شەریف فەلاح: کورد نای بە “کۆماری ئیسلامی” گوتووە

0
704

تایبەت بە رۆژی کورد

بڕیار وایە لە حەوتی ڕەشەممەی ئەمساڵدا هەڵبژاردنەکانی مەجلیسی شووڕای ئیسلامی و مەجلیسی خوبرەگان لە ئێران بەڕێوە بچێ، بەرپرسانی کۆماری ئیسلامی لە ڕاگەیەندنەکاندا هەموو هەوڵێک دەدەن خەڵک بۆ سەر سندووقەکانی دەنگدان ڕابکێشن و سیمایەکی دیموکراتیک بە هەڵبژاردنەکانی ئەمساڵ ببەخشن، بەشی زۆری حیزب و لایەنە سیاسییەکانی خۆرهەڵاتی کوردستان بایکۆتی هەڵبژاردنەکانیان کردووە و داوایان لە خەڵک کردووە بەشداری لە هەڵبژاردنەکاندا نەکەن. رۆژی کورد بە پێویستی زانینی لە تەوەرێک دا پرسی بەشداریکردن و بەشداری نەکردن لە هەڵبژاردنەکاندا لەگەڵ نووسەر و رووناکبیران و هونەرمەندانی خۆرهەڵات بخاتە بەر باس.

لە بەشی یەکەمی ئەو تەوەرە دا شەریف فەلاح، رۆژنامەنووس و چالاکی فەهەنگی بەم شێوەیە ڕای خۆی دەردەبرێ: “بەرای من دەبێ خەڵکی کوردستانی رۆژهەڵات لە شانۆی بەناو هەڵبژاردندا بەشداری نەکەن لەبەر ئەم هۆیانە؛

جەوهەر و پێکهاتەی سیستمی کۆماری ئیسلامی لە روانگەی خەڵکی کوردستانەوە ناڕەوایە، چونکە ئەمە بە دەنگ و راپرسی سەلمێنراوە و کورد نای بە “کۆماری ئیسلامی” گوتووە.

 کۆماری ئیسلامی و خەڵکی کوردستان هیچ متمانەکیان بە یەکتر نییە و رێژیم تەنیا بۆ دەنگ و شانۆگەری خەڵکی دەوێت، دەنا لە بەشداریی پرۆسەی سیاسیدا هیچ بۆی گرنگ نییە کورد هەبێت یان نا.

 بەپێی هیچ بنەما و پێوەرێکی سەردەمیانە و ئەمڕۆیی ئەوانەی لە ئێران بەناوی هەڵبژاردنەوە بەڕێوە دەچن، دیموکراتیک نین و ناچنەی خانەی تاقیکردنەوەی دێمۆکراسییەوە، چونکە شێوازەکانی خۆ پاڵاوتن، پیوەر و مەرجەکان، شێوازی و رێکارەکانی پەسەند و رەتکردنەوەی پاڵێوراوان هیچیان زانستی نین و هەموویان لە چوارچێوەی فیلتەری بیرۆکەیەکی چەقبەستووی پاوانخواز دان بۆ پاراستنی سیستمیکی ئایدیۆلۆژیک.

 ئەوە هەڵبژاردن نییە، چونکە رێگە نادرێ هیچکەس بیجگە لە هاوبیر و روانگەکانی خۆیان بەشداری بکەن و لە ئەنجامدا دەرەتانی هیچ پێشبڕکێیەک کە جەوهەری هەڵبژاردنی دێمۆکراتیکە، ناڕەخسێنرێت.

 ماوەی 37 ساڵە لە چوارچێوەی نۆ خولی بەناو هەڵبژاردندا وادە و بەڵێنێ بە خەڵکی کوردستان دەدرێ کە گۆرانکاری لە بواری سیاسی، فەرهەنگی و ئابووریدا دەکرێت، کەچی هێشتا نەتەنیا نەکراوە، بەڵکوو رەوشی کوردستانی رۆژهەڵات لە جاران خراپتر بووە و روانگەی ئەمنی و دواکەوتوویی ئابووری و تەشەنەسەندنی خەسار و قەیرانە کۆمەڵایەتییەکان ژیانی خەڵکیان تاڵ کردووە.

 بۆیە من لەو باوەرەدام هەرچەشنە بەشداری کردن و بانگەشە و هەوڵدانێک بۆ هاندانی خەڵک، راستەوخۆ رەوایی دانە بە چەوساندنەوە، ملکەج کردنە بۆ سەرکوت و پەت و سێدارە و دواکەوتوویی و لە هەموو گرنگتر درۆ کردنە لەگەڵ بیروباوەڕی خۆمان.

سه‌رنج و كۆمێنت

كۆمێنت

Leave a Reply

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.