لە ماوەی حەوتووی ڕابردوودا 8 هاونیشتمانیی بۆکانی لە لایەن ئیتلاعاتی سپای پاسداڕان لەو باژێڕە، دەستبەسەر کراون،
مرۆڤایەتی: بەپێی هەواڵی هەواڵنێری مرۆڤایەتی لە باژێڕی بۆکان، ڕۆژەکانی دووشەممە، سێ شەممە و چوارشەممەی حەوتووی ڕابردوو واتا 23 و 24 و25ی خەرمانانی 1395ی هەتاوی، ٨ هاووڵاتیی باژێڕی بۆکان لە لایەن مەئموورە جل شەخسییەکانی ئیتلاعاتی سپای تیرۆریستیی پاسدارانەوە دەستبەسەر و بۆ شوێنکی نادیار ڕاگواستراون و تا ئێستاش چارەنووسیان نادیارە.
سەرچاوەیەکی ئاگادار لەمبارەوە بە هەواڵنێری مرۆڤایەتی ڕاگەیاندووە: “سپای پاسداڕان لە ماوەی ئەم سێ ڕۆژەدا دەستی کردووە بە دەستبەسەر کردنی بە کۆمەڵی ئەو کەسانە و هەر کامەیان لە ماڵی خۆیاندا و بێ هەبوونی مۆڵەتی دادوەری دەستبەسەر کراون و تا کاتی بڵاوبوونەوەی ئەو هەواڵە هیچ زانیارییەک لەمەڕ شوێنی ڕاگیران و هۆکاری دەستبەسەرکرانی ئەو ٨ کەسە لەبەردەستدا نیە.
شوناسی ئەو ٨ کەسە بەپێی زانیارییەکانی هەواڵنێری “مرۆڤایەتی” بەو شێوەی خوارەوەیە”
- سەید حەسەن حوسێنی، کوڕی عوسمان و تەمەن 27 ساڵان
- ڕێبوار ڕووستەم پوور، کوڕی عەلی، تەمەن ٢٩ ساڵان
- دانا خاکی، کوڕی عەبدوولکەریم، تەمەن ٢٤ ساڵان
- ڕەزا سلێمان کوردە، کوڕی جەعفەر، تەمەن ٣٠ ساڵان
- شێرکۆ عەلیخانی، کوڕی محەممەدڕەحیم، تەمەن ٢٧ ساڵان
- سەبری سۆهرابی، کچی مەنسوور، تەمەن ٣٢ ساڵان
- حامید ڕەشادەت، کوڕی عومەر، تەمەن ٢٩ ساڵان
- ئەنوەر عوسمان زادە، کوڕی محەممەد، تەمەن ٣٠ ساڵان