دوو بەرپرسی ئامریکایی بە هەواڵدەری NBC یان گوت: بەرپرسانی ئیسڕائیلی پێش ئەوەی کە ئەو هێرشە ئاسمانییە بکەنە سەر بنکەی سەرەکی هێزی ئاسمانی سووریە بەرپرسانی ئامریکایان لێ ئاگادار کردبووەوە.
ڕۆژی کورد: بەرپرسانی ئیسڕائیلی هەتا ئێستا بەرپرسایەتی ئەو هێرشەی کە کرایە لەسەر بنکەی T-4ی سووریەیی کە لەوێدا ۱۴ کەس لە سەربازانی سووریە و هاوپەیمانانی کوژران وەئەستۆ نەگرتووە.
وەزارەتی بەرگری ڕووسیە گوتی کە دوو باڵەفڕی شەڕکەری ئیسڕائیلی ئەو بنکە سەربازیەیان نیشانە گرتووە و ٨ موشەکیان پێوەناوە. هەروەها گوتی کە پەدافەندی بەرگری ئەو بنکەیە ۵ لە موشەکەکانیان لەنێوبردووە و ۳ی دیکەش لەبەشی ڕۆژئاوایی بنکە وەعەرز کەوتوون.
پێشتریش لە چەند مانگی ڕابردوودا ئیسڕائیل هەمان بنکەیی T-4یان بۆردوومان کردووە، دواتر ڕایگەیاند کە فڕۆکەیەکی بێفڕۆکەوانی ئێرانی کە سنووری ئیسڕائیلی بەزاندووە لەو بنکەیەوە فڕیووە. ئەم بنکەیە هەر لە تەنیشت بنکەی ئاسمانی شەعیڕاتەوەیە کە بۆ شەڕدژی داعش بەکارهێنراوە بە وتەی خۆیان، بنکەی شەعیڕات پێشتر و لەدوای هێرشە کیمیاییەکەی سووریە بۆ سەر خەڵکی بێتاوانی سووری کەوتە بەر پەلاماری ئاسمانی ئامریکا.
هێرشی مووشەکی ڕۆژی دووشەممە لە کاتێکدایە کە دۆناڵد تڕامپ سەرۆک کۆماری ئامریکا هەڕەشەی کردبوو کە لە دوای هێرشی کیمیایی سووریە بۆ سەر دژبەرەکانی لە بەشی ڕۆژهەڵاتی شاری دیمەشق ئەنجامی داوە تاوانێکی قورس دەداتەوە.
چالاکانی دژبەر و تیمەکانی فریاکەوتن گوتوویانە: لانیکەم ۷۰کەس کوژراو لەو هێرشە کیمیاییەدا دۆزراونەتەوە کە لەنێو خانوو و حەشارگەکاندا خۆیان حەشارداوە.
