ڕۆژی کورد: بەپێی هەواڵی هەواڵنێری بەشی فارسیی ڕۆژی کورد، بەیانیی ڕۆژی پێنج شەممە 8ی ڕەزبەری 1395ی هەتاوی، لە دوو ڕێیانی گیدبەست-سەراوان ـی سەر بە پارێزگای سیستان و بەلووچستان، بە هۆی تەقەی ڕاستەوخۆی لقی میرسادی هێزەکانی سپای تیرۆریستیی پاسداڕان لە ترۆمبیلێک، 13 کەس لە ناو ئاگردا بوون بە خەڵووز.
بەپێی ئەو زانیارییانە، هێزەکانی سپای تیرۆریستیی پاسداڕان، لە دوو ڕێیانی گیدبەست-سەراوان، تەقەیان لە دوو ترۆمبیلی هەڵگری 10 گەنجی ئەفغانی کردووە و لە ئەنجامدا 13 کەس بوون بە قوربانی و سووتاون.
3 کەس لە کوژراوەکانی ئەو تەقە کردنە، هاووڵاتیانی بەلووچن. دەگوترێ هێزەکانی ڕژیم دوای تەقەکردن و ئاگرگرتنی ترۆمبیلەکە، شوێنەکەیان بەجێهێشتووە.
کۆتایی مانگی پووشپەڕی ئەمساڵیش دوو هاووڵاتیی بەلووچی خەڵکی سەرباز، بە هۆی تەقەی ڕاستەوخۆی هێزەکانی لقی میرسادی هێزەکانی سپای تیرۆریستیی پاسداڕان و دواتر لێکدانی ترۆمبیلەکانیان و وەرگەڕانیان، لە ناو ئاگردا سووتان.
لە ماوەی ٣٧ ساڵی ڕابردوو و دوای هاتنە سەر کاری ڕژیم، شارۆمەندانی ئاسایی کورد و بەلووچ، بە شێوەیەکی سیستماتیک و ئامانجدار، لە لایەن هێزەکانی ڕژیمی ئێران، کوژراون بەڵام تەنیا بۆ یەک جاریش،بکوژ و هۆکارەکانی، لێپرسینەوەیان لێنەکراوە و دادگایی نەکراون.
