ڕۆژی کورد: بەپێی هەواڵی گەیشتوو بە ناوەندی ڕۆژی کورد، کەسێکی خەڵکی مهاباد کە لە ناو ڕیزەکانی ڕێکخراوی تیرۆریستیی داعش دا بوو، لە یەکەم ڕۆژەکانی شەڕی ئازادکردنی موسڵ كوژرا.
شوناسی ئەو کەسە “چیا سوڵتانی”، کوڕی ڕەحمان، تەمەن ٣٢ ساڵان خەڵکی گەڕەکی دۆڵی کەروێشکەی باژێڕی مهاباد ڕاگەیێندراوە کە ماوەی ٢ ساڵ بەر لە ئێستا چۆتە ناو داعش.
چیا سوڵتانی و برایەکی بەناوی سامان، پێشتر بە تاوانی ئەندامەتی لە ڕێکخراوی تیرۆریستیی داعش لە ئێران دەستبەسەر کراون و دواتر بە دانانی سەنەد و بارمتە ئازاد کراون، دوای ئازادکران، چوون بۆ ناو ڕیزەکانی ئەو ڕێکخراوە تیرۆریستیە .
چیا کاتی چون بۆ ناو داعش، خێزانەکەشی لەگەڵ خۆی بردووە و دواتر داوای کردووە ڕژیمی ئێران ئیزنی گەڕانەوەی خێزانەکەی بدات کە ئەو داوایە لە لایەن ئیتلاعاتەوە ڕەت کرابۆوە. دەگوترێ کە خێزانەکەی چیا ئێستا دووگیانە.
ڕەحمان سوڵتانی باوکی ئەو تیرۆریستە کوردەی سەر بە داعش، مامۆستای خانەنشین کراوە و بە گوێرەی زانیارییەکان کەسێکی بەڕێز و خۆشناوی ناو شاری مهابادە.
بە گوێرەی ئەو زانیارییانەی بۆ ناوەندی ڕٶژی کورد نێردراون، ئیتلاعات پێشی بە دانانی سەرەخۆشی بۆ ئەو تیرۆریستەی خەڵکی مهاباد گرتووە.
