باباعەلی مێهرپەروەر: دەسکەوتەکانی خەباتی چەکداری بەستراوەتەوە بەو تێچوویە کە حیزب لەو بوارەدا دەیدا

0
969

خەباتی چەکداری لە کوردستانی خۆرهەڵات لە ئارا دایە، شەڕ لە چەندین ناوچەی وەک شنۆ، ڕەبەت، مهاباد، پاوە، بانە و مەریوان و سەقز کراوە، ڕژیم گورزێکی گەورەی لێکەوتووە و دەگوترێ زیاتر لە ١٧٠ کوژراو و برینداری هەیە، لە لایەکی تریشەوە بەشێک لە چالاکانی سیاسی و مەدەنی و سەرجەم ڕیفۆرمخوازەکانی ناوخۆ و میدیای فارس و ئۆپۆزیسیۆنی فارس  بە گشتی دژ بە خەباتی چەکداری دەدوێن و بە کاولکاریی ماڵی خەڵک و ڕژانی خوێنی دەزانن و دەڵێن دەستکەوتی نابێ.

بۆ تاووتوێ کردنی ئەو باسە، وتووێژێکمان لەگەڵ ڕێزدار باباعەلی میهرپەروەر، سیاسەتوانی ناسراوی کورد، ئەنجام داوە کە لێرەدا دەخرێتە ڕوو.

ڕۆژی کورد: حدکا لە دووساڵی ڕابردووە سیاسەتێکی نوێی گەڵاڵە کردووە، کاراکتێرە سیاسیەکانی ئەو حیزبە ڕایانگەیاندووە پشتگیری خەباتی مەدەنی دەکەن و هاوسەنگەری شەقامیان لە بەرانبەر پێشێلکارییەکانی مافی مرۆڤ لە خۆرهەڵاتی کوردستان بە تەنیا ناهێڵنەوە و بۆ ئەم مەبەستەش جووڵەیان بەهێزی پێشمەرگەیان کردووە، بەچەشنێک وەک ڕاگەیەنە گشتیەکان باس دەکەن چالاکیە سیاسی-تەشکیلاتیەکانی ئەو حیزبە لە ئاستێکی بەریندا لە ناوخۆی خۆرهەڵاتی کوردستان درێژەی هەیە و ئەمەش دژکردەوەی هێزە ئەمنیەتی و نیزامیەکانی دەسەڵاتی ئێرانی بەشوێنەوە بووە. بەگشتی ڕوانینتان لەو بوارەوە چیە؟

بابا عەلی مێهرپەروەر
بابا عەلی مێهرپەروەر

 میهرپەروەر: هەر حیزب و ڕێکخراوێکی سیاسی مافی خۆیەتی کە بە هەڵسەنگاندن و تاووتوێکردنی هەلومەرج وبارودۆخی ناوچەی تێکۆشانی خۆی بەرنامەی تایبەت دابنێت و بەڕێوەی بەرێت. کۆماری ئیسلامی هیچکات ئامادە نەبووە ڕێگە بە چالاکی ئاشکرای سیاسی بە حیزبە سیاسیەکانی ڕۆژهەڵاتی کوردستان بدات. تەنانەت مەیدانی تێکۆشان و چالاکی ڕێکخراوە مەدەنیەکانیشی لە نێوخۆی وڵات بەرتەسک کردۆتەوە و بەبیانووی جۆراوجۆر کۆسپ ‌و تەگەرە دەخاتە بەردەمیان و زۆر لە چالاکوانەکانیش ڕەوانەی بەندیخانە دەکا. کاتێک ڕژیم چالاکی ڕێکخراوە مەدەنیەکان تەحەموڵ نەکات، بێگومان لە بەرانبەر چالاکی سیاسیی پێشمەرگەکانی حیزب لە نێو خۆی وڵات هەرچەند بەرنامەی شەڕی چەکداریشیان نەبێت کە دیارە نیشیانە، تەحەمول ناکات و هێرش دەکاتە سەریان. وەک ئەو نموونانەی کە لە چەند ڕۆژی رابردوودا روویاندا. بە بڕوای من تێکۆشان لە نێوخۆی وڵات  بەشێوەی بەرگریی چەکدارانە چ حیزب بیهەوێ یان نەیهەوێ شەڕی لێدەکەوێتەوە. ئایا حیزب  ئامادەیە بۆ شەڕی چەکداری لەگەڵ ڕژیم لەهەلومەرجی ئیستادا هەیە یان نا، پرسیارێکە کە دەبێت حیزب وڵامی بداتەوە.

ڕۆژی کورد: پێویست بوونی بەرگریی چەکداری هەنووکەیی لە خۆرهەڵاتی کوردستان چۆن هەڵدەسەنگێنن؟

میهرپەوەر: حیزبی دیموکراتی کوردستانی ئێران دەڵێ مادام کۆماری ئیسلامی ڕێگە بەچالاکی سیاسی و مەدەنی هەڵسووڕاوانی ئەو حیزبە بەشێوەی ئاشکرا لە ڕۆژهەڵاتی کوردستان نادات، ناچارین بۆ بەرگری لەخۆ بەشێوەی چەکداری چالاکی بنوێنین بەڵام هەروەک لە وڵامی پرسیاری یەکەمدا باسم کرد ئەو جەولە چەکدارانە دەرگیری سەربازی لێدەکەوێتەوە. هەڵسەنگاندنەکانی حیزب لەو بوارەدا چەند ورد و واقعبینانە بووە، چەندە بەستێنی وەها چالاکیەکیان ڕەخساندوە، بێگومان کاریگەری لەسەر ئاکام و دەرئەنجامی ئەو جموجۆڵانە دا دەنێت.

   ڕۆژی کورد: هۆکار، بەستێن ودەسکەوتەکانی شێوازی بەرگریی چەکدارانە دەتوانێت چی بێت؟

  میهرپەروەر: زۆر جار و لەلایەن زۆر کەسەوە لەجیاتی دەستەواژەی بەرگریی چەکدارانە، دەستەواژەی شەڕی چەکداری بەکار دەبرێت. ئەوەی کە لە ئیستادا لە نێوخۆی وڵات لە ئارادایە، شەڕی چەکداری نیە، هەرچەند ڕژیم حیسابی شەڕی چەکداری بۆ دەکات و هەر بەو بیانوویەشەیە کە هەوڵدەدا بەتوندترین شێوە لەگەڵ ئێمە تەشکیلاتییەکان بەرەو بێتەوە کە هەم تێچووی مرۆیی بۆ حیزب قورس بکات و هەم خەڵکەکەش چاوترسێن  و تێچووی هاوکاریان لەگەڵ پێشمەرگەکان سەنگینتر بکات. هۆکاری سەرەکی بڕیاری حیزب لەو بوارەدا ڕزگار بوون لە چەقبەستوویی کەمپ نشینی و چالاک بوون لە نێوخۆی وڵات و لە نێو جەرگەی خەڵکی ڕۆژهەڵاتی کوردستانە. بە بڕوای من دەسکەوتەکانی بەستراوەتەوە بەو تێچوویە کە حیزب لەو بوارەدا دەیدا. ئەگەر حیزب نایهەوێ یان ئامادەیی بۆ شەڕی چەکداری نیە، نابێت بەرنامەش بۆ بەرگریی چەکداری دابنێت، کاتێک دەڵێین بەرگری واتا بە مانای توانای بەرگریشە چوونکوو وەک فارسان دەڵێن: ”شتر سواری دولادولا ندارد” ئەگەر حیزبیش نەیهەوێت ڕژیم شەڕی بەسەردا دەسەپێنێت، کەوابوو بۆ ئەو حاڵەتە دەبێت لە هەموو بوارێکەوە ئامادەیی هەبێت چ سیاسی، چ لوجستیکی و چ هەماهەنگی لەگەڵ هێزە سیاسییەکانی دیکەی ڕۆژهەڵاتی کوردستان و…هتد.

   ڕۆژی کورد: ئاوێتەکردنەوەی بەرگریی چەکداری و خەباتی مەدەنی ئاراستە کردەیەکانی چۆن پێناسە دەکەن؟

   مێهرپەروەر: ئەگەر بارودۆخ بۆ خەباتی مەدەنی گونجاو بێت چ باشتر کە بەو شێوەیە خەباتە پەرە بدرێت. لەڕاستیدا چالاکیی بەرگری چەکدارانە لە ڕوانگەی ئەو ڕێکخراوانە کە وەها بەرنامەیەک بەڕێوە دەبەن، وڵامێکە بۆ بەڕێوە نەچوونی خەباتی مەدەنی یان پشتیوانێکە بۆ خەباتی مەدەنی.

ڕۆژی کورد: شێوازی بەرگریی چەکداری دەخوازێ هەموو لایەنە سیاسیەکانی ڕۆژهەڵاتی کوردستان بەهاوئاهەنگی یەکتر ئەرکە نیشتمانیەکانیان بەڕێوە بەرن، پێتان وایە ئەقلیەتی کردەیی بۆ بەڕێوەچوونی ئەرکێکی شیاو چەندە ئیمکانی کرداری هەیە؟

مێهرپەروەر: بە بڕوای من ئەگەر ڕێکخراوە سیاسیەکانی ڕۆژهەڵاتی کوردستان بیانتوانیبایە خۆیان لە چنگ ئەو پرشوبڵاوی و پەرتەوازەییە ڕزگار بکردایە چ بە یەکگرتنەوە لە یەک دوو حیزبدا چ بە پێکهێنانی بەرەیەکی یەکگرتوو، دەیتوانی کاریگەرییەکی ئەرێنی یەکجار گەورەی لە‌‌سەر ورەی خۆڕاگری و بەرنگار بوونەوەی خەڵکی ڕۆژهەڵاتی کوردستان لە ئاست ڕژیمی دژ بە کوردی  کۆماری ئیسلامی، دانابایە. ئێستا گەلی کورد لە ڕۆژهەڵاتی کوردستان لە ڕاستیدا لەو هەموو پرشوبڵاوی و پەرتەوازەییە تووڕە و بێزارن و دیارە ڕژیمیش ئەو پەڕی سوود لەو بارودۆخە وەردەگرێت و هەموو هەوڵی خۆی دەخاتە گەر بۆ ئەوەی  کەلێنی نێوان هێزە سیاسیەکانی ڕۆژهەڵاتی کوردستان بەرینتر بکاتەوە. مخابن بەستێنەش لەوبارەوە پتر ئامادەیە. گومانی تێدا نیە کە ئاستی هاوئاهەنگیش بەهۆی ئەو بارودۆخە بەداخەوە نزم و بەڕادەی پێویست نیە. دەرەنجامی وەها حاڵەتێکیش زیان بە تێکۆشان لە نێوخۆی وڵات دەگەیەنێت. بۆیە ناچارین بڵێین کە بەڕێوەچوونی ئەرکێکی شیاوی نیشتمانی بە هاوئاهەنگی لەگەڵ یەکتر ئەگەر نەڵێین مەحاڵە دەبێ بڵێین لە ئاستێکی زۆر نزمدایە و ئەوە دەردێکی کوشەندەیە.

ڕۆژی کورد: هێزە نیشتمانیەکانی ڕۆژهەڵاتی کوردستان لە هاوئاهەنگێکی شیاودا کە ئاماژەمان پێکرد دەتوانن ئەو ئەزموونە بۆ دواڕۆژی دەسەڵاتی سیاسیش بەکار بێنن؟

مێهرپەروەر: بێگومان هاوئاهەنگی و تەبایی هەوێنی هەر سەرکەوتنێکە چ لە ئێستا و چ لە داهاتوو و دواڕۆژدا. سەرچاوەی هەماهەنگیش هەست کردن بە بەرپرسایەتی و لە ئەولەویەت دانانی بەرژەوەندیی نەتەوەیی لە سەرەوەی بەرژەوەندیی  تەسکی حیزبی و کەسییە. بوونی هەماهەنگی  بەمانای یەکگرتنەوە و وەسەر یەک خستنی حیزبەکان لەیەک یان دووحیزبدا نیە، بەڵکوو وەسەر یەک خستنی ئامانجەکان،  تاکتیکە ستراتیژیەکان، جیا کردنەوەی حیسابی ململانێی حیزبی و لە ئەولەویەت دانانی بەرژەوەندییە نەتەوەییەکانە. پلۆرالیسمی سیاسی  و ململانێی حیزبی دەبێت لە خزمەت بەرژەوەندیی گشتیی و بۆ بەرەو پێشبردنی ئامانجەکانی گەل بێت. ئەگەر بەڕاستی و دوور لە درووشم، ڕێکخراوە سیاسیەکانی ڕۆژهەڵاتی کوردستان بە مانای ڕاستەقینە دیموکرات بوایەتن و ڕێزیان لە خەبات و تێکۆشانی بەرانبەریان بگرتایە و وەک تەواوکەری خەباتی یەکتر چاویان لێبکردایە، ئەوکات ئەو ئەقلیەتە دەیتوانی ببێتە مایەی سەرکەوتنی یەک لە دوای یەک. بەڵام دەبێت بۆ وەها بارودۆخێک ئاوات بخوازین.

سه‌رنج و كۆمێنت

كۆمێنت