ڕۆژی کورد: بەپێی هەواڵی هەواڵدەریی ئاسۆشتێدپرێس، ئەمڕۆ هەینی ١٤ی خەزەڵوەری ١٣٩٥ی هەتاوی، تەقینەوەیەکی توند لە دیاربەکر هاتە ئاراوە.
لەو تەقینەوەدا کە لە نزیک بینایەکی پۆلیسی دژەشۆڕش هاتە ئاراوە، لانیکەم ٨ کەس کوژراون.
تەقینەوەکە لە ڕێگای مینی بوسێکەوە ئەنجام دراوە و دەگوترێ نزیک بە یەک تۆن کەرستەی تەقینەوەی لە ناودا بووە و چەندین بینای نزیک ئەو بینایەک پۆلیسی دژەشۆڕشی تورکیە تێکداوە.
بینالی ییلدریم، سەرۆک وەزیرانی تورکیە لەمبارەوە گوتی: “لەو تەقینەوەیەدا 2 پۆلیس، شارەزایەک و پێنج کەسی سڤیل کوژراون”.
ییلدریم هەروەها باسی لە کوژرانی کەسێک لە هێرشکەرەکان کرد بەڵام زانیاریی زیاتری لەمبارەوە بڵاو نەکردەوە.
بەپێی لێدوانی نووسینگەی دیاربەکر، پ ک ک، بەرپرسیارەتیی ئەو هێرشەی وەئەستۆ گرتووە بەڵام ڕۆژی کورد تا ئێستا هیچ هەڵوێستێکی لەمبارەوە لە پارتی کرێکارانی کوردستان نەبینیوە کە ئەو هێرشەی وەئەستۆ گرتبێ.
ئەو تەقینەوەیە چەند کاتژمێر دوای دەستبەسەرکرانی دەمیرتاش و یوکسیکداغ و ١٢ پارلمانتاری تری HDP هاتە ئاراوە.