ڕۆژی کورد: بەپێی هەواڵی ماڵپەری ژینگەوان، ڕۆژی چوارشەممە، ڕێکەوتی ۲٦ی گەڵاڕێزان، لە زانکۆ پەیامی نووری مەریوان، سمینارێک لەژێر ناوی “منداڵانی کار”، بە دروشمی (من برسیم و لەسەر شەقام بەدوای مشتێ گەنم وێڵم)، بەڕێوەچوو.
گوتاربێژانی ئەم سمینارە پێکهاتبوو لە: دوکتۆر مەسعوود بینەندە و دوکتۆر فەرزاد حاجمیرزایی.
ئەم سمینارە کە لەلایەن خوێندکارانی زانکۆی ناوبراوەوە ڕێکخرابوو، بە سەرنجدان بە پەرەسەندن و بوونی ڕێژەی بەرچاوی منداڵانی کار لە ئێران و کوردستانی ڕۆژهەڵات و هەروەها بە ئاماژە کردن بە کێشەی هەرەگەورەی منداڵانی کار لە ئێران و بەتایبەت ڕۆژهەڵاتی کوردستان پێکهاتبوو و لاوازبوون و کەمتەرخەمیی دەسەڵاتی لەمبارەوە خستە ژێر ڕەخنە.
هەروەها گوتاربێژان لە بواری کۆمەڵناسی و فەلسەفە و دەروونناسییەوە، مافی منداڵانیان شیکردەوە و جەختیان لەسەر کردەوە.
سیستەمی پەروەردە و تەندروستیی ئێران لەو سمینارەدا بردرایە ژێر پرسیار و گوترا بەرنامەیێکی ئەوتۆی بۆ پەروەردە و پاراستنی منداڵانی کار نیە و ئەمە دەگەڕێتەوە بۆ کێشەی بنچینەیی دەسەڵات.
لەم سمینارەدا، کە کاتژمێر ۱۱ تا ١٣ی ئەو ڕۆژە درێژەی هەبوو، کلیپێک و ڕاپۆرتێکی دڵتەزێن لەسەر منداڵانی کار نمایش کرا و ئەو زامەی بە باشی و بە شێوەیەکی زەقتر خستە بەرچاو.
هەروەها لەلایەن نوێنەری ئەنجومەنە زانستییەکانی زانکۆوە، وتارێکی کورت لەسەر زوڵمی دەسەڵات و سەرمایەداری لە دژی منداڵانی کار، پێشکەش کرا.
