ڕۆژی کورد: بەپێی ڕاپۆرتێک کە ئەم دواییانە بڵاو بۆتەوە، ئەمریکا و شەریکەکانی، لە کاتی دان و ستانە ناوکییەکان، بە نەهینی و شاراوەیی ئیزنیان داوە بە ئێران تا بەشێک لە کۆسپەکانی ناو ڕێککەوتننامەی ناوکی، دەور لێداتەوە.
ئەو دەنگۆیە لەلایەن هەواڵدەریی ڕۆیتێرزەوە بڵاو بۆتەوە، لە هەمان کاتدا ڕۆیتێرز دەڵێ ناتوانێ ڕاستی و دروستیی ڕاپۆرتەکە پشتڕاست بکاتەوە و تەنیا ڕایگواستوە.
بەپێی قسەکانی دەیڤید ئولبرایت، سەرۆکی ناوەندی زانست و ئاسایشی نەتەوەیی کە بنکەکەی لە واشنگتۆنە و پێشتریش بازڕەسی مادە کیماییەکانی ڕێکخراوی نەتەوە یەکگرتووەکان بووە، بڕیار وایە ئەمڕۆ پێنج شەممە 11ی خەرمانانی 1395ی هەتاوی، ئەم ڕاپۆرتە بڵاو ببێتەوە.
ئولبرایت لە داڕشتن و نووسینی ئەو ڕاپۆرتەدا بەشدار بووە.
ئۆلبرایت لەمەڕ ئیزندانی ئەمریکا و شەریکەکانی بە ئێران بۆ دەورلێدانەوەی کۆسپەکانی ناو ڕێککەوتننامەکە دەڵێ: “ئەو لێبوردن و ئیزن پێدان و چاونووقاندنانە بە نەهێنی کراوە و پێدەچێ زۆرتر لە بەرژەوەندیی ئێران دابووە، یەکێک لەو چاونووقاندنانە بریتییە لە پێدانی مۆڵەت بە ئێران بۆ ئەوەی ئاستەنگی و سنووردارکردنەکانی ڕادەی ڕاگرتنی یورانیۆمی کەمتر پیتێندرا لە بنکە ناوکیەکانی خۆیدا لەسەر نەمێنێ.
بەپێی ئەو ڕاپۆرتەی کە ئولبرایت باسی دەکا، ئەو چاوپۆشین و داشکاندنانە لە لایەن کۆمسیۆنی هاوبەشی چاوەدێری بەسەر ڕێککەوتننامەی ناوکییەوە، چەسپێندراون.
لەو ڕاپۆرتەدا لە زاری یەکێک لە بەرپرسە باڵاکانەوە کە ئاگاداری کارەکەیە گوتراوە، ئەگەر کۆمسیۆنی هاوبەش بۆ پێدانی ئەو لێبووردن و چاوپۆشینانەدا نەکەوتبا کار، ڕێککەوتننامەی 16ی ژابویە و مۆڵەتی بەپەلە (زەربولعەجەل)ی دیاری کراو بۆ دەستپێکردنی هەڵوەشانەوەی گەمارۆکان، هەندێک بنکەی ناوکیی ئێرانی نەدەگرتەوە.
