لە چیاکانی ئاگری لە کوردستانی باکوور شەڕ و پێکدادان لە نێوان گریلاکانی پارتی کرێکارانی کوردستان و هێزە داگیرکەرەکانی تورکیە هاتە ئاراوە و لە ئاکامی ئەو شەڕەدا ژاندارمێکی تورکیە کوژراوە و پێنجی تریش بە توندی بریندار بوون.
ڕۆژی کورد: بەپێ سەرچاوە هەواڵدەرییەکانی تورکیە، ڕۆژی شەمە ۱٤ی ئاپریلی ۲۰۱۸ی زایینی بەرانبەر لەگەڵ ۲۵ی خاکەلێوەی ۲۷۱۸ی کوردی، لە چیاکانی ئاگری لە دەوروبەری شارۆچکەی “بایەزیدی” سەر بە پارێزگای ئاگری لە کوردستانی باکوور لە نێوان گریلاکانی پارتی کرێکارانی کوردستان و هێزە چەکدارەکانی تورکیە شەڕ و پێکدادان هاتە ئاراوە.
ماڵپەڕ وهەواڵدەرییەکانی تورکیە ڕایانگەیاند، شەڕەکە چەند کاتژمێر درێژەی کێشاوە و لە ئاکامی ئەو شەڕ و پێکدادانەدا سەربازێکی تورکیە کوژراوە و پێنج سەربازی دیکە بریندرا بوون.
بەپێی ئەو هەواڵە، لەو شەڕەدا، گریلایەکی پارتی کرێکارانی کوردستانی باکووریش شەهید بووە.
تورکیە ڕاشیگەیاندووە، لە داهاتووێکی نزیکدا بە مەبەستی پاراستنی ناوچەکە هێزی سەربازی زۆرتر ڕەوانەی ئەو ناوچەیە دەکەین.
تا ئێستا سەرچاوەکانی سەر بە پارتی کرێکارانی کوردستان لەو بارەوە هیچ هەواڵ و لیدوانێکیان بڵاو نەکردووەتەوە.
ئەو شەڕ و تێکهەڵچوونە لە نێوان ئەرتەشی داگیرکەری تورک و گریلاکانی پارتی کرێکارانی کوردستان لە کاتێکدا هاتووەتە ئاراوە کە لە دوای شەڕی داگیرکارانەی عەفرین، هێزە داگیرکارەکانی تورک لە ناوچەی قەندیل و خواکورک، خاکی کوردستانی باشووریان بەزاندووە.
بەپێی هەواڵەکان، ئێستا هێزەکانی داگیرکەری تورک لە شەش ناوچەی کوردستانی باشوور وەک چیاکانی دەڤەری سیدەکان جێگیر کراون.
لە هەمان کاتدا، پارتی دێموکراتی کوردستانی باشووریش لە سەرەتای ساڵی ٢٧١٨ی کوردیدا، داوای لە پارتی کرێکارانی کوردستان کردبوو تا دەڤەرەکانی هەرێمی باشوور بەجێ بهێڵن.
لە هەمان کاتدا، گریلاکانی پارتی کرێکارانی کوردستانی باکوور، لەو ماوەیەدا بەپێی فەرمانی بەغدا و لە دوای هەڕەشەکانی ئانکارا، دەڤەری شنگال ـیان بەجێهێشت و ڕادەستی حەشدی تیرۆرستی شەعبیان کردووە. ئەوە لە کاتێکدایە کە لە نزیک بە سێ ساڵی ڕابردوودا، پارتی کرێکارانی کوردستانی باکوور، ئامادە نەبووە بەپێی داواکاریی هەرێمی کوردستانی باشوور، ئەو دەڤەرە چۆڵ بکات و کانتۆنێک و هێزێکیان بۆ شنگال بە ناوی ه.ف.ش دامەزراندبوو.
