ڕۆژی کورد: بەپێی هەواڵی هەواڵدەرییە فەرمییەکانی ئێران، ئەمڕۆ سێ شەممە 6ی ڕەزبەری 1395ی هەتاوی، حەسەن ڕوحانی، سەرۆک کۆماری کۆماری ئیسلامی، لەگەڵ “هدیە خەلەف عەباس”، سەرۆکی پارلمانی نوێنەرانی ڕژیمی ئەسەد لە تاران کۆبۆوە.
ڕوحانی لەو دانیشتنەدا پێداگرییەکی زۆری لەسەر هەبوونی پەیوەندیی دۆستانە لە نێوان ئێران و سووریە کرد.
ڕوحانی هەروەها باسی لە گرنگیی تەواویەتی خاکی سووریە کرد و گوتی: “یەکگرتوویی و تەواویەتی خاکی هەموو وڵاتانی جیهان و بەتایبەتی سووریە وەک ڕێسایەکی سەرەکیە و گۆڕین و گۆڕانکاریی سنوورەکان بە قازانجی ناوچەکە و لە بەرژەوەندیی کەسدا نیە”.
ئەو لێدوانەی ڕوحانی لە کاتێکدا دێنە ئاراوە کە ئێران تا ئێستا چەندین جار دژایەتی خۆی لەگەڵ سەربەخۆیی هەرێمی کوردستانی باشوور ڕاگەیاندووە بەڵام لە لایەکی تر خۆی دەست تێوەردان لە کار و باری وڵاتانی یەمەن و وڵاتانی تری عەڕەبیدا دەکات.
ڕوحانی لەمەڕ شەڕی سووریە گوتی: “ئەمڕۆ شەڕێکی زۆردارانە لە لایەن گرووپە تیرۆریستییەکانەوە کە پێبەندی هیچ ڕێسایەکی ئەخلاقی نین، بەسەر خەڵکی سووریەدا سەپاوە و ئێمە دەبێ یارمەتیی خەڵکی سووریە لە بەربەرەکانی لەگەڵ تیرۆردا بدەین”.
مەبەستی حەسەن ڕووحانی لە خەڵکی سووریە، ڕژیمی بەشار ئەسەد و هاوپەیمانەکانیەتی و لەو قسانەوە دەردەکەوێ کە ئەوان دژبەرانی ئەسەد بە خەڵکی سووریە نازانن.
کۆماری ئیسلامی لە ماوەی شەڕی ٥ ساڵەی ناوخۆیی سووریە، چەندین گرووپی چەکداریی سەر بە سپای قودسی لە سووریە جێگیر کردوون کە لە ناویاندا “فاتمیون و زەینەبیبون و …تاد کە بە پارێزەرانی حەرەم ناسراون، جێگای تایبەتییان هەیە و تا ئێستا سەدان ئەندامی پلەبەرزی سپای تیرۆریستیی ئێران و ئەفغانیی ئەندامی ئەو سپایە لە سووریا کوژراون.
