ڕۆژی کورد: بەڵگە فیلمی کوردیی “لەگەڵ خودا سەما دەکەم” لە دەرهێنانی هوشەنگ میرزایی، لە بەشی کێبەرکێی بیستەمین فستیڤاڵی ناونەتەوەیی “بلوهۆریزۆنتە”ـی بڕازیل بەشدارە.
فستیڤاڵی ناونەتەوەیی “بلوهۆریزۆنتە”، دووهەمین فستڤاڵی بەناوبانگی جیهانە کە لە ساڵی 1999ـوە چالاکی دەکا.
فستیڤاڵی ناونەتەوەیی “بلوهۆریزۆنتە” کە بە پشتگیریی کۆمەڵەی بەڵگەی بڕازیل و زانکۆی فێدراڵ میناس ـی بڕازیل بەڕێوە دەچێ لە سێ بەشفی کورتە فیلم، فیلمی مامناوەند و درێژدا بەڕێوە دەچێ و تەنیا ١٤ فیلم شانسی بەشداری لە کێبەرکێی بژاردەی ئەو فستڤاڵەیان دەبێ کە ئەمساڵ بەڵگە فیلمی کوردیی “لەگەڵ خودا سەما دەکەم”، یەکێک لەم ١٤ فیلمەیە.
بەڵگە فیلمی “لەگەڵ خودا سەما دەکەم”، باسی ژیانی پیرەپیاوێکی پاوەیی ـیە کە سەرەڕای نابینا بوون، کاری دروومان دەکا و لەو ڕێگایەوە ژیانی دابین دەکا و توانیویەتی باخێک بکڕێ و لە ناو باخەکەیدا بۆ دڵخۆشیی خێزانەکەی، سەما دەکا و بەو گوڕ و تینەوە بەسەر کۆسپی نابینابووندا، زاڵ بووە.
بەڵگە فیلمی” لەگەڵ خودا سەما دەکەم “خەڵاتی باشترین بەڵگە فیلمی لە روانگەی بینەرانی دەیەمین فستیڤاڵی میرادس داکی سپانیا، خەڵاتی باشترین بەڵگە فیلمی نۆیەمین فستیڤاڵی نێونەتەوەیی یاهورینای بۆسنی و خەڵاتی باشترین بەڵگە فیلمی سێزدەهەمین فستیڤاڵی نێونەتەوەیی فیلمی کورت و بەڵگەمەندی سەربستان و خەڵاتی باشترین بەڵگە فیلمی کورتی زیاتر لە ٣٠ خولەکی فستیڤاڵی کلگری کاناداشی بۆ خۆی تەرخان کردووە .
