دەستپێکی چالاکی ئاشکرای کۆمەڵە کە پاش شەهید بوونی کاک محەممەد حوسێنی کەریمی لە ڕۆژی ٢٦ی ڕێبەندانی ساڵی ١٣٥٧ی هەتاوی ڕاگەیەندراوە بە ڕۆژی کۆمەڵە ناودێر کراوە.
کۆمەڵە سەرەڕای بڕینی کۆمەڵێک تەنگ و چەڵەمە و ئاستەنگ توانی وەک هێزێکی کاریگەر لە ناو کۆمەڵگای کوردستاندا خۆی بسەلمێنێ و لە پێناو ئامانجەکانی دا گەلێک قوربانی و تێچووی داوە.
لێکدابڕان و جیابوونەوەی هێز و لایەنە کوردستانیەکان، دەبێتە هۆی لاوازیی جووڵانەوەی گەلی کورد و یەکڕیزی و یەکگرتوویی ناو ماڵی کورد، هێز و متمانە بە خەبات دەبەخشێ.
ئەمڕۆ لە حاڵێکدا یادی ڕۆژی کۆمەڵە دەکرێتەوە کە لێکدابڕان و جیابوونەوەکان لە لایەک بەرۆکی بە خەباتی کۆمەڵە گرتووە و بۆتە هۆی نائومێدیی بەشێک لە خابەتی ڕزگاریخوازانەی گەلی کورد و لە لایەکیشەوە لێک نزیکبوونەوەی لایەنەکان و ئومێد بە تێکەڵ بوونەوەیان هیوا و ئومێدی داوە بە لایەنگران و دڵسۆزانی کۆمەڵە .
هاوپەیمانی سەربەخۆییخوازانی کوردستان وێڕای پیرۆزبایی ٢٦ی ڕێبەندان ڕۆژی کۆمەڵە لە سەرجەم گەلی کورد بە گشتی و لە کادر و ڕێبەرایەتی و پێشمەرگە و ئەندام و لایەنگرانی کۆمەڵە بە تایبەتی، پێداگری دەکاتەوە کە تاکە ڕێگەی گەیشتن بە ئازادی و سەربەستیی نەتەوەکەمان، یەکڕیزی و هاوخەباتییە، با چیتر بیر و بۆچوون و ئیدئۆلۆژی جیاواز لە یەکمان دوور نەخاتەوە و وەک کورد لە دەوری پلاتفۆرمێکی هاوبەشی کوردستانی کۆ ببینەوە و یەکگرتووانە خاڵە هاوبەشەکانمان بکەینە دەرفەت و بنەمای پێکەوە کارکردن و بەم چەشنە خاڵە جێ ناکۆکەکانمان کاڵ و کەمڕەنگ بکەینەوە، چونکە وەک کورد مەحکوومین بە یەکەوە بوون و بە یەکەوە کارکردن،بۆیە پێویستە چیتر بەرژەوەندیی گشتی و نەتەوەیی نەکەینە قوربانیی بەرژەوەندییە حیزبی و تاکە کەسیەکان.
جارێکی دیکە بە بۆنەی ساڵڕۆژی کۆمەڵەوە گەرمترین پیرۆزباییتان لێدەکەین و هیوادارین بە خەبات و تێکۆشانی بێوچانتان بتوانن لە گەیشتن بە ئامانجەکانتان دا سەرکەوتوو بن.
بەرز و پیرۆز بێ ٢٦ی ڕێبەندان ڕۆژی کۆمەڵە
هاوپەیمانی سەربەخۆییخوازانی کوردستان
٢٦ی ڕێبەندانی ٢٧٢١ی کوردی
١٥ی فێوریەی ٢٠٢٢ی زایینی
