ڕۆژی کورد: ئەمڕۆ هەینی ١٦ی پووشپەڕی ١٣٩٥ی هەتاوی، دانیشتنی وڵاتانی گرووپی ٢٠ لە وڵاتی ئاڵمان بە لێدوانی ئانگێلا مێرکل دەستی پێکرد.
هاوکات لەگەڵ دەست پێکردنی ئەو دانیشتنانە، ڕێژەیەکی زۆر لە ناڕازییەکان لە ئاڵمان ڕێپێوانیان خستە ڕێ.
بەپێی هەواڵی هەواڵدەریی “شپیگێل”ـی ئاڵمانی، بە هۆی تێکهەڵچوون لە نێوان پۆلیس و ناڕازییان لە وڵاتی ئاڵمان، تا ئێستا ١٥٩ پۆلیس بریندار بوون.
زانیارییەکان هەروەها باس لە دەستبەسەرکرانی ٤٥ کەس لە ناڕازییان لە لایەن پۆلیسەوە دەکەن.
ئەم ناڕەزایەتییانە لە کاتژمێر ٧ی بەیانیی ئەمڕۆ بە کاتی ئوروپای ناوەندی دەستی پێکردووە و تا ئێستاش تا ڕادەیەک بەردەوامە.
ناڕازییەکان بە دژی دۆناڵد ترامپ و پاشگەزبوونەوەی لە رێکەوتننامەی ئاووهەوای پاریس، درووشمیان داوە.
ئەو ڕێپێوانە ناڕەزایەتییە لەسەر داوای ڕێبەرانی گرووپی بریکس ڕێکخراوە کە لە ڕاگەیێندراوەکەیاندا هاتووە “ڕێکەوتتنامەی ئاووهەوای پاریس، هیچ جێگای مشتومڕ و سازانی تێدا نیە”.
ئانگێلا مێرکل، لە لێدوانی ئەمڕۆی خۆی لە دەستپێکی کارەکانی دانیشتنی هاوبەشی وڵاتانی گرووپی ٢٠ گوتی: “ئێستا بە ملیۆنان کەس لە جیهان، چاویان لە وڵاتانی گرووپی ٢٠ بڕیوە تا کێشەکانیان بۆ چارەسەر بکەن”.
بڕیارە لە تەنیشت ئەم کۆبوونەوەیەدا، ترامپ و پوتین، پێکەوە چاوپێکەوتن بکەن.
هەروەها، ئاڵمان بە توندی نیگەرانی لێدوانی ڕەجەب تەیب ئەردۆغان، سەرۆک کۆماری تورکیەیە کە بڕیار وابووە بە نهێنی لە سفارەتی وڵاتەکەی لە ئاڵمان، لێدوان بۆ لایەنگرانی بدات و سی دی ـی ئەم لێدوانە لە ناو لایەنگرانیدا بڵاو بێتەوە، کارێک کە بە دژی یاساکانی وڵاتی ئاڵمانە.
