ڕۆژی کورد: بەپێی زانیارییەکانی ناوەندی ڕۆژی کورد، هاووڵاتییەکی کوردی خەڵکی شاری کرماشان و چالاکی سیاسیی کوردی دانیشتووی وڵاتی دانمارک، ڕۆژی سێ شەممە بە مەبەستی ناڕەزایەتی دەربڕین لە هەمبەر هێرشی چەکدارانەی بەربەرینی ڕژیمی ئێران بۆ سەر خەڵکی بانە و هەروەها کوشتنی کۆڵبەرانی کورد، چالاکییەکی بەربەرینی لەبەردەم باڵوێزخانەی ڕژیمی تاران لە دانمارک بەڕێوە برد.
وەک لە ڤیدیۆ و وێنەکاندا دیارە، شەهریار حوسێنی، چالاکی سیاسیی کوردی خەڵکی سەرپێڵی زەهاوی سەر بە پارێزگای کرماشان و نیشتەجێی شاری بخوست ـی وڵاتی دانمارک، ڕۆژی سێ شەممە ١٤ی خەرمانانی ١٣٩٦ی هەتاوی، وێنە و تراکتی کوشتنی کۆڵبەران و هەروەها برینداربووانی شاری بانەی، لە بەردەم شەوێنە جیاجیاکانی باوڵوێزخانەی ڕژیمی ئێران لە دانمارک بڵاو کردەوە.
شەهریار حوسێنی، لە لێدوانێکی تایبەت بۆ ناوەندی ڕۆژی کورد، هۆکاری ئەنجامدانی ئەو چالاکییەی خۆی گەڕاندەوە بۆ هاوخەمی و هاوڕایی و پشتیوانی دەربڕینی لەگەڵ خەڵکی بانە و هەروەها ناڕەزایەتی دەربڕینی لە هەمبەر کوشتنی بێ بەزەییانەی کۆڵبەرەکان لەلایەن ڕژیمی تارانەوە.
ئەو چالاکە سیاسییە کوردەی خەڵکی کرماشان، هەروەها گوتیشی: “بەداخەوە من بە تەنیا ئەم چالاکییەم بەڕێوە بردووە و کەسی تر هاوکاری و هاوڕایی نەکردووم”.
حوسێنی کە ئەندامی حیزبی دێموکراتی کوردستانی ئێرانە، لە درێژەدا گوتی: “لە کاتی ئەنجامدانی چالاکییەکە، یەکێک لە فەرمانبەرەکانی باڵوێزخانەی کۆماری سێدارەی ئێران، بە توندی و چەند جارێک هەڕەشەی لێ کردم بەڵام من چالاکییەکەی خۆم درێژە پێدا تا ئەوەی کە لەلایەن پۆلیسی دانمارک و بە شێوەیەکی هێمنانە، ناچار بە کۆتایی پێهێنان بەو چالاکییە بووم، هەڵبەت من ئەوەی دەبوا کردبام، کردبووم”.
