ڕۆژی کورد: بەپێی هەواڵی گەیشتوو بە ڕۆژی کورد، شەوی دووشەممە لەسەر سێ شەممە ٢٢ی پووشپەڕی ١٣٩٥ی هەتاوی، چەند گەنجێکی چالاکی کوردی دژبەری ڕژیم لە شاری ستۆکهۆڵ ـی وڵاتی سوید بە مەبەستی مەحکووم کردنی تیرۆری ڕێبەری مەزنی کورد، دوکتور عەبدووڕەحمان قاسملوو بە دەست دیپلۆمات تیرۆریستەکانی کۆماری ئیسلامی، بە ئەنجام دانی چالاکیەک لەبەردەم سفارەتی ئێران لە سوئێد، ناڕەزایەتیی خۆیان بە شێوەیەکی نوێ نێشان دا.
ئەو چالاکە کوردانە لە درەنگانی شەودا چونە بەر دەرگای سفارەتی ئێران لە سوئێد و بە ڕەنگی سوور، وشەی “تیرۆر”یان لەسەر تابلۆی سەفارەتی ڕژیم نووسی.
دواتر لە درێژەی چالاکیەکەدا لەمەودای شەقامی سەفارەتی ئێران لە سوئێد بە دوو زمانی فارسی و سویدی درووشمیان بە دژی ڕژیم نووسی.
بەشێک لە درووشمەکان بریتی بوون لە: “نەمان بۆ کۆماری سێدارە”، “بژی دێموکرات” و”ئێران تیرۆریستە”.
یەکێک لە بەشداربووانی ئەو چالاکییە لە لیدوانێکدا بۆ ڕۆژی کورد گوتی: “ئێمە لە ٢٧ـەمین ساڵڤەگەری تیرۆری ڕێبەری مەزنی گەلی کورد ئەو چالاکیەمان ئەنجامدا تا بەم شیوەیە سرنجی ڕای گشتیی سوید بۆ ئەو بابەتە ڕابکێشین و تیرۆریست ىوونی ئیران زیاتر بخەینە ڕوو و لاشمان وایە چالاکیەکەمان لێکەوتەی باشی دەبێ”.
بۆ بینینی ڤیدیۆی ئەو چالاکیە لێرە کرتە بکە
