بەپێی هەواڵی ماڵپەری ژینگەوان،ئەنجومه نی سه وزی چیای مەریوان بە بۆنەی ۷ی پووشپەڕ، ساڵڕۆژی كیمیاباران كردنی شاری سەردەشت راگەیاندنێكی بڵاو كردەوە
ئەمە دەقی راگەیاندنەكەی ئەنجومەنی سەوزی چیایە:
ڕاگه یاندنی فه رمی ئه نجومه نی سه وزی چیا بە بۆنەی ۷ی پووشپەڕ، ساڵڕۆژی كیمیاباران كردنی شاری سەردەشت
مرۆڤ وەكوو تاكە بوونەوەری خاوەن هزر گەورەترین ڕۆڵی بوە لە گۆڕانكارییە هەموو لایەنەكانی گۆی زەوی. پەنای بردە زانست و هەوڵی دا لە بەشە جیاوازەكانی ژیانیدا بە كاری بێنێت، تاكوو وردە وردە هەموو دونیای خستە ژێر كاریگەری ئەو ئامێرەوە. گەرچی زانست، پزیشكی، بێداشت و كەرەسەی هات و چۆو وەرزێری و … زۆر شتی لەو چەشنە كە لە درێژەی ژیانێكی ئاسوودەتردا، پێشكەشی ئێمە ی مرۆڤ كرد، بەڵام لە بیرمان نەچێتەوە كە فڕۆكەی شەڕكەر، چەكی شیمیایی و … ئامێرەكانی تری كوشتن و قهڵا‌‌چۆكردنی مرۆڤ و جۆرەكانی تری ئاژەڵ، بەرهەمی زانست و پێگەیشتنی مرۆڤی پاوان خواز بووە. مرۆڤی تێكدەر، گەورەترین لاساری بە سیستمی پێكهاتەی خۆڕسكی زەوی كردوە، هەوڵی داوە لە ڕێگەی وەگەڕ خستنی توانا تایبەتییەكانی، وزەی گۆی زەوی بخاتە خزمەتی قازانجە تاكە كەسی و كەم خایەنەكانی خۆیهوه تا ئاستێك كە خۆشی بووەتە قوربانی ئەو داوە.
لەم نێوانەدا دەوڵەتە زلهێزەكان زیاترین بەشییان بووە لە كاولكاری و خاپوور كردنی لانكی هەموو بوونەوەراندا، ئەوان زانست و تێگەیشتنی سەردەمیانەی مرۆڤیان خستوەتە خزمەتی تەماح و سەرەڕۆیی خۆیان و ئامانجەكانیان. دروس كردنی چەكی شیمیایی وەكوو خاڵی شەرمەزاری مرۆڤایەتی، بەرهەمی زانست و شەڕخوازی مرۆڤە، هیچ پاساوێك بۆ درووس كردنی چەكی كۆمەڵ كوژ نییە، بەرهەم هێنەرانی ئەم چەكە ئەبێ تا هەتا هەتایە شەرمەزاری مێژوو بن.
كوردستان یەك لە قوربانییە بێدەنگەكانی چەكی كۆمەڵكوژ و لەوانە چەكی كیمیاییە، تا ئاستێ كە لە كۆمەڵگای جیهانیدا ژینۆساید بوەتە ناسنامەی ئێمە، بە داخەوە كەمترین كار لەسەر ناساندن و پێڕاگەیشتنی بریندارانی شیمیایی گەلانی بێ خاوەن و بێ دەوڵەتی وەكوو كورد كراوە. لێكۆڵینەوەیەكی زانستی و بەربڵاو لەسەر كاریگەرییەكانی چەكی كیمیای لەسەر ژینگەو بوونەوەرانی كوردستان نییە، تەنانەت ئامارێكی ڕێك و پێك لە سەرچاوەیەكی باوەڕ پێكراو بۆئەژماری قوربانیان، تۆمار نەكراوە، یان ئەگەر كرابێ لە بەر دەستی میدیای ئازاد دا نییە. لە ڕاستیدا قوربانیانی چەكی كۆمەڵكوژ لە كوردستان، زامێكی قووڵتریان هەیەو ئازارێكی ئێجگار زیاتریان كێشاوە، چونكە لە سێبەری بێدەنگیداو لە قڕ و قاپی دنیا و میدیاكاندا مردنیان ئەزموون كرد.
لە ڕوانگەی ئێمەوە هەموو ئەمانە لە نەبوونی هزرێكی ژینگەپارێزییەوە سەرچاوە ئەگرێ، مرۆڤی ژینگەپارێز بەردەوام خۆی لە شەڕ و ئاژاوە لائەدا و هەوڵی ئاشتی و ئاوەدانی ئەدات. كۆمەڵگای ژینگەپارێز، ناتوانێ بێدەنگ بێت لە ئاست كاولكاری دەوڵەتەكانیان. سیاسەتمەداران و خاوەن دەسەڵاته كان، گەر ژینگەپارێز بوونایهت دنیایان نهدهكرده مەیدانی شەڕ و ڕم بازێنی خۆیان. ژینگەپارێزان بە پێچەوانەی دەوڵەتانی سەردەم، خۆشەویستی ئەنێرن بۆ وڵاتان و پێكەوە ژیان ئەبەخشنە دونیا. لە ئێستادا كە شەڕ و شۆر هەموو دونیای تەنیوە، ژینگە پارێزی باشترین ئاڵترناتیڤە بۆ چارەسەری ئەم گرفتانەو شیاوترین گوتارە بۆ بەرامبەركێی ترس و تۆقاندن.
۷ی پووشپەڕ زامێكی قووڵی نەبڕاوەیە لە سەر ڕۆحمان و لە هەمان كاتدا بەڵگەیەكی تاوانی دەوڵەتانی پاوانخواز و كاولكەرە. لەم ڕۆژە مێژووییەدا ئێمەیش هاودەرد و هاوخەمتانین و هیوادارین بیرۆكەو كردەوەی هەموو دونیا بەرەو ئاقاری ژینگەپارێزی و پێكەوە ژیان بچێت، چونكە باوەڕمان وایە فریاد ڕەسی مرۆڤایەتی ژینگەپارێزییە.
ئەنجومەنی سەوزی چیا
پووشپەڕی ۲۷۱۶
