ڕۆژی کورد :
سەر لە بەیانی ئەمڕۆ، پێنجشەممە ٢٤ی ئۆکتۆبر مامۆستا حەمید حاجی دەروێش، سکرتێری حیزبی پێشکەوتنخوازی کورد لە ڕۆژئاوای کوردستان لە تەمەنی ٨٣ ساڵیدا کۆچی دوایی کرد.
مامۆستا “عەبدۆلحەمید حاجی دەروێش”، ساڵی ١٩٣٦ی زایینی لە گوندێکی سەر بە پارێزگای حەسەکە لە ڕۆژئاوای کوردستان لە دایک بووە. لە ساڵی ١٩٥٣ی زایینی شاعیری ناودارێ کورد “جگەر خوێن”ی ناسیووە و کاریگەری زۆری لە سەر مامۆستا داناوە. لە ساڵی ١٩٥٧ی زایینی بە هاوکاری چەند هاوڕێیەکی یەکەم پارتی کوردی لە ڕۆژئاوای کوردستان بە ناوی “پارتی دێمۆکراتی کورد” دامەزراندووە و ماوەیەک وەک سەرۆکی ئەو پارتە کوردییە ماوەتەوە، لە کاتێکدا کە ڕژیمی سووریا ئەو کات بە توندی سەرکۆنەی هەموو جووڵانەوەیەکی سیاسی کوردی کردووە.
مامۆستا حەمید دەروێش ی وەکوو یەکێک لە سیاسەتمدارە دێرینەکانی ڕۆژئاوای کوردستان، دۆستی نزیک و خۆشەویستی مام جەلال تاڵەبانی بووە و زۆربەی سەرکردەکانی کوردی هەموو پارچەکانی کوردستانی ناسیووە. حەمید دەروێش دواتر لە ساڵی ١٩٦٢ی زایینی پارتی دێمۆکراتی پێشڤەڕۆی کوردی لە ڕۆژئاوای کوردستان دامەزراندووە و ڕۆڵێکی بەرچاوی نواندووە لە پێشخستنی دۆزی کورد لە ڕۆژئاوای کوردستان و هەموو کات داکۆکی لە مافی نەتەوەکەی خۆی کردووە و هەر بۆیەش چەندین جار دەسبەسەر و بەند کراوە. هاوکات مامۆستا حەمید حاجی دەروێش ساڵەکانی ١٩٩٠ هەتا ١٩٩٤ی زایینی ئەندام پاڕلەمانی وڵاتی سووریە بووە و چەندین جار بە هۆی وتارەکانی لە پاڕلەمانی سووریە، کەوتووەتە بەر ڕەخنە و توانجی توندی دەسەڵاتدارانی سووریە.
سەر لە بەیانی ڕۆژی پێنجشەممە ڕێکەوتی ٢٤ی ئۆکتۆبر ناوبراو بە هۆی نەخۆشی دڵ لە تەمەنی ٨٣ ساڵیدا لە شاری قامیشلوو کۆچی دوایی کرد و دڵە گەورەکەی بۆ خزمەت بە کوردایەتی و نەتەوەی کورد بۆ هەمیشە لە لێدان کەوت.
ناوەندی “ڕۆژی کورد” وەکوو ناوەندێکی سەربەخۆی ڕاگەیاندن بۆ خزمەت بە دۆزێ ڕەوای کورد لە هەموو پارچە کوردستانییەکان لە لایەن دەستەی بەڕێوەبەرایەنی و ئەندامان و ڕۆژنامەنووسانی ناوەندەکەوە، گەرمترین سەرەخۆشی خۆی ئاراستەی بنەماڵەی ناوبراو بە تایبەتی و گەلی کورد بە گشتی و ئەندامانی پارتی دێموکراتی پێشڤەڕۆی کورد لە ڕۆژئاوای کوردستان دەکات و خۆی بە هاوبەشی خەمی گەورەی لە دەست دانی ئەو تێکۆشەرە کوردە دەزانێت.
لە لایەن دەستەی بەڕێوەبەرایەتی ناوەندی “ڕۆژی کورد” – پاریس
