خیانەت لە گۆڕستانەكەی مەهاباددا/ڕەسووڵ سوڵتانی

0
1581
خه‌ڵك : كێل و به‌ردی ئه‌دیبان و هونه‌رمه‌ندانمان له‌ جێی خۆی دابنێنه‌وه‌
ڕەسووڵ سوڵتانی
ڕەسووڵ سوڵتانی

نووسەر: رەسووڵ سوڵتانی

ئەگەر گۆڕستانی شاعیرانی مەهاباد لە زێڕیش دروست بكەنەوە ئێوە هەر خەیانەتكارن
هیچ زۆری لەسەر ناڕۆم:
هێمن لە پێشەكییەكەی تاریك و روون ـدا “لە كوێوە بۆ كوێ” دەڵێ:

شاعیری هیچ قازانجی بۆ من نەبووبێ ئەو قازانجەی هەبووە كە ئەو ناوە دوورودرێژەی “سەید محەمەد ئەمینی شێخەلئیسلامیی موكری”ی لەكۆڵ كردوومەتەوە…

لەو سەداسەدەی ناوی هێمنیان بیستووە، رەنگە سەدا پەنجایان ئەو ناوەی شاعیریان بیستبێ كە لە ناسنامەكەیدا هاتووە و هێمنیش شوكرانەبژێری شاعیرێتییەكەی خۆیەتی چونكە لەكۆڵی كردووەتەوە، بەڵام هەر سەداسەدەكە بە هێمن دەیناسن و دەزانن هێمن كۆڵەكەیەكە لە شانازییەكانی ئەو میللەتە…
بەڵام
ئێوە كە لەو هەستەی خەڵك ترساون، هاتوون ئەو ناوەی هێمن و خەڵكیش شانازیی پێوە دەكەن بە پیتیێكی ورد نووسیوەتەوە و، ئەو ناوەی هێمن لێی بێزار بووە و خەڵكیش زۆرینەی لێی ئاگادار نەبوون و نایناسن، بە خەتێكی گەورەتان نووسیوە و هێمنەكەتان وا لە بنیدا شاردووەتەوە كەس پێی نەخوێنرێتەوە.

دەزانی بۆ وایان پێكردوون: چونكە ئاغاكانتان دەزانن كورد هێمن دەناسن نەك سەی حەمەدەمین شێخولئیسلامی موكری. هێمن بووەتە بەشێك لە یادگەی كورد و لە چوارپارچەی كوردستان هەزاران منداڵی بەناو كراوە و ئاغاكانتان لەو نازناوەی تۆقیون. ئێوەش حەز ناكەن ئاغاكانتان تەنیا لەسەر ناوێكی وا دڵەڕاوكێیان هەبێ.

وەك ئەوە وایە، بچی بە بیانووی نوێكردنەوەی ئارامگەی خەیام لە كێلەكەی ئیتر ناوە بنەماڵەییەكەی واتە (غیاث‌الدین ابوالفتح عُمَر بن ابراهیم خَیّام) بنووسیتەوە و خەیامێكیش بەوردی و ناچاری لە بنەوە یان لە سەر كێلەكەی حافزی شیرازی ناوەكەی خۆی (خواجه شمس‌الدین محمد شیرازی) بە خەتێكی گەورە و پان بنووسیتەوە و، حافزەكەی بەحاستەم و دووبەڵا بنووسی وابێ كەس هەستیشی پێ نەكا..

ئەم خیانەتەتان بسڕنەوە، چاكی بكەن. هێمنەكە گەورە بكەنەوەو بیخەنەوە سەرێ، ئەگەر ئیتلاعات وای بۆ دانەڕشتوون…

2

ئەو بەڵایەیان بەسەر هەموو كێلەكان هێناوە. ئاخر گەڵاڵەداڕێژەرانی ئەو پیلانە باش ئاگادار بوون كە ئەم شیعرانە چ كاریگەرییەكیان لەسەر زیارەتكەرانیان دەبێ. كۆماری ئیسلامی بە ئازادی و ئاشكرایی نەیویستووە ئەو كێل و مەزارانە تێك بدات و كاریگەرییەكەیان نەهێڵێت، ئاخر بەشی هەرە زۆری بەرنامەی ئاسمیلەكردنی كورد لە رۆژهەڵاتی كوردستان بە خشكەیی و بە جەنگێكی نەرم دەكرێ. سادەترین پێناسەی جەنگی نەرم ئەوەیە لە بن پەردەی خزمەتدا بەرانبەرەكەت بفەوتێنی، ئەوەی كورد پێی دەڵێ: بە لۆكەسەربڕین و بە دۆشاوخنكاندن…

بەش بەحاڵی خۆم پێم ناخۆشە هێندێ كەسی خۆشناو و ناودیار كە ساڵانێكە خزمەتی ئەدەب و زمانی میللەتەكەیان دەكەن و لە سۆنگەی قەڵەمە ئازا و خاوێنەكەیانەوە كەسایەتی و ناو و پێگەیەكیان بۆخۆیان دروست كردووە، ئێستا كەوتوونەتە داوێكەوە كە ئیتلاعات بۆی ناونەتەوە. تۆ بڵێی بۆیان گرینگ نەبێ ئەو شەخسیەت و پێگە كۆمەڵایەتییەی ساڵانێكە بە نووكی قەڵەم و بە كوێرەوەری دروستیان كردووە، ئێستا بیكەن بە قوربانی ئافەرینێكی دوژمنانی گەل؟ كورد دەمێكە دەڵێ:

ئەوەی مێروولە كردی بە ساڵێ…. حوشتر رایماڵی هەر بە قەپاڵێ…

ئاخر بەڕێزان:

من دڵنیام پڕۆژەكەیان لە پێش چاوتان زۆر گەورە و رازاوە كردووەتەوە و، ئێوەی ئەدیبی خۆبەئاقڵزانی خەڵك بەكەمگریان وا تێگەیاندووە كە بەڵێ ئەوەی ئێمە دەیكەین شتێكی مۆدێڕنە و بەو قسە چەورانە قایلیان كردوون بەوە وێڕای رازیبوونتان هەم دیفاع لەو پڕۆژەیە بكەن و هەمیش خەڵك هێور بكەنەوە نەكا دژكردەوەیەك بنوێنن.

ئەم پاساوە منداڵانە و گەوج خەڵەتێنەتان دووبارە مەكەنەوە كە ئێمە هاتووین هێمای مەرگمان لە گۆڕستانەكە سڕیوەتەوە؟ كام هێمای مەرگ؟ ئەی بۆ بیر لەوە ناكەنەوە، لەو كارەتاندا لەبری سڕینەوەی هێمای مەرگ، هاتوون پەیامە نەمرەكانی ئەوانتان مراندووە. ئەوەی دەچووە سەر ئەو گۆڕانە، نەدەچوو مەرگی وەبیر بێتەوە و تۆبە لە گوناحەكانی بكات، بەڵكو كە دەگەیشتنە ئەوێ، لە دووتوێی ئەو دێڕە شێعرانەدا گوێیان لە دەنگی هەژار و هێمن دەبوو. ئەوان لە شیعرەكەی هێمندا گوێیان لە هاواری یەكسانیخوازانە و مرۆدۆستانەی هێمن و شینگێڕییەكەی بۆ شەهیدان دەبوو و قسەكەی هێمنیان دەكردە ئاڵقەی گوێچكەیان و ئامادەی ئەو رۆژە دەبوون لەسەر گۆڕەكەی هێمن رەشبەڵەكی ئازادی بگرن. ئەوان گوێیان لە دەنگە گڕ و نێرەكەی هەژار دەبوو، كە تۆوی هیوای رزگاریی لەدڵدا دەچاندن و، چاوەڕوانییەكەی هەژاریان لە نێو شیعرەكەیدا بەدی دەكرد، كە هەروا چاوەڕێیە ئەو رۆژە بێ كیژ و كوڕ پێیەك بە گۆڕەكەیدا بدەن.

ئێوە، بە بیانووی سڕینەوەی هێمای مەرگ، هەموو ئەو هاوار و پەیامانەتان كوشتووە…

بۆ ئەوەی كەفاراتی ئەو گوناحە كەبیرەیەتان بدەنەوە، تا زووە لەو دیزاینە تازەیەدا ئەو شیعرانە بگونجێننەوە…

درێژەی دەبێ…

سه‌رنج و كۆمێنت

كۆمێنت