دوابەدوای کردنەوەی لقی دێرسیم و مێردینی پارتی سوسیالیستی کوردستان، ئەو پارتە وەکوو ڕێزلێنانێک لە خەباتی ڕێبەر و زانای گەلی کورد د.عەبدولرەحمانی قاسملوو، لقی ئامەدی خوی بە ناوی د. قاسملووەوە کردەوە.
بەپێی هەواڵی ماڵپەڕی کوردستان میدیا، ڕێوڕەسمی کردنەوەی لقی ئامەدی پارتی سوسیالیست، دوانیوەڕۆی ڕۆژی یەکشەممە، ٢٥ی ڕەزبەری ١٣٩٥ی هەتاوی، لە بینای سەرەکیی ئەو پارتە لە ئامەد بە بەشداریی سەرۆکی گشتیی ئەو پارتە، نوێنەرانی بەشێک لە پارتە سیاسییەکان و ڕێکخراوە مەدەنییەکان و ژمارەیەکی بەرچاو لە ڕۆشنبیران، ئاکادێمیسییەن و سیاسەتڤانان بەڕێوەچوو.
لە ڕێوڕەسمەکەدا ڤەدات دەدە، سەرۆکی لقی ئامەدی ئەو پارتە، کردنەوەی لقەکەیانی پێشکەش بە ڕێبەر و زانای گەلی کورد دوکتور عەبدولڕەحمان قاسملوو کرد.
هەروەها مەسعوود تەک، سەرۆکی گشتیی ئەو پارتە، کە لە ڕێوڕەسمەکەدا بەشدار بوو، لە ئاخافتنێکدا وێڕای لێکدانەوەی دۆخی تورکیە، باکوور، باشوور و ڕۆژئاوای کوردستان، بە بەربڵاوی تیشکی خستە سەر ڕەوشی کوردستانی ڕۆژهەڵات و بزاوت و ڕاسانی کوردستانی ڕۆژهەڵاتی بە ڕێبەرایەتیی حیزبی دێموکراتی کوردستانی ئێرانی بەرز نرخاند و پشتیوانیی خۆیانی لە خوشک و براکانیان و تەڤگەری ئازادیخوازی کوردستانی ڕۆژهەڵات دووپات کردەوە.
مەسعوود تەک هەروەها لە درێژەی باسەکەیدا، بانگهێشتی لە پارت و لایەنە سیاسییەکانی هەر یەک لە پارچەکانی کوردستانی کرد کە لەو قۆناغە هەستیارەدا، پێکەوە و بە ڕۆحێکی برایانە و ئاشتییانەوە، هەوڵ بۆ پاراستنی یەکڕیزی و یەکیتی نێوماڵی کورد بدەن و بە وەلانانی ناکۆکیەکانیان، وەکوو پێویستییەکی هەنووکەیی هەوڵ بۆ پێکهێنانی کۆنگرەی نەتەوەیی بدەن.
