ڕۆژی کورد: بەپێی هەواڵی هەواڵدەریی فارس، عەلی ئەکبەر ویلایەتی لە کۆبوونەوەی سکرتێرەکانی پارێزگاکانی ئێران، ئاماژەی بە جووڵەی هێزی پێشمەرگە و بەهێز بوونی کوردەکان لە ناوچە داوە و گوتوویەتی: “ئەمریکاییەکان دەیانهەوێ کوردەکانی سووریە بەهێز بکەن و بە کوردەکانی باشووریانەوە بلکێنن و کوردستانێکی سەربەخۆ ساز بکەن کە ئەوە مەترسییەکی گەورەیە، ئەگەر کوردەکان سەربەخۆ بن، ئەوا ئیسراییلی دووهەم شکڵی گرتووە”.
عەلی ئەکبەر ویلایەتی بە ئاماژە بە ساڵڕۆژی ڕێکەوتنی بەرجام گوتوشیەتی” :ئەمریکاییەکان بەڵێنییەکانی خۆیان لە بەرجامیان نەگەیاندۆتە جێ، گەماوەکان بە تەواوی هەڵنەگیراون و بەداخەوە بەشێک لە مەرجەکانی ڕێبەر لە بەرجام لەبەرچاو نەگیراون”.
ئەو ئەندامەی هەیئەتی چاوەدێری لەسەر بەرجام هەروەها گوتووشیەتی: “دەبوایە ئوباما بنووسێت کە گەمارۆکان هەڵبگیردرێن بەڵام بە پێچەوانەی بەڵێنییەکانیان، تا ئێستاش ئوباما ئەو کارەی نەکردووە، بەداخەوە لایەنی ڕۆژئاوایی هێشتاش گەمارۆکانی هەڵنەگرتووە”.
ڕاوێژکاری خامنەیی هەروەها گوتووشیەتی: “هەروەک خامنەیی باسی کردووە، لەوانەیە ئەمریکاییەکان ئەو گەمارۆیانە لابەرن بەڵام بە بیانووی ترەوە جارێکی تر گەمارۆکان دادەنێنەوە”.
ویلایەتی هەروەها گوتووشیەتی: “ئێمە بەرجاممان قەبوڵ کرد تا لەگەڵ ئاستەنگ کردنی بەشێک لە چالاکییە ناوکیەکانمان، بواری ئابووریمان بۆ بڕەخسێ و چالاکیی ئابووریمان دەست پێبکەینەوە بەڵام ئەمریکا هەر لەسەر قسەی خۆیەتی”.
لە حاڵێکدا کە بە گوێرەی بەڵگەکان ئێران بە زۆرەملی بەشیک لە ئەفغانیەکان و بەتایبەتی هەزارەکان ڕەوانەی شەڕی سوریە دەکات و لە لایەکی تریشەوە بەشێکی زۆر لە ئەندامانی سپا بەتایبەتی لە پارێزگای مازەندەران ئامادە نین بە هیچ چەشنێک بەشداری لە شەڕی سووریەدا بکەن، ویلایەتی لە درێژەی قسەکانی دا، باسی لە سەرکەوتنی ئیسلام لەمڕۆدا کرد و گوتیشی لەوەتا ئیسلام هەبووە هێندەی ئەمڕۆ سەرکەوتوو نەبووە، ئەوەتا ئەمڕۆژانە خەڵک بۆ پاراستنی حەرەمە پیرۆزەکان، ڕیزیان بەستووە.
