ڕۆژی کورد: دەستەی بەڕێوەبەرایەتی ئەنجومەنی ئاسۆی ڕوونی کوردستان-بانە، بە بۆنەی ڕووداوی مەرگی ٤ کۆڵبەری خەڵکی بانە، مهاباد و سەردەشت بە هۆی کەوتنە ژێر ڕنوو لە نزیک گوندی بێورانی سەردەشت، ڕاگەیێندراوێکی هاوخەمی بڵاو کردەوە و تێیدا بەرپرسانی کۆماری ئیسلامی لە کوردستان بە کەمتەرخەم و تاوانبار دەناسێنێ.
دەقی ڕاگەیێندراوەکە:
بەناوی بەرزەناوی بێ هاوتا
چەپ گەردی گەردوون،گەڕان کوشتمی
نەزان پەرەستی بۆ نان کوشتمی
هەر چەوسانەوەی ، بێ حەسانەوە
ئەی مردن لە کوێی؟ژیان کوشتمی
لە ڕۆژهەڵاتی کوردستان بەهۆی نەبوونی کار و پیشەسازی و کەمتەرخەمی بەرپرسان و تەرخان نەکردنی بڕە بوودجە بۆ هەلی ڕەخساندنی کار ، بەداخەوە کۆڵبەری وەکوو دیاردەیەک بۆ چینی چەوساوە و هەژار، بۆ بژێوی ژیانیان سەری هەڵداوە.
لە ڕۆژهەڵاتی کوردستان پیاوان لە تەمەنی ژێر بیست ساڵ تا دەگاتە حەفتا ساڵ، بۆ بژێوی ژیانی خۆیان ، بەداخەوە ڕوو دەکەنە کاری کۆڵبەری کە هەنووکەش ترس و دڵەڕاوکێ لەناو تاک بەتاکی ئەندامانی خێزانیان، وەکوو دڵەخوورپە، هەیە و هەر دەم لە ڕوودانی کارەسات دەترسێن.
بە داخێکی گرانەوە ڕۆژانە هەواڵی دڵتەزێنی لاوانی کوردستان بەتایبەت لە ناو کۆڵبەران دەبیستین ، ڕۆژ نییە کۆڵبەرێ بە گولله، کۆڵبەرێ بە خنکان، کۆڵبەرێ بە کەوتن و .. کۆڵبەرێ بە ڕنوو، گیان نەدەن!
هەواڵی پڕ لە ئازاری کۆڵبەران کە بۆ بژێوی ژیانیان چووبوون بۆ کۆڵ ، دڵی هەموومانی هێنایە ژان و ئێمەش بەو پەڕی دڵگەرانی و ناخۆشی و پەرۆشیەوە پرسە و سەرەو خۆشی خۆمان ئاراستەی بنەماڵەی قوربانیان دەکەیین و بەم بۆنەشەوە هاوخەمی خۆمان ڕادەگەیێنین و داوا لە خواوەندی مەنان دەکەین سەبووری باتە بنەماڵە و کەس و کاریان و هەروەها ڕوحی قوربانیان بە بەهەشتی بەرین شاد بکات.
هاووڵاتیان!
با بە بایەخ دان بە وەبەرهێنان و پێشەسازی، دەرفەتی کار بۆ هاووڵاتیانمان بڕەخسێنین و ڕکابەری وڵاتانی دراوسێ بکەیین.
دەستەی بەڕێوەبەرایەتی ئەنجومەنی ئاسۆی ڕوونی کوردستان بانە
