ئیتلاعات لە بۆکان هاووڵاتییەکی کوردی دەستبەسەر کرد

0
1236

ڕۆژی کورد: بەپێی هەواڵی هەواڵنێری ڕۆژی کورد لە شاری بۆکان، ڕۆژی یەکشەممە ١٩ی پووشپەڕی ١٣٩٥ هاووڵاتیەکی شاری بۆکان بە ناوی ڕەزا قوڕەیشی، کوڕی مستەفا،  لەلایەن دوو کەس لە مەئموورانی ئیتلاعاتی شاری بۆکان دەستبەسەر کرا.

هەواڵنێری ڕۆژی کورد لە شاری بۆکان پشتڕاستی کردەوە کە ڕۆژی یەکشەممە ١٩ی پووشپەڕ و لە کاتێکدا ڕەزا قوڕەیشی لە شوێنی کارەکەیەوە بەرەو ماڵ دەگەڕاوە لە نەکاو لە لایەن مەئموورانی ئیدارەی ئیتلاعاتی شاری بۆکان دەست بەسەر کراوە.

دەگوترێ مەئموورەکان هیچ بەڵگەیەکیان بۆ دەستبەسەر کردنی ئەو گەنجەی شاری بۆکان لەبەردەستدا نەبووە و  لە کاتی دەستبەسەر کرانیدا تووندوتیژییان بەکار هێناوە و لێیانداوە.

ڕەزا قورەیشی تەمەن ٢٨ ساڵان، پێشتریش ٢ جار لە لایەن ئیدارەی ئیتلاعاتەوە بەتاوانی هەبوونی پەیوەندی و هاوکاری لەگەڵ یەکێک لە حیزبە کوردییەکانی دژبەر ڕژیم دەستبەسەر کراوە  و هەر جارەش بۆ ماوەیەک لە گرتووخانەدا بووە و دواتر بە پێی بارمتە ئازاد کراوە.

لە ئێستادا هیچ زانیارییەک لەمەڕ شوێنی ڕاگواستن و دەست بەسەر بوون و دۆخی جەستەیی و دەروونیی ئەو گەنجە ٢٨ ساڵانەی شاری بۆکان لەبەردەستدا نیە.

بەپێی ئاماری بەشی هەواڵی ناوەندی ڕۆژی کورد لە ماوەی ڕابردوودا ٣٥ کەس لە شارە جیاجیاکانی کوردستانی ڕۆژهەڵات لە لایەن جل شەخسی و مەئـوورەکانی ئیدارەی ئیتلاعاتی ڕژیمەوە دەستبەسەر کراون و تا ئێستا تەنیا ٣ کەسیان ئازاد کراون و هێچ زانیارییەک لەمەڕ دۆخی ئەوانی تر لەبەردەستدا نیە.

سه‌رنج و كۆمێنت

كۆمێنت