ڕاستە وەک دەسەڵات ، ڕاگەیاندن بەهێزی چوارەم ئەژمار دەکرێت ،بەڵام لە سیاسەتی نهێنیی بەرێوەبەریدا ژمارەی یەکەمە .
بەتایبەت لە سیاسەتی دەسەڵاتێکی داگیرکەردا و تەنانەت لە دەسەڵاتێکی خۆماڵیی خۆسەپێنیشدا ، سیاسەتی ئازادیی ڕاگەیاندن سەرەڕای بەربەستەکان لەبەشی بەستێن و چاودێری کردن ، بەڵام چەند ئامانجێکی تایبەتتر دەپێکێت لە بەرژەوەندیی دەسەڵات دا .
واتە لە ئازادیی ڕۆژنامەگەریدا ڕەهەندەکانی چەواشەیی ڕیکلامیی و پڕوپاگەندا ، جیا لە بواری ئابووریی و سیاسیی ڕووکەش ، پێوەرەکانی کۆمەڵناسانەی چۆن ڕاهاتنی کۆمەڵگە بە ئازارەکان ، ئامانجی ستراتیژیی سەرەکییەتی .
چونکە مرۆڤ بوونەوەرێکە لە ڕاهاتن بە ژیان و ئازارەکان تا ئەو کاتەی تاکی ڕووناکبیری کۆمەڵگە ، تێڕوانینی جیاوازی دەبێت بۆ ڕاهاتن .
واتە ڕەنگە ئاسایی بێت مرۆڤ بە خواردن و نەخواردن لە جۆری خواردەمەنیی ڕۆژانەی ڕابێت ، یان مرۆڤ دەتوانێت لە بانگەشەیەک ڕابێت بێ ئەوەی دەنگی تیڤیەکەی کەم بکات ، چونکە بەلایەوە ئیتر گرینگ نییە ئەو بانگەشەی کە سەدانجار گوێی پڕ کردووە .
یان زۆر ئاساییە مرۆڤێک بە میوزیکێکی بێگانە ڕاهاتبێت بەڵام ئەوەی مەترسیدارە ڕاهاتن بە ڕاگەیاندێکە کە ڕۆژانە بەشمەینەتیی و ئازار و مەرگی ئازیزانت بۆ دەگوازێتەوە ، ئەویش ئەو تێگەیشتنەیە کە پێویستە هەڵویستەی لەسەر بکرێت ، واتە خاڵی گرینگی ئەو بابەتە لەوەدایە کە ئاخۆ ئەو ڕاهاتنە چی کاریگەریەکی دەبێت لە سەر گەلێکی شۆرشگێر کە بەدرێژایی مێژوو بە چەک و کوشتن کۆڵی نەداوە لەوکاتەیدا کە ڕاگەیاندن وەها ڕۆڵیکی نەبوو لە ڕاهاتنی ڕۆژانەدا ؟
بەڵام ئێستا سیاسەتی ڕاگەیاندنی دووپاتە ، دووپاتە ، دووپاتە ، دووپاتە ، لە مێشکی مرۆڤادا دووپاتەبوون ڕاهاتنە ، بەڵام ڕاهاتن بە مەرگی شۆرشگێران و هەواڵی دەستبەسەرکرانی لاوەکان لە لایەن دەسەڵاتەوە ، ڕاهاتن و دووپاتەیەکی مەترسیدارە بە ناوی ڕاهاتنی کۆمەڵگە بە ئازارەکان وەک هەر هەواڵێکی ئاسایی ڕۆژانە، ئەم ڕاهاتنە لە سیاسەتی نهێنیی ڕاگەیاندندا لە سەر ئەدەبی زارەکیی دارێژراوە کە پەی دەگوترێت خۆشە بوون .
وشەی خۆشەبوون لە پێناسی پەروەردەیی منالێکی لاسارو هارووهاجەوە سەرچاوەی گرتووە کە لەدووپاتەی هارووهاجیی خۆیدا هەێندەدارکاریی کراوە لەشی بە لێدان ڕاهاتووە ، بۆیە ئیتربە تێگەیشتنەوە هەڵەکانی دووپاتە دەکاتەوە و دەزانێت ئیتر ئازاری لێدانەکەی لە شکاندنی ترسەکەیدا و خەلسیوە .
بەڵام پرسیار ئەوەیە ئاخۆ کورد دەتوانێت لە ئازاری هەواڵی لە سیدارەدانی ڕۆڵەکانی ڕابێت بە دەستی کۆماری ئیسلامیی ئێران؟
یان دەبێت دژبەو سیاسەتی چەواشە کردارییە ڕاهاتنە ڕاپەڕێت و گومانیش بخاتە سەر ئەو ڕاگەیاندنانەی وەها سیاسەتێک پەیڕەو دەکەن بە بێ ئەوەی ڕۆڵی هاندەر بگێڕن بۆ شۆڕشێکی جەماوەریی بۆ ڕانەهاتن بەو ئازارانە .
شەماڵ مامزادە بۆکانی
