ڕۆژی کورد: بەپێی هەواڵی تۆڕی میدیایی ڕووداو، ئەمڕۆ شەممە ٧ی ڕەشەممەی ١٣٩٥ی هەتاوی، لەکاتی رووماڵی رووداوەکانی شاری موسڵ، بەهۆی تەقینەوەی بۆمبێکی چێندراو، شیفا گەردی، رۆژنامەنووسی لێهاتووی رووداو شەهید بوو، وێنەگرەکەشی یونس مستەفا بریندار بوو.
شیفا گەردی لەو ناوچەیە شەهید بووە، کە چەند رۆژێکە لە بەری راستی موسڵدا کۆنتڕۆڵکراوەتەوە و لەوێدا بۆمبێکی چیندراوی بەجێماوی داعش پێیدا تەقیەوەتەوە.
شیفا گەردی، یەکێک بوو لە کادیرە هەرە چالاک و کاراکانی تۆڕی میدیایی رووداو، لە سەرەتای دامەزراندنی تەلەڤزیۆنی رووداوەوە، ئەستێرەیەکی دیاری شاشەی رووداو و میدیای کوردی بووە، جگە لەوە بەڕێوەبەڕێکی کارا و کاریگەری تۆڕی میدیایی رووداو بوو.
لە سەرەتای ئۆپەراسیۆنی موسڵدا، بەرنامەی تایبەتی بەو شەڕە بە ناوی فۆکس موسڵ هەبوو، بەشێوەیەکی مەیدانی وەک رۆژنامەوانێکی جەنگی لە میحوەرەکانی جەنگ ئامادە دەبوو و، راپۆرتی دەکرد.
ناوەندی ڕۆژی کورد، بەو بۆنە دڵتەزێنەوە، سەرەخۆشیی خۆی ئاراستەی سەرجەم کەس و کار و بنەماڵەی شیفا گەردی و هەروەها هاوڕێیان و هاوکارانی لە تۆری میدیایی ڕووداو دەکات و ئەو شەهیدبوونە بە کۆسپێکی دڵتەزێن بۆ میدیای کوردی بە گشتی دەزانێ و خۆی بە هاوبەشی گشت لایەک دەزانێت. ڕووحی شاد.
ژیاننامەی ڕۆژنامەنوس شەھید شیفا گەردی
شیفا زکری ئیبراهیم، ناسراو بە شیفا گەردی
– 1-7-1986 لە باژێڕی ئورمیە لە کوردستانی ڕۆژهەڵات لە دایک بووە.
– ساڵی 2006 پەیمانگای تەکنیکی بەشی کۆمپیوتەری تەواوکردووە.
– ساڵی 2013 بەشی ڕاگەیاندنی لە کۆلێژی ئەدەبیاتی زانکۆی سەلاحەدین تەواوکردووە.
–ساڵی 2007 تاوەکو ساڵی 2010 هاوکات لەگەڵ کاری ڕۆژنامەنووسی کاری مامۆستایەتی کردووە.
–ساڵی 2006 دەستی بە کاری ڕاگەیاندن کردووە.
– لە سەرەتای دامەزاردنی تۆڕی میدیایی ڕووداو، وەک ئەستێرەیەکی دیاری شاشەی ڕووداو دەرکەوتووە.
– بەڕێوەبەرایەتیی بەشی ئاوتپووتی ڕووداو بوو.
– لە سەرەتای دەستپێکردنی ئۆپەراسیۆنی موسڵ بەرنامەی فۆکەس موسڵی پێشکەش دەکرد. – بەشێوەیەکی مەیدانی وەک ڕۆژنامەوانێکی بەرەی شەڕ لە میحوەرەکانی شەڕ ئامادە دەبوو و ڕاپۆرتی دەکرد.
