ڕۆژی کورد: پێشتر میدیاکانی ئێران بڵاویان کردبۆوە کە هۆکاری نەگەڕانەوەی دوو یاریزانی یانەی نەتەوەیی ئێران لە وڵاتی سوید و وەدواکەوتنیان و گەڕانەوە ڕاهێنەرەکەیان بە تەنیا، بە هۆی دزرانی کەل و پەلی ئەو وەرزشوانانە لە فڕۆکەخانەی سوید بووە، بەڵام ئێستا هەواڵەکان باس لەوە دەکەن کە ئەو دوو یاریزانە خۆیان نەگەڕاونەتەوە و داوای پەنابەرییان لەو وڵاتە کردووە.
ئەو دوو یاریزانە بۆ بەشداری کردن لە کێبڕکێکانی “ڕۆل ئیسکی” چووبوونە باژێڕی گوتنبێرگ لە وڵاتی سوید بەڵام دوای یارییەکان نەگەڕاونەتەوە ئێران و داوای پەنابەرییان لە وڵاتی سوید کردووە.
ماڵپەڕی “ستۆکهۆڵمیان” کە ماڵپەڕێکە بۆ فارسی زمانەکانی سوید بڵاو دەبێتەوە شوناسی ئەو دوو وەرزشوانەی وەها ڕاگەیاندووە: “ئەو دوو ئیسکیبازە لێهاتووە کە ئەندامی یانەی نەتەوەیی ئێرانن، یاسین شمشەکی 28 ساڵە و خێزانەکەی سەمانە کیا 26 ساڵەن”.
ئەو ماڵپەڕە هەروەها دەڵێ: “ئەو ژن و مێردە وەرزشوانە ئێرانیە، ئێستا لە ستۆکهۆڵمن و بە ماڵپەڕی ستۆکهۆڵمیان ڕاگەیاندووە کە لە کۆتاییەکانی مانگی ئوت، هاوڕێ لەگەڵ مستەفا میرهاشمی، سەرڕاهێنەری یانەی ئیسکیی بیابان پێوی، بە مەبەستی بەشداری لە کێبڕکێکانی “ڕۆڵ سکی” هاتبوون بۆ سوید و ئێستا داوای پەنابەرییان لەو وڵاتە کردووە”.
سەید عەبدی ئیفتخاری، سەرۆکی فیدراسیۆنی ئیسکیی ئێران ئەو هەواڵەی بە ناڕاست زانیوە و گوتوویەتی هۆکاری درەنگ گەڕانەوەی یانەکە بۆ ئێران، دزرانی جانتا و کەرەستەکانی ئەو ئیسکیبازانە بووە.
لە وڵامی ئەو پرسیارە کە ئەدی چٶنە سەرڕاهێنەرەکە بەتەنیا گەڕاوەتەوە بۆ ئێران ، ئیفتخاری گوتوویەتی: “ئەوە بەو هۆکارە بووە کە کاتی فڕینەکەیان جیاواز بووە و بە دوو فڕۆکەی جیاواز وەڕێکەوتوون”.
