سبەی کۆنگرەی شازدەی حیزبی دیموکراتی کوردستان دەست بە کارەکانی دەکا

بڕیار وایە سبەی شەممە 6ی ڤێورییەی 2016 لە بارەگای سەرەکیی حیزبی دیموکراتی کوردستان (حدک) لە نزیک شاری کۆیە لە باشووری کوردستان، شازدەهەمین کۆنگرەی ئەو حیزبە بە بەشداری ئەندامانی نێوخۆ و دەرەوەی کوردستان بەرێوە بچێ و ماوەی چەندرۆژێک بخایەنێ.
بە گوێرەی زانیارییەکانی رۆژی کورد، خالید عەزیزی سکرتێری گشتیی ئێستای حدک بڕیاری داوە چیتر خۆی بۆ ئەو پۆستە بەربژێر نەکاته‌وه‌، بە پێی پەیرەوی نێوخۆی ئەو حیزبە تەنیا بۆ دوو خول و بۆ ماوەی هەشت ساڵ کەسێک دەتوانێ لە پۆستی سکرتێری گشتی دا بمێنێته‌وه‌.
هەروەها پرسی یەکگرتنەوە لەگەڵ لایەنی حدکا ، مژارێکی سەرەکی دەبێ کە  ئەندامانی کۆنگرەی شازدەی حدک قسە و باسی لەبارەوە دەکەن وبه‌و پێیه‌ش چاوەڕوان دەکرێ کۆنگرە بڕیاری یەکلاکەرەوە بدا بۆ ئەوەی لە رێی گفتگۆ و دانیشتنەکان لەگەڵ بەرپرسانی حدکا، مەسەلەی یەکگرتنەوەی به‌ ئاکام بگا.
حیزبی دیموکراتی کوردستان لە کاتێکدا شانزدەهەمین کۆنگرەی خۆی بەرێوە دەبا کە کێشەکانی نێوان هەر دوو لای دیموکرات بە هەڵواسراوی ماونەتەوە و هیچ لا ئامادە نین لە پێناو یەکگرتنەوەدا واز لە بەرژەوەندییەکانیان بێنن.
لە دوای کۆنگرەی سێزدەی حیزبی دیموکراتی کوردستانی ئێران (حدکا) بەشێک کە ئەندامانی رێبەری و کادر و پیشمەرگەکانی ئەو حیزبە بە مەبەستی نارەزایی دەربڕین بەرانبەر بە ئاکامەکانی کۆنگرەی سێزدە بڕیاری جیابوونەوەیان دا و دواتر بە ناوی حیزبی دیموکراتی کوردستان (حدک) درێژەیان بە خەباتی سیاسی داوە و لە دوای جیابوونەوە لە لایەنی حدکا کۆنگرەکانی چواردە و پازدەیان بەرێوە بردووە و خالید عەزیزی وەک سکرتێری گشتیی حدک لە ماوەی هەشت ساڵی ڕابردوودا رێبەرایەتی ئەو حیزبەی لە ئەستۆ گرتووە، بەڵام بەپێی پەیرەوەی نێوخۆی کۆنگرە ناتوانێ بۆجاری سێهەم خۆی کاندید بکاتەوە و خۆشی ڕایگەیاندووە: چیتر خۆی بۆ پۆستی سکرتێری گشتیی حدک بەربژێر ناکاتەوە.
رۆژی کورد لە هەواڵەکانی داهاتوودا زانیاریی زیاتر و وردتر لەمەڕ کۆنگرەی شازدەی حدک بڵاو دەکاتەوە.

سه‌رنج و كۆمێنت

كۆمێنت