بلــوچ هُـــژّار

0
1287
گوں هزاراں سلام ءُ دروت بلوچستان ءِ بے شماریں شهیدان ءُ شهید  عابد زامرانی، شهید باسط چُک جان محمد ءُ شهید احمد چُک مجیدءِ  نام گِر کنگ ءَ که مان رونشتی بلوچستان ءِ آشار ءُ مگس ءِ شهرا کشگ  بوتنت،  مئی راجدپتـرءِ یک مزنیں دَرس ءُ اِندرِستے اِیش انت که دژمنانی کئول ءُ هبرانی سرا هچ بر دلجم ءُ ایکیم مه بئیں۰  اے هما جَـوریں  تجربه اِنت که اگاں مئے مروچیگیں راجی رهشوناں اشی ءِ چکاسـگ ءِ کوشست ءَ مه کتیں گهتـراَت۰  ایران ءُ پاکستان ءِ دوارسوچیں پندل  چه هساب کتاب ءَ دراَنت۰  بلـوچ بایداِنت شیوار ءُ هژار به بنت۰ 
اگاں راجدپتـری تجربه یاں شموشگ به بنت ءُ کَسّے  تهـران یا اسلام آباد ءِ ابلیسی دام ءَ ماں گیشّ اِت گـُڑا اے  وت کُشــی اِنـت ءُ تباهـی۰  ماں دژمنانی رپک ءُ پندلانی دام ءَ کَپگ بی اُگده ای اِنت ءُ راجی جنز ءِ سریں پروش کنـگ۰   چشیں سیاسی ناسرپدی دژمنانی سوب انت۰  هنوں هبـر وَ چه هلـوت ءَ گوستگ ۰
گِندگائیــں که  بلوچ کشیں سپاه قدس وتی پندلاں گیش کتگ۰ مئے لهتیں ورنا چه رودراتکی بلوچستان ءَ دَرآتکگ ءُ  تروریستی سپاه ءِ میار بوتگنت۰ دریگتیں ایشاں گلزمین ءِ کوه ءُ برزیں تیهرانی میار به بوتین اَنت یا که دگه ملکے په باهوٹی به شتین انت۰
ما را هْژار بیگی انت که  پارس ءُ پنجاپی یاں  هوری رپک ءُ پندل  سازاَنت  تاں بلوچانی راجی جهداں پروش بدینت۰  دوتل ءُ دوپوستیں پارس ءُ پنجاپی واکداراں پیش داشتـگ که په دروگیں سوگند ورگءَ مُدام تیارنت۰  هرچیزے ءِ سرا کَسَم ورنت تاں بلوچانی سروکاں په آسانی ءَ به ریپین انت۰
ما را زانگی انت که آ میارجلـی ءُ مهمان داری که مئی بلوچانی راجی دود ءُ ربیدگ ءِ بهـرے انت ماں مئے دژمنانی زند ءُ دود ءُ ربیدگ ءَ په بِیه نیسـت۰ میر دوست محمد هان ءِ شهادت ماں تهران (۱۹۲۹ عیسایی ) ءُ  احمدیار هان ءِ په زور جَلّینـَـگ ماں کراچی ( ۱۹۴۸ عیسایی  ) ءَ اے گپ ءِ دو پَدّریـں دَرورانت۰  
پارس ءُ پنجاپی واکداراں هنوں گندگاینت که بیداریں بلوچانی راجی جنز دیمروی کنگ اِنت ءُ  سیاسی زانتکآر ءُ سرمتابیں سر چِست اَنت۰ آ هَمُـک پلینڈی ءُ انسان دژمنیں  کار کننت تا همے برزیں سرآں به گُـڈانــت۰ 
 هچ شکّے نیست که اسلام آباد ءُ تهـران ءِ واکداراں بلــوچ ءُ بلوچستــان ءِ هلاپ ءَ همشور ءُ تپاک اَنت۰  آهاں جاسوسی، اقتصادی، سلهبندی ءُ سیاسی همکاری هست تاں بلوچستان ءَ مدام وتی پنجگانی چیـرا بدارنت۰   مرچی باندا اروپا ءُ امریکائی ملاکاں  جار پِرّیننت که ایران ءِ سپاه یک تروریستی لشکرے اِنت۰ گوں چشیں میاں استمانی تروریستاں مذاکره ءُ گپ ءُ گآل په بلــوچ ءِ راجی جنزءِ نپ ءُ سیت ءَ نهنت۰   بلوچستـــان ءِ دیمروی پسندیں آجویی ءِ زرمبشـت پکائیں وڑے ءَ مآں دگنیاےءَ پیش دارگی انــت۰
 
پروشــت ءُ پــروش باتنــت ايران ءُ پاکستـان
 آزات ءُ آباد بات گنجيــــــن بلوچستــــــان
محمــد کـريــم بلـــوچ

Comments

comments

LEAVE A REPLY

Please enter your comment!
Please enter your name here