هێماكانی هات‌‌وچۆ

هۆنراوەی: فه‌رهاد ئه‌حمه‌د به‌رزنجی

هێماكانی هاتوچۆ/

دانراون بۆمن و تۆ/

نیشانه‌و ڕه‌نگه‌كانی/

ده‌زانین زۆر به‌ جوانی/

یاساكانی ڕێگایه‌/

سودی بۆمرۆڤ تیایه‌/

ڕێزگرتن له‌م یاسایه‌/

له‌ ئه‌ستۆی هه‌موان دایه‌/

ئێمه‌ی مناڵ شاره‌زاین/

به‌ ئارام و دڵنیاین/

چونكه‌ بۆ په‌ڕینه‌وه‌/

هێما ده‌ناسینه‌وه‌/

یه‌كێك له‌و هێمایانه‌/

گڵۆپی ڕه‌نگه‌كانه‌/

ڕه‌نگی سه‌وز و زه‌رد و سور/

دیارن له‌ نزیك و دوور/

چران وان له‌ سه‌رشه‌قام/

چێنراون وه‌كو نه‌مام/

به‌رده‌وام داده‌گیرسێن/

به‌ دوای یه‌كتریدا دێن/

كه‌ ڕه‌نگی سه‌وز هه‌ڵهات/

خه‌ڵكی هات‌وچۆ ده‌كات/

له‌شه‌قام به‌ئه‌سپایی/

ده‌ڕۆن به‌ دڵنیایی/

ڕه‌نگی زه‌رد وه‌كو زه‌نگه‌/

بۆ شۆفێری چه‌له‌نگه‌/

له‌ لێخوڕین هێواش بێت/

تا ئاماده‌ی وه‌ستان بێت/

كه‌ ڕه‌نگی سوور هه‌ڵكرا/

ئوتومبێل نابێ‌ بڕوا/

ئێمه‌ش چاوه‌ڕوان ده‌بین/

له‌سه‌ر شۆسته‌ ده‌وه‌ستین.

Comments

comments