بەپێی زانیارییەکانی “ڕۆژی کورد” ئاکام تەرەغە، لاوی وەرزشوانی خۆرهەڵاتی (بۆکان) کە ئێستا لە ئاڵمان نیشتەجێیە لە ڕێکەوتی ٥/١٢/٢٠١٥ لە یاریەکانی پاڵەوانەتی جیهانی (تۆرنۆمێنتی ناونەتەوەیی) وەرزشی کیک بۆکس کە لە شاری فرانک فۆرتی ئاڵمان بەڕێوەچوو، توانی پلەی یەکەم بە دەست بێنێ.
لەو یاریانەدا کە لە ئاستی جیهانیدا بەڕێوە دەچن و لە چەند کاناڵی بەناوبانگی جیهانیشدا بە شێوەی ڕاستەوخۆ بڵاو دەبنەوە، وڵاتانی ئاڵمان، فەڕانسا، هولەند، چین و سویس تێیدا بەشدار بوون.
لەو یاریانەدا ئاکام تەرەغە لە کێشی هەشتا کیلۆ و لەلایەن وڵاتی ئاڵمان و لە بەرانبەر کەسێکی هوڵەندیدا، کێ بەر کێی کرد و بەسەریدا سەرکەوت و شانازییەکی بۆ خۆی و کورد، تۆمار کرد.
ئاکام تەرەغە لە لێدوانێکدا بۆ “ڕۆژی کورد” خۆشحاڵی خۆی بە بۆنەی ئەو سەرکەوتنە بادس کرد و هەروەها وتی: بە ئاواتەوەم لە یارییەکانی داهاتوودا ئاڵای سەربەرزی کوردستان بەرز بکەمەوە.
ئاکام کە کوڕی شەهید “ڕەحمان تەرەغەیە” و بە هۆی زەختی ناوەندە ئەمنیەتییەکان ڕووی کردۆتەوە وڵاتی ئاڵمان، لە پرسیار لەمەڕ پلانی بۆ داهاتوو دەلێ: من بەردەوام دەبم لەسەر وەرزش و ئەنجام دانی یارییەکانم و هەموو یارییەکانیشم لە ژێر ئاڵای کوردستان و ئاڵامندا ئەنجام دەدەم.
