ڕۆژی کورد: بەپێی هەواڵی ماڵپەڕە خۆجێیەکان، سەرلەبەیانیی ئەمڕۆ یەکشەممە، ٥ی بەفرانباری ١٣٩٥ی هەتاوی، ئوتوبوسێکی نەفەرهەڵگر، لە گەردەنەی قوشچی، هەڵکەوتوو لە ڕێگای ئورمیە بۆ سەلماس، وەرگەڕاوە.
لەو ڕووداوە هاتووچوویەدا، ٤ کەس لەجێوە گیانیان لە دەست داوە و ١٣ کەسەکەی تریش، بریندارن.
دەگوترێ دۆخی لەشساغیی چەند کەس لە بریندارەکان، ناجێگیر و نالەبارە.
ڕێگای ئورمیە بۆ سەلماس، یەکێک لە بێ دەرەتانترین و پێڕانەگەیشتووترین ڕێگاکانی کوردستانی خۆرهەڵاتە.
سەرەڕای ئەوەی کە ڕێژەی بارینی زۆری بەفر و تووشیی هەوا، لەم چەند ڕۆژەی دواییدا، داخرانی قوتابخانەکانی لێکەوتۆتەوە، بەڵام تا ئێستاش هیچ خزمەتگوزارییەک لە ڕێگاوبانەکان، بوونی نیە و ئەوەش کەوتنە مەترسیی گیانی هاووڵاتیانی لێدەکەوێتەوە.
