شەماڵ بۆکانی: بوونی بەرە دەتواندرێ ببنە جەمسەرێک لە باڵانسی سیاسی ناوچەکەدا

0
1350

دۆسیەی تایبەتی رۆژی کورد سەبارەت بە بەرەی کوردستانی

ڕۆژی كورد : بۆچی لە پاش 37 ساڵ دەسەڵاتداریی کۆماری ئیسلامی ئێران، پارت و لایەنە سیاسییەکانی رۆژهەڵاتی کوردستان، هەوڵ نادەن هێز و توانای سیاسی و نیزامی خۆیان لە چوارچێوەی بەرەیەکی سیاسی یەکگرتوودا بەکار بێنن؟ لەمپەرەکانی بەردەم پێکنەهاتنی ئەو بەرە یان هاودەنگییە سیاسییە چییە؟ چۆن دەکرێ لایەنە سیاسییەکان لە دەوری یەک پلاتفۆرمی هاوبەش کۆ ببنەوە و خەباتێکی هاوبەشی سیاسی و نیزامی لەدژی کۆماری ئیسلامی بکەن؟
ماڵپەڕی رۆژی کورد لە پێناو لێک نزیککردنەوەی هێز و لایەنەکان و لێک تێگەیشتنیان لەسەر پرس و بابەتی پەیوەندیدار بە پێکهێنانی بەرەیەکی کوردستان ئەم دۆسیەی کردۆتەوە و ڕای ئەندامانی رێبەریی حیزبەکان و هەروەها کەسایەتییە سیاسییەکانی رۆژهەڵات و شرۆڤەکارانی سیاسی وەرگرتووە.
بەرێز شەماڵ مامزادە بۆکانی، کادێری پێشکەوتووی پارتی ئازادیی کوردستان وەڵامی پرسیارەکانی رۆژی کورد دەداتەوە.

ڕۆژی كورد: گرنگیی پێک هێنانی بەرەی کوردستانی بۆ ڕۆژهەڵاتی کوردستان لە چی دایە و زەروورەتەکانی پێکهێانی ئەو بەرەیە چین؟

مامزادە: وەک پێشتر لە چەند بابەتدا ئاماژەم پێداوە ، لە پێش گرینگی دان بە کۆنگرەی نەتەوەیی کورد ، پارتە سیاسیەکانی رۆژهەڵاتی کوردستان دەبو بەپێک هێنانی بەرەی کوردستانی یەکەم هەنگاوی پتەوی خۆیان بنێن وبە بڕیاری  بەرەی ڕۆژهەڵاتیەوە بەشداری کۆنگرەی نەتەوەیی بکەن ، یەکەم زەرورەتی پێکهێنانی بەرەش بۆ گەڕانەوەی باوەڕی جەماوەری کوردستانە بۆ بەردەوامی لە خەبات و پشتیوانی ئەم ڕەوتە .واتە گرێدانی سەنگەری شاخو سەنگەری شار بۆ دەرکردنی بڕیاری هاوبەش لە سەر ڕووداوەکان کە دەبێتە یەکدەنگی بۆ بەرپەرچدانەوەی چەواشەکاریەکانی حکومەتی ئێران .لە بوواری متمانەو بەرزکردنەوەی کەسایەتی سیاسی، لە سیاسەتی دەرەکیشدا بە تایبەت لە ئەگەری پێوەندی وڵاتاندا کاریگەری تایبەتی هەیەو ناوچەکەش بە پێی جیۆگرافیاو دێمۆگرافی سیاسی بە یەکگرتن و بوونی بەرە دەتواندرێ ببنە جەمسەرێک لە باڵانسی سیاسی ناوچەکەدا

ڕۆژی كورد : هۆكار ، به‌ربه‌ست و له‌مپه‌ره‌كان له‌ به‌رده‌م پێكنه‌هاتنی به‌ره‌ی كوردستانی له‌ كوردستانی ڕۆژهه‌ڵات  چین؟ 

مامزادە: با بەزمانێکی سادە لە پێشدا بڵێم خۆبەزلزانی سەرکردە سیاسیەکان و هەست نەکردن بەوئەرکەی پێیان سپێردراوە بۆتە هۆکاری کۆسپی سەرەکی بۆ پێک نەهاتنی بەرە ، پاشان لاوازبوونی هەستی نەتەوایەتی و زاڵ بوونی ئایدیای حیزبی و جیاوازیەکانی شێوەی خەباتی سەردەمیانە وهەروەها مێژووی هەندێک لایەن بۆتە خۆرەی یەکدەنگی .بەشێکیشی دەگەڕێتەوە سەر ئەوهونەری سیاسەتەی کە کۆماری سێدارەی ئیسلامی بە ئاژاوەگیڕی ڕەوت و گەڵاڵەی دارێژەی سیاسی لە شێوەی هێرشبردندا دەباتە خانەی بەرگری وشیکاری پارتەکانی ڕۆژهەلات ، واتە وایان سەرقاڵ دەکات تەنیا خەریکی بەرپەرچدانەوەی رێکلامە مەنفیەکانی حکومەت بن ، واتە جەقبەستوویی وپەسیوی فیکری .

شەماڵ بۆکانی: بوونی بەرە دەتواندرێ ببنە جەمسەرێک لە باڵانسی سیاسی ناوچەکەدا

ڕۆژی كورد: بەرەی کوردستانی بە چ میکانیزم و شێوەیەک پێک بێ کە هەموو لایەنەکان خۆیان تێدا ببیننەوە؟ 

مامزادە: یەکەم میکانیزمی پێکهێنانی بەرە بۆ ئەوەی هەمولایەنەکان خۆی تێدا ببیننەوە بەهێزکردنی هەستی نەتەوایەتییە کە لە سەروی بەرژەوەندی  تاکە کەسی وحیزبیەوە بێت ، هەرلایەنێک سێ کەس یان چەند کەس لە سەرکردەوە ئەندامانی سەرەوەی سیاسی دەست نیشان بکەن کە بتوانن خاوەن دەسەلاتی بریار  وتێگەیشتن وپێکگەیشتن بن لە سەرداڕێژە سیاسیەکان وڕاگەیاندنە هاوبەشەکان .

ئەنجومەن هەبێت نەک سەرکردایەتی بەرە ، لە ئەگەری بونیشدا بە شێوەیی دەورەیی بێت ، ئیتر ئەندامی زیاتر و هێزی چەکدار و مێژوو نەبێتە پێوەر.

خاڵی سێهەم داڕشتنی سیاسەتێکی هاوبەشی ساڵانە و زەقکردنەوەی چەندین ووشەی بریقەدار کە پێوەندی بە یەک گرتووییەوە هەبێت و لە پەراوێزی سیاسەتی درێژخایەندا ببێتە نوکەڕمی مافی چارەی خۆنوسین .

لە بوواری ئابوریشدا بە یارمەتی هەمولایەک وبەشداری کەسانی پسپۆڕ پرۆژەی داهاتی ئابووری بۆ بەریوەبردنی سیاسەتەکانی بەرە بێتە ئاراوە ، واتە لە دووای سەرکەوتنی گەڵاڵەیی ئابووری،  وەرێخستنی کەناڵێکی سەتەلایتی وەک زەرورەتی خەباتی سەردەمیانە ئامانجی سەرەکی بێت ، وەک دەشزانن میدیا هێزێکی بە توانای حاشا هەڵنەگرە بۆ دەربازبوون لە بەستێنی دابران لە کۆمەڵگا

ڕۆژی كورد : پێشنیارتان بۆ خێرایی بەخشین بە دروستبوونی بەرەیەکی یەکگرتوو چیە و چ رێکارگەلێک دەتوانن ببنە ڕێخۆشکەر بۆ پێکهێنانی بەرە؟

مامزادە: بەشێک لە وڵامەکان لە سێ پرسیاری پێشوودا خۆیان زەق کردۆتەوە ، وەک بەهێزکردنی هەستی نەتەوایەتی و کاڵ کردنەوەی هەندێک ئایدا بۆ بە ڕێوەبردنی سیاسەتێکی سەرکەوتووانە ، دوواتردەست هەڵگرتن لە خۆ بەزل زانینی هەمو سەرکردە حیزبیەکان ،بەشێکی هەرە گرینگیش دەگەڕیتەوە سەرپەیڕەوکردنی ئەوسیاسەتەی کە باوەڕی ئایدۆلۆژیکی ئایینی کۆماری سێدارەو هەروەها بە لێکۆڵینەوە لەو باوەڕەی کە لە ژێر سایەی حکومەتێکی توتالیتریزمدا زۆر جار دەرکەوتووە کە لۆژیکی خەباتی بەڕوالەت مەدەنی ، لە لۆژیکی دەسەلاتەوە سەرچاوە دەگرێ ، واتە بە هێچ جۆرەچالاکیەکی ناوخۆی ڕۆژهەلات کە لەژێر ناوی جیاجیادا خۆیان زەقدەکەنەوە گرینگی و بایەخیان پێ نەدرێت چونکە ئامانج تەنیا کاڵ بوونەوەی چالاکی  ومیژووی خەباتی پڕ شانازی حیزبەکانی ڕۆژهەلاتە و بەس ، لە لایەکی تریشەوە بگەین بەو قەناعەتەی پشت بەستن بە وڵاتانی زلهێز ” دە” لە سەد بێت .و باوەڕمان بەوە هەبێت کۆماری سێدارە بەهێزەو لە هونەری سیاسەت دەزانێ ، بۆ دووایین ووتەش ئیتر بەس لە ژێر ڕێکلامی پاراستنی ئەزمونی هەرێمی باشووری کوردستان خەباتی رۆژهەلات بخەینە پەراوێزەوەو جەماوەری ناوخۆ بێ هیوا کەیین .

shamal-mamzade-bokani-bere-kurdistani-xorhelat

سه‌رنج و كۆمێنت

كۆمێنت