرده‌وه كه ده‌قی به‌یاننامه‌كه به‌م چه‌شنه‌یه :
بەیاننامەی پارتی ئازادیی کوردستانPAK
بە بۆنەی ١٠٠ ساڵەی سایکس- پیکۆ
رۆڵەکانی نەتەوەی گەورەی کورد لە رۆژهەڵاتی ناوەڕاست!
کوردستانییە وڵاتپارێزەکان!
ئەمڕۆ ١٦ی مایسی ٢٠١٦ زایینی،١٠٠ ساڵ بە سەر رێکەوتننامەی سایکس- پیکۆ دا تێپەڕی. ئەو رێککەوتنامەیەی کە بووە بناغەی رێکخستنی سیاسیی رۆژهەڵاتی ناوەڕاست و کێشانی سنوورە سیاسییەکانی پاش شەڕی یەکەمی جیهانی.
پەیماننامەی سایکس- پیکۆ، ئەگەر، توانی بۆ ماوەیەک بەرژەوەندی دەوڵەتانی ئەندازیاری رێکەوتنەکە دابین بکا، بەڵام، بۆ دانیشتوانی ناوچەکە، ١٠٠ ساڵ جەنگ و ناسەقامگیری و خوێن و کارەساتی یەک لە دوای یەک و بێبڕانەوەی لێکەوتەوە . سایکس- پیکۆ و تەرتیباتە سیاسییەکەی، داخراوی، میلیتاریسم، توند وتیژی و فەندەمەنتالیزمی لە رۆژهەڵاتی ناوەڕاست بەرهەم هێنا. لەو نێوەدا، نەتەوەی کورد، زەرەرمەندی سەرکیی ئەو پەیماننامەیە و ئاکامە سیاسییەکانیەتی.
لە دابەشکرانی یەکەمی کوردستاندا( ١٥١٤ز) نەتەوەی کورد زەبرێکی ستراتیژیی وێکەوت و یەکێتی خاک و نەتەوەی کورد تووشی ترازان هات و لە سۆنگەی ئەو دابەشبوونەوە، خەسارەتی گەورە و گرانی سیاسی ، مرۆڤی، کۆمەڵایەتی و ئابووری لە کورد کەوت. قۆناغی دووهەمی دابەشکرانی کوردستان بە پێی رێکەوتنی سایکس- پیکۆ و کۆنفرانسی لۆزان، چەند قات نەتەوەی کوردیان لە نەهامەتی و خوێن و کارەساتەوە گەوزاند. پارێزەرانی سنوورە دەسکردەکانی سایکو- پیکۆ و داگیرکەرانێکی دیکتاتۆر، تووتالیتێر، گەندەڵ و دژ بە گشت بەها ئینسانی و دێموکڕاتییەکانن.
بە هەموو ئەو نەهامەتی و کارەساتانەی کە دابەشکران و داگیرکرانی کوردستان، بۆ کوردی خوڵقاند؛ نەتەوەی گەورەو کۆڵنەدەری کورد، شانی وەبەر ئاکامە تفت و تاڵەکانی دا و لە بن نەهات. هەروەها چەندین شۆڕش و راپەڕینی گەورەی بۆ دەرچوون لە بن باری ئەو سنوور و تەرتیباتە سیاسییە بەرپا کرد. بەڵام، هەموو جارێ بێجگە لە کەمووکووڕییە ناوخۆییەکان، سیاسەتی جیهانی هۆکاریی سەرەکیی بارگرانی و شکستی ئەو حەولانە بووە.
ئەمڕۆ پاش ١٠٠ ساڵ لەو رێکەوتننامەیە، جیهان ئاڵوگۆڕی گەورە و قووڵی بە خۆوە دیتوە و رۆژهەڵاتی ناوەڕاستیش، گۆڕانکاری ژئۆپۆلیتیکی بە سەردا هاتووە. نەتەوەی کورد هەرچەندە سەربەخۆیی و یەکێتی سیاسیی خۆی بە دەست نەهێناوە بەڵام، ئاکتۆرێکی سەرەکیی رووداو وگۆڕانکارییەکانە و سنوورەکانی سایکس- پیکۆ بە خوێن وعارەقەی پێشمەرگە و شەڕڤانی کورد، لە باشوور و رۆژاوای کوردستان، هەڵتەکاون و ئیتر بە رابردوو سپێردراون. رۆژهەڵاتی کوردستان شانازیی ئەوەی هەیە کە بە کردەوە وبە پێشکەشکردنی خوێن و رەنجی رۆڵەکانی لە بەرەکانی جەنگی دژی داعش، لە گەڕاندنەوەی خاکی تەعریب کراوی کورد و هەڵتەکاندنی سنوورە دەسکردەکان، بەشدارە. هاوکات خەباتێکی شێلگیرانە لە باکووری کوردستان، لە گەڕدایە کە بناماکانی کەمالیزمی هەڵتەکاندوە و سەرەنجام لە خوێنی رۆڵەکانی کورد لە سەر خاکی نیشتمانی کۆڵەوار، گوڵی ئازادیی و سەربەستیی دەڕوێ.
ئەوەندەی بۆ رۆژهەڵاتی کوردستان دەگەڕێتەوە، پارتی ئازادیی کوردستان، شانازیی ئەوەی هەیە کە چارەگە سەدەیەکە رچەشکێنی خەباتێکی فیکری و سیاسیی و سەربازییە کە ئامانجەکەی سەربەخۆیی کوردستان وکۆتایی هێنان بە تەوقی سەروەریی سیاسیی ئێران و هەڵتەکاندن و دەرچوون لەو سنوورە دەسکردانەیە کە لە ١٥١٤ەوە، بە سەر کورد دا سەپاون . پارتی ئازادیی کوردستان تێدەکۆشی تا نەتەوەی کورد و بزووتنەوە رزگاریخوازییەکەی لە رۆژهەڵاتی کوردستان، لە پێناو نەهێشتنی یەکجاری کۆیلەیی نەتەوەیی و وەدەسهێنانی سەرەوەریی سیاسیی ، ناسنامەی خۆی لە ناسنامەی ساختەی ” ئێرانی” داببرێ و ستراتیژی وەهەمیی ” دێموکراتیزەکردنی ئێران” لە خەباتی رزگاریخوازیی خۆی تووڕ بدا و سەربەخۆیی و دامەزراندنی دەوڵەت، بکاتە دیسکۆرسی روونی خۆی. چوونکە ژیانی ئاسوودەی سەقامگیر و دوور لە شەڕ و هەڕەشە بۆ کورد، لە چوارچێوەی ئەو دەوڵەتانەدا کە بەسەریاندا بەشکراوە، تەنیا خەیاڵێکە کە وزە و دەرفەتەکانی نەتەوەی کورد بە فیڕۆ دەدا.
کورد یەک نەتەوەی واحیدە لە رۆژهەڵاتی ناوەڕاست و بێ دەوڵەتی و دابەشکرانی هیچ لەو راستییە ناگۆڕێ. هەروەها ٥٠٠ ساڵەی چاڵدێران و ١٠٠ ساڵەی سایکس- پیکۆ، بە هیچ شێوەیەک رەوایی بەو دابەشکرانە ناڕەوایە نادا. ئەوەی راست و رەوایە، ئیرادە و ویستی رماندنی دیوارە بەرلینییەکان و یەکگرتنەوەی خاک و نەتەوەی مەزنی کوردە.
شەکاوە بێ ئاڵای ئازادیی و سەربەخۆیی و یەکگرتنەوەی کورد و کوردستان
پارتی ئازادیی کوردستانPAK
مەجلیسی گشتیی
٢٧ گوڵانی ٢٧١٦
١٦مایسی ٢٠١٦
