ڕۆژی کورد: دوای ٣ ڕۆژ شەڕ و پێکدادان لە نێوان هێزەکانی ئاسایشیی پ ی د و دەوڵەتی سووریە لە قامیشلوو کە دەگوترێ زیاتر لە ٢٦ کوژراو و چەندین برینداری لێکەوتۆتەوە، هێزی ئاسایشی کوردستانی ڕۆژئاوا لە ڕاگەیێندراوێکدا، هەواڵی ئاگربەست لەگەڵ هیزەکانی حکومەتی سووریە لە باکووری ڕۆژهەڵاتی سووریەیان ڕاگەیاند.
ئەو ئاگربەستە دۆینێ هەینی ٣ی خاکەلێوە، کات ژمێر سێ و نیو بە کاتی سووریە، دەستی پێکردووە.
زانیارییەکانی چاوەدێری مافی مرۆڤی سووریە باس لەوە دەکات کە کوردەکان لەو ناوچانە کە شەڕی لێ هاتۆتە ئاراوە و پێشتر لە لایەن هێزەکانی ئاسایشی پ ی د لە شاری قامیشلوو دەستی بەسەردا گیرابوو و زیندانی شاریش یەکیک لەو شوێنانە بوو، پاشەکشەیان نەکردووە.
دەگوترێ کە لە ساڵی ٢٠١١ تا ئێستا کە شەڕ لە سووریە لە ئارادایە، ئەوە دووهەمین پێکدادانی تووندی نێوان هیزەکانی ئەسەد و هێزە کوردییەکان بووە.
شایانی باسەکە ڕۆژی چوارشەممە ڕێکەوتی ١ی بانەمەڕی ١٣٩٥ی هەتاوی، شەڕ و پێکدادان لە نێوان ئاسایشی سەر بە بەڕێوەبەریەتی خۆسەری دێموكراتیک لە ڕۆژئاوای کوردستان و هێزەکانی یەکینەکانی پاراستنی گەل (یەپەگە) لە لایەک و هێزەكانی ڕێژیمی سووریه لە شاری قامیشلووی ڕۆژئاوای کوردستان ڕووی دا و لە ئەنجامدا چەند کەس کوژران و بریندار بوون.
پێشتر لەو بارەوە شەمدین نەبی، لە ئەندامانی ئەنجوومەنی نیشتمانیی كورد لە سووریه – (ENKS) لە شاری قامیشلووڕایگەیاندبوو کە بەهۆی شەڕەكە ٢ ئاسایشی سەر بە یەپەگە شەهید بوونە و شەش کەسی دیكەش، سێ كارمەندی ئاسایش و سێ هاونیشتمانی مەدەنی برینداربوونە. هەروەها گوتی بەهۆی كەوتنەخوارەوەی دوو گوللە ئار پی جی لە گەراجێكی ئۆتۆمبێل، لاوێک و ژنێک برینداربوونە.
بە پـێی شایەتحاڵەکان شەڕەکە لەوەوە دەسـتیپـێکردووە کە هێزێـکی ڕژێم لەوانەی بە دیفاع وەتەنی دەناسرێن تەقەیان لە ئۆتۆمبیلێـکی پـۆلیسی هاتوچۆی سەر بە بەڕێوەبەرایەتی خۆسەری کردووە و پاشان هێزەکانی ئاسایش لە بەرامبەردا چوار ناوچەی شارەکەیان گەمارۆداوە کە هێزەکانی ڕژێمی لێـیە. یەک لەو شوێنانە زیندانی عەلایەیە و ئێسـتا کەوتووەتە ژێر کونترۆڵی هێزە کوردیـیەکانەوە.
دواتر شەڕ گەیشتووەتە ناو بازاڕی شارەکەوە و سەرئەنجام لە لایەن هێزە کوردیـیەکانەوە کۆنترۆڵکراوە.
قەناس بە دەسـتێـکی ڕژێمیش لە مزگەوتێـکی بەرامبەر کۆمەڵە بینای ڕژێم ئەوەی بە (المربع الأمني) ناسراوە تەقەی لە 10 کەسی سیڤیل کردووە و لە ئاکامدا دووانیان پـێوەبوون و گیانیان لەدەسـتدا.
