ڕۆژی کورد: هەروەک لە هەواڵەکانی ناوەندی ڕۆژی کورددا هاتبوو، بڕیاربوو ئەمڕۆ پێنج شەممە 18ی سەرماوەزی 1395ی هەتاوی، لە شاری مەریوان، ڕێپێوانێک بۆ پشتیوانی لە کۆڵبەرانی کورد و لە ژێر دروشمی “نا بۆ کوشتنی کۆڵبەر” پێک بێت، بەڵام هیزەکانی ڕژیم بە چڕی ڕژانە ناو بازاڕ و پێشیان بەو کۆبوونەوە مەدەنییە ناڕەزایەتییە گرت.
بەپێی هەواڵی هەواڵنیری ڕۆژی کورد لە مەریوان، ئەمڕۆ هێزە ئینتزامی و سەربازی و جل شەخسییەکانی مەریوان تەنانەت بڵاوەکان بە کۆبوونەوەی ٢ تا ٣ کەسیش گرتووە و ئیزنیان نەداوە کۆبوونەوەکان کە بڕیار بوو لە پێش فەرمانداریی ئەو باژێڕی پێک بێن، بەڕێوە بچێت.
بەو حاڵەشەوە خەڵکی ناڕزایی مەریوان تا ئاستێکی باش هاودەنگیی خۆیان لەگەڵ ئەو داواکارییە نیشان دا.
دۆخی باژێڕی مەریوان ئەمڕۆ تا درەنگانێک هەر سەربازی بووە و هێزەکانی ڕژیم بە چڕی ناو شاریان تەنیبوو.
هەر لەو پێیەدا ئارام فەتحی، چالاکی مەدەنیی خەڵکی مەریوان، مەریوان ڕۆژی دووشەممە ١٥ی سەرماوەزی ١٣٩٥ی هەتاوی، لەلایەن هێزە ئەمنییەکانی ئیدارەی ئیتلاعاتی شاری مەریوانەوە دەسبەسەر کرابوو و تا ئیستا بەرنەدراوە.
کاناڵی بانگەوازیی ئەو چالاکییە مەدەنییە، ڕۆژی چوارشەممە 16ی سەرماوەزی 1395ی هەتاوی، لە لایەن کاربەدەستانی ڕژیمەوە هاک کراوە و لە ئێستادا کۆنترۆڵی بەتەواوی لەدەست چالاکان و بەرپرسانی کاناڵەکەدا نەما.
لە ماوەی ئەمساڵی هەتاوی ـدا، خەڵکی مەریوان بە هۆی ڕێگری کردنی لە دووچەرخەهاژوتنی کچان و هەروەها “تانکەری مەرگ”، ناڕەزایەتیی بەرینی جەماوەرییان بەڕێوە بردووە و هەڵوێستیان گرتووە.
