وریا ساڵحزادە: ئێمە لەگەڵ دروستبوونی بەرەیەکی کوردستانین

0
760

بۆچی لە پاش 37 ساڵ دەسەڵاتداریی کۆماری ئیسلامی ئێران، پارت و لایەنە سیاسییەکانی رۆژهەڵاتی کوردستان، هەوڵ نادەن هێز و توانای سیاسی و نیزامی خۆیان لە چوارچێوەی بەرەیەکی سیاسی یەکگرتوودا بەکار بێنن؟ لەمپەرەکانی بەردەم پێکنەهاتنی ئەو بەرە یان هاودەنگییە سیاسییە چییە؟ چۆن دەکرێ لایەنە سیاسییەکان لە دەوری یەک پلاتفۆرمی هاوبەش کۆ ببنەوە و خەباتێکی هاوبەشی سیاسی و نیزامی لەدژی کۆماری ئیسلامی بکەن؟
ماڵپەڕی رۆژی کورد لە پێناو لێک نزیککردنەوەی هێز و لایەنەکان و لێک تێگەیشتنیان لەسەر پرس و بابەتی پەیوەندیدار بە پێکهێنانی بەرەیەکی کوردستان ئەم دۆسیەی کردۆتەوە و ڕای ئەندامانی رێبەریی حیزبەکان و هەروەها کەسایەتییە سیاسییەکانی رۆژهەڵات و شرۆڤەکارانی سیاسی وەرگرتووە.
بەرێز وریا ساڵحزادە جێگری سەرۆکی گشتیی پارتی سەربەستیی کوردستان وەڵامی پرسیارەکانی رۆژی کورد دەداتەوە.

وریا ساڵحزادە: ئێمە لەگەڵ دروستبوونی بەرەیەکی کوردستانین

 گرینگیی پێكهاتنی به‌ره‌ی كوردستانی بۆ كوردستانی ڕۆژهه‌ڵات له‌ چی دایه‌ و زه‌رووره‌ته‌كانی پێكهێنانی ئه‌م به‌ره‌یه‌ چین؟
ئێستا پێگەو دەنگ و ناوی کورد لە ئاست جیهاندا لەو پەری بەرزی دایە، هەر وەک رۆڵی کورد لە باشوری کوردستان، لە رۆژئاوای کوردستان، هەروەها کێشەی کورد لە باکور، ئەمانە هەموو بوونەتە سەرتیتل و سەردێری رۆژنامەو ڕاگەیاندنەکانی جیهانی. بێگومان بۆ هەر ئاڵوگۆرێکی پێشهاتووی دوا رۆژی ئێرانیش ئەو چاوەروانییە لەگەلی کورد دەکرێت، کە بە ڕێک و پێکی و بەرنامەوە ئیدارەی بەرێوەبەری ڕۆژهەڵاتی کوردستان بکەن.
بۆ هەر ئەگەرێکی دوارۆژ لە رۆژهەڵاتی کوردستان و ئێران زۆر زەرورە کە بەرەی رۆژهەڵاتی کوردستان لە تاراوگە دروست بکرێت. کە ئەو بەرەیە بتوانێت هەموو لایەنەکە لە یەک نزیک کاتەوە و بەرنامەی هاوبەش بۆ هەر ئەگەر و ڕاپەرینێک لە کاتی گەرانەوە دروست بکات، کە  لانیکەم بتوانێت ئیدارەی رۆژهەڵاتی کوردستان لانیکەم لە ٦ مانگی سەرەتاوە بکات، تا خەڵک و لایەنە سیاسیەکان ئامادەیی هەڵبژاردنێکی سەرتاسەری دەبن. ئەگەر ئەو بەرەیە پێشوەخت دروست نەکرێت، ئەوا لە کاتی گەرانەوەدا دەبێتە هەر کەس بۆ خۆی و هەر لایەنێک بۆ خۆی کۆنترۆڵی شارو ناوچەیەک دەکات. شەری براکوژی دروست دەبێتەوە، و خەڵکمان بە تەواوی لێ بێزار دەبێت و خەڵکەکە خۆگە بۆ سەردەمی داگیرکەران دەخوازن.

هۆكار ، به‌ربه‌ست و له‌مپه‌ره‌كان له‌ به‌رده‌م پێكنه‌هاتنی به‌ره‌ی كوردستانی له‌ كوردستانی ڕۆژهه‌ڵات چین؟
بەداخەوە   لەتبوون و دابرانی حیزبەکان لە یەکتر ئیستا بە گەورەترین لەمپەر دەبینرێت. بەڵام دەبێت ئەوە بزانین کە پێویستە بەرژەوەندی گەلی کورد لە رۆژهەڵاتی کوردستان بخەینە پێش هەموو لەمپەرە بچووکەکان، دەنا مێژوو لێمان خۆش نابێت.

به‌ره‌ی كوردستانی به‌ چ مكانیزم و شێوه‌یه‌ك پێك بێ كه‌ هه‌موو لایه‌نه‌كان خۆی تێدا ببینه‌وه‌ پێشنیارتان بۆ خێرایی به‌خشین به‌ دروست بوونی به‌ره‌یه‌كی یه‌كگرتوو چیه‌ و چ ڕێكارگه‌لێك ده‌توانن ببنه‌ ڕێخۆشكه‌ر بۆ پێك هێنانی به‌ره‌؟
ئێمە وەک پارتی سەربەستیی کوردستان کە تا کاتی ئەم دیمانە ١٠ ساڵ بە سەر دامەزراندنماندا تێپەر دەبێت، هەمیشە بانگهێشەی دامەزراندنی بەرەیەک یا پێکەوە کارکردنێک لە ژێر هەر ناوێک بێت کردوە، و بەردەوامیش دەبین لەو ئەرکە نەتەوەییە. لێرەدا دووپاتی دەکەینەوە کە ئێمە لەگەڵ دروستبوونی بەرەیەکی کوردستانین کە لە هەموو چین و تۆێژێکی کوردستانی تێدابێت. بەرەیەک بێت بە تەواوی مانا پێناسە لە هەموو پێکهاتەکانی رۆژهەڵاتی کوردستان بکات، بە سیاسی و چەپ و ڕاست و لیبراڵ و ئاینی و کەمە نەتەوەییەوە. ئەو جۆرە بەرەیە دەتوانێت پێگەیەکی بە هێزی لە ئاست کوردستان و جیهاندا هەبێت.
هەروەها داوا دەکەین کە چی دیکە خەڵکی رۆژهەڵاتی کوردستان لەو چاوەڕوانیە نەهێڵینەوەو بە پەلە هەنگاو بنرێت بۆ دروستبوونی ئەو بەرەیە، با لە پێشا کۆمیتەیەکی ئامادەکاری بۆ دروستبکرێت، ئەو کۆمیتەیە کاربکات لە سەر وردە کۆسپ و بوارە تەکنییەکانی. ئێمە وەک پارتی سەربەستیی کوردستان ئامادەیی خۆمان پێشاندەدەین کە ئەرکی بەرێوەبەری یەکەم کۆبوونەوەی ئەو پرۆژەیە بۆ بەرە لە گشت بوارێکدا لە ئەستۆ بگرین.

ئه‌و وتووێژه‌ مانگی ئاگۆستی ٢٠١٥ ئه‌نجام دراوه‌ 

salhhhzade

سه‌رنج و كۆمێنت

كۆمێنت