پێش ئەوەی ڕاستەوخۆ لێکەوتەکان و ئامانجەکانی کوشتنی ” ئیسماعیل هەنییە ” بخەینە بەرباس و لێکۆڵینەوە ، پێویستە ئاماژە بە هەندێک یاسای نەنووسراوی ستراتیژیی سیاسیی وڵاتانی دژبەر و دوژمنی یەک بکەین ، ئەویش پاراستنی بەرژەوەندیی هاوبەشە سەرەڕای نەیاربوونیان ، واتە زۆرجار لایەنی سێیەم دەکرێت بکرێتە قوربانی لە پێناوبەرژەوەندیی هەردووک وڵاتی دژبەردا .
لەوەها دیاردەیەکدا بەرژەوەندییە دەرەوەسنووریەکان ڕۆڵ دەگێڕن بە دوور لە سنوورەکانی ناوخۆیی وڵات ، چونکە لە ئەگەری جێبەجێکردنی وەها دیاردەیەکی کرداریدا لە وێنەی کوشتنی ” ئیسماعیل هەنییە ” لە ناوجەرگەی تاران کە بە هێزی تایبەتیی هەوڵگریی و تەکنەلۆژیایی سەبازیی سەردەم پاریزگاری لێدەکرێت ، ئابڕووچوونێکی مێژوییە کە دەتوانێت تا دەیانساڵیش هەیکەلی دەزگای هەواڵگریی و ئیتلاعاتی ئێران بخاتە گێژاوێکی نائەمنیی ناوخۆیی و دەرەکی ، کە وابوو ئەو بۆچوونانەی کە پێیان وایە ئێران دەستی لە کوشتنی ” ئیسماعیل هەنییە ” دا هەبووە ئەویش لەناو جەرگەی تاراندا ، دوورە لە ڕاستی .
گریمان ئەگەر لە نێوان ئەمریکا و ئێرانیشدا ئەو ساز و سەودایە هاتبێتە ئاراوە لە دانووستانە نهێنییەکانیدا لە قەتەر و چەند وڵاتێکیتر بۆ فرۆشتنی “ئیسماعیل هەنییە” لە پێناو بەرژەوەندپارێزیی دۆسییەی ئەتۆمیی ئێراندا ، دەکرا لە دەرەوە سنووریدا ئاڵ و گۆڕی زانیاریی و هەواڵگری کرابا.
بەڵام ئەوەی جێگەی تێڕامانە هۆکاری کوشتنی ئیسماعیل هەنییە لەم کات و ساتەدا چی ئامانجێک دەپێکێت بۆ ئیسرائیل؟
ئەو هۆکارەی کە زۆربەمان بیرمان لێکردۆتەوە ، زەربەلێدانە لە هەیمەنەی ئیتلاعاتیی ئێران و هێزەکانی پاراستنی دەزگای رێبەریی باڵای ئێران ، بەڵام ئەگەر بمانەوێت بیر لە ئامانجە سەرەکییەکە بکەینەوە پێویستە ئاوڕدانەوەیەکمان هەبێت لە لێکەوتەکانی دوای هێرشی حەماس بۆ سەر ئیسرائیل لە حەوتی ئۆکتۆبەردا بەرابەر بە پازدەی ڕەزبەری 1402ی هەتاوی .
لە دوای ئەو هێرشەو کاردانەوەی ئیسرائیل، بە پێچەوانەی زۆربەی بۆچوونەکان کە ئەوکاتیش لە شرۆڤەیەکدا ئاماژەم پێکرد ، ئێران هۆکاری پەرەئەستاندنی زیاتری ئەو جەنگەبوو لە رۆژهەڵاتی ناوەڕاستدا بە پشتبەستن بە رێککەوتنەکانی جەمسەربەندیی نوێی جیهانی یان بڵێم نوێبوونەوەی جەمسەربەندییەکان و ڕێگری لە کۆریدۆری ئابووریی ئەمریکا لە عێراقدا کە خۆی دەگەێنێتەوە دەریای سپیی ناوەڕاست بەناو خاکی کوردستاندا.
بەڵام لە درێژماوەدا کاتێک حەماس و تایبەت “ئیسماعیل هەنییە “لە لایەن خەڵکی فەلەستین و تایبەت غەزە گوشاریان خرایە سەر بۆ ڕێگریکردن لە جەنگێکی نابەرژەوەندیی و نابەرابەریی هێز، ئیسماعیل هەنییە بیری لە رێککەوتن و ڕاگرتنی جەنگ دەکردەوە کە بێگومان پێچەوانەی مانگەکانی سەرەتایی، ئێرانیش تا ڕادەیەک ناچار و هاوڕا بوو بۆ دانووستان ، بەڵام ئەمجار ئیسرائیل ڕازی نەبوو بەم دانووستانە بەپێچەوانەی ڕواڵەتیی سیاسەتیی خۆی لە گەڵ کۆمەڵگەی نێودەوڵەتی ، بۆیەش وێڕای داسەپاندنی هێژموونیی هەواڵگریی و سەربازیی خۆی بەسەرئێراندا رێک لە بنانگویی “خامنەیی “ئیسماعیل هەنیەی لەناوبرد ، ئەویش بۆ یەک ئامانجی دیاریکراو کە تائێستا لێکۆلەران ئاماژەیان پێنەداوە .
ئەو ئامانجەی ئیسرائیل بریتییە لە هێنانەکایەی دوایین کارتی گوشاری ئێران لە رێگەی هێزەبەکرێگیراوو پرۆکسییەکانی خۆیەوە لە سنوورەکانی ئیسرائیل کە بێگومان لە دوای حەماس ” حزبوڵلای لوبنانە ” چونکە ئیسرائیل بە پێی مێژووی ڕابردووی خۆی هەرجەنگێک بێتە ئاراوە ، تا یەکلای نەکاتەوە دەست هەڵناگرێت ، یەکلاکردنەوەی ئەو جەنگەش بە سڕکردنی حەماس و لێدانی جڕوپڕی حزبووڵڵای لوبنان یەکلا دەکرێتەوە کە بێگومان لەم ڕاونگەوە بەرژەوەندیی فەڕەنساش لە لوبناندا پارێزراوتر دەمێنێتەوە ، پێویستیشە بیرتان بێنمەوە ئیمانۆئێل ماکرۆنی سەرۆکی فەڕەنسا لە چەند مانگی ڕابردوودا ، هەڕەشەی لە ئێران کرد لە هەمبەر دەستوەردانەکانی لە لوبناندا .
هاوکات ئیسرائیل بە پەرە پێدانی جەنگەکە وڵاتانی پشتیوانی ئێران وەک جەمسەری شەرقی تاقیدەکاتەوە و بەریتانیا و ئەمریکاش ناچاردەکات لە هەر هێرشێکدا بۆ سەر ئیسرائیل کاردانەوەی سەربازییان هەبێت لە پێناو بەردەوامیی پەیمانی سەدەی نێوان ئیسرائیل و عەرەب کە گرێدراوی بەرژەوەندپارێزیی ئابووری هەردووک وڵاتی زلهێزە لە ناوچە و جیهاندا .
