تیمی کەم کردنەوەی ڕێژەی تەڵاق لە شاری سنە دامەزرا

0
361

بەپێی لێدوانی بەرپرسی فەرمانەگی “بێهزیستی”ـی باژێڕی سنە، دوو تیمی کەم کردنەوەی ڕێژەی تەڵاق لە دادگا و ناوەندی فریاکەوتنی کۆمەڵایەتیی ئەو باژێڕە دامەزڕاوە.

ڕۆژی کورد: “ئەرسەڵان ئەحمەد یاری”، بەرپرسی فەرمانەگی “بێهزیستی”ـی باژێڕی سنە، وێڕای بڵاوکردنەوەی ئەو هەواڵە لە وتووێژ لەگەڵ هەواڵنێری تەسنیم”، گوتوویەتی: “زۆرترین کەسانێک کە داوای تەڵاق دەکەن، کەسانێکن کە ماوەی سێ بۆ پێنج ساڵ بەسەر ژیانی هاوبەشییاندا تێپەڕیوە.”

یارئەحمەدی هەروەها ئاماژەی بە هۆکارەکانی تەڵاق داوە و گوتووشیەتی: “هۆکارەکانی تەڵاق لە نێوان هاوژینەکاندا جیاوازیی زۆری هەیە، بەڵام هۆکاری سەرەکیی جیابوونەوەی هاوسەران دەتوانێ هەست نەکردن بە بەرپرسایەتی لە نێو ژیانی هاوبەشدا بێت. شایانی باسە ئاستی تەڵاق لە تەمەنی نێوان ٢٨ تاکوو ٣٥ ساڵ‌دا، زۆرتر بەرچاو دەکەوێت.”

بەپێی ئاماری فەرمانگەکانی تۆمارکردنی باری کەسێتی پارێزگاکانی رۆژهەڵاتی کوردستان لە چەند ساڵی ڕابردوودا،ڕێژەی تەڵاق ساڵ لە دوای ساڵ  بەرزتر دەبێتەوە .

بە بەراورد لەگەڵ ساڵی ڕابردوو لە پارێزگای ورمێ 16 لەسەد ، سنە 4 لەسەد ، کرماشان 14 لەسەد و ئیلام 12 لەسەد ئاماری تەڵاق بەرز بۆتەوە.

بەپێی نوێترین ئاماری فەرمانگەی تۆمارکردنی باری کەسێتی شاری سەردەشت لە پارێزگای ورمێ تەنیا لەو شارەدا 32 لەسەد ئاماری تەڵاق بەرزبوونەوەی بەخۆیەوە بینیوە ، بەپێی هەندێک سەرچاوەی نافەرمیش لە شاری سەقزی پارێزگای سنە ،ئاماری بەرزبوونەوەی رێژەی تەڵاق 130 لەسەد بووە.

ئەگەرچی ڕێژەی تەڵاق لە هەموو ئێران بەرەو بەرزبوونەوە دەچێت، بەڵام ئەو رەوتە لە کوردستان خێراترە، بە جۆرێک کە رۆژنامەی شەهروندی چاپی تاران ماوەیەک لەوەپێش ئەو رەوتەی بە “بەرزە شەپۆلی تەڵاق لە کوردستان” وەسفکرد.

 

سه‌رنج و كۆمێنت

كۆمێنت