دەستبەسەرکردنی “کاسبکارانی سنووریی شاری سەردەشت” درێژەی هەیە و ئەمجارەیش سێ کەسی دیکە دەستبەسەر کراون.
ڕۆژی کورد: بە پێی بەشی مافی مرۆڤی ناوەندی ڕۆژی کورد، لە درێژەی گوشار خستنە سەر کۆڵبەر و کاسبکارانی سەر سنوور، کاژێر 11ی ڕۆژی یەکشەممە، 1ی خەرمانانی 1395ی هەتاوی، سێ کەس لە کاسبکارانی سنووریی خەڵکی گوندی “گولان”ی سەر بە شاری “سەردەشت” لە لایەن ” هێزەکانی ئاسایشی باژێڕی سەردەشت”ـەوە دەستبەسەر کراون.
سەرچاوەیەکی ئاگادار بە ناوەندی ڕۆژی کوردی ڕاگەیاند، “عەلی مەولان نیا”، “ئەحمەد مەولان نیا” و “عەلی عەلیزادە” لە سنووری ناوچەی “ئالان” لە لایەن هێزەکانی “ئاسایشی باژێڕی سەردەشت”ـەوە دەستبەسەر کراون.
ئەو سەرچاوەیە هەروەها بە ڕۆژی کوردی ڕاگەیاند: “هێزەکانی ئاسایش”، ئەم سێ کەسەیان لە حاڵێکدا دەستبەسەر کردووە کە ناوبراوان بە مەبەستی نوێکردنەوەی مۆڵەتی بەڵگەی سنووریان، سەردانی یەکێک لە ناوەندە ئەمنییەتییەکانیان کردووە و هەنووکە لە “بەندیخانەی کاتیی ئیدارەی ئاسایشی سەردەشت”دان.
هەروەک پێشتریش لە هەواڵەکانی ناوەندی ڕۆژی کورد دا هاتبوو، ڕۆژی پێنجشەممە 1ی پووشپەڕی 1395ی هەتاوی و بە هۆی ناڕەزایی دەربڕینی بنەماڵەکانی دوو برای کۆڵبەری کوژراوی گوندی گوێزیلێی سەر بە باژێڕی سەردەشت واتا ” لەتیف و ڕەئووف عەلیخانی”، سێ کەسی ئەو گوندە بە ناوەکانی “ئەبووبەکر و ناسێح عەلیخانی” و “عومەر عەبدوڵڵاپوور” لە لایەن هێزەکانی ئاسایشەوە دەستبەسەر کرابوون.
ئەبووبەکر عەلیخانی لە کاتی دەستبەسەرکران بە تووندی ئەشکەنجە کرابوو بە جۆرێک کە دوای ئازادبوونی بە زوویی ڕاگواسترا نەخۆشخانە و پزشک ڕایگەیاندبو کە قامکی ناوبراو بە هۆی ئامێری گەرماییەوە سووتاوە.
لە چەند مانگی ڕابردوودا، چەند گەنجێکی دیکە لە گوندەکانی ناوچەی “ئالان” بە هۆی مەترسی دەستبەسەرکران لە لایەن “ئیدارەی ئاسایشی سەردەشت”ەوە ئاوارە بوون و بەرەو شوێنی نادیار ڕایان کردووەو تا ئێستا هیچ زانیارییەک سەبارەت بە یەکێک لەو گەنجانە بە ناوی “دانا ئیبراهیم نەژاد” لە بەردەستدا نییە.
