ڕۆژی کورد: مایک پێنس، یاریدەدەری سەرۆک کۆماری ئەمریکا، دۆناڵد ترامپ، ٧ی ڕەشەممەی ١٣٩٥ی هەتاوی، لە ناواخنی دانیشتنێک لە ناو “یەکیەتیی جوولەکە کۆماریخوازەکان” پێداگری کردەوە کە دەوڵەتی ئەمریکا بە ڕێبەریی ترامپ، هیچ کات ئیزن نادات ئێران بەرەو بەرهەمهێنانی کەستەی ناوکیی شەڕ، بچتە پێش.
مایک پێنس هەروەها گوتیشی: “ئێران بۆ ماوەیەکی زۆر دوورودرێژ، پارە و کەرستەی شەڕی بۆ هۆکارە تیرۆریستییەکانی سەر بە خۆی لە شوێنگەلێک وەک لوبنان، سوریە و غەزە، ناردووە”.
یاریدەدەری سەرۆک کۆماری ئەمریکا بە ئاماژە بە دەوڵەتی پێشووی ئەمریکا، “ڕێکەوتتنامەی نێوان ئێران و شەش ولاتی زلهێزی جیهانی” و ئەوەی کە ئەو بە “پەرەسەندنی سەرچاوەکانی ئێران لە ڕاستای هەوڵگەلی هەڕەشەئامێز” لە خۆرهەڵاتی ناویندا پێناسەی کردووە، گوتی: “ئیزن بدەن بە ڕوونی باسی بکەم، سەرۆک کۆمار ترامپ، هیچ کات ئیزن نادا تا ئێران چەکی ناوکی هەبێ و ئەوە بەڵێنیی بێ ئەملا و ئەولات ئێمە بە ئێوە و جیهانە”.
پێنس لە درێژەدا گوتی: “پێشتریش بە مەلاکانی ئێرانم گوتبوو کە چاوێک لە ڕۆژمێر بکەن، ئێستا سەرۆک کۆمارێکی نوێ لە کۆشکی سپی ـیە”.
مایک پێنس، پێشتریش، ڕێکەوتننامەی ناوکیی ئێرانی بە “ڕێکەوتننامەیەکی تۆقێنەر” پێناسە کردبوو کە دەوڵەتی دۆناڵد ترامپ “خەریکی هەڵسەنگاندنیەتی” و هۆشداریشی بە ئێران دا کە هیچ گومانێکیان لە جیدی بوونی سەرۆک کۆماری نوێی ئەمریکا نەبێ و دووپاتی کردەوە کە “بە مەلاکانی ئێرانمان گوتبوو کە چاوێک لە ڕۆژمێر بکەن، سەرۆک کۆمارێکی نوێ هاتۆتە کۆشکی سپی”.
