ڕژیمی ئێران جارێکی تر سنوورەکانی هەرێمی کوردستانی باشووری تۆپباران کردەوە

0
57

ڕۆژی کورد: هاوکات لەگەڵ سەفەری شاندی یەکێتیی نیشتمانی بە سەرپەرشتیی بەرهەم ساڵح بۆ تاران و چاوپێکەوتن لەگەڵ عەلی شەمخانی و سەحراڕوودی، سەرلەبەیانیی ئەمڕۆ پێنج‌شەممە، ڕێکەوتی ٢١ی گەلاوێژی ١٣٩٥ی هەتاوی، ڕێژیمی تێرۆریستیی ئێران، بۆ جارێکی دیکە ناوچە سنوورییەکانی هەرێمی کوردستانی باشووری تۆپباران کردەوە.

بەپێی هەواڵەکان، بەیانیی ئەمڕۆ، ڕێژیمی ئێران ، بە گوللـەی فسفۆڕیی کاتیووشا و تۆپ، ناوچەکانی بەربزین و سەقەری لە دەڤەری سیدەکان بە خەستی تۆپباران کردووە و لە دەرئەنجامی بەکارهێنانی ئەو گوللـە تۆپە فسفۆڕییانەدا، زەوی و زاری ئەو دەڤەرە، ئاگری گرتووە.

بەپێی زانیارییەکان، خەسارێکی زۆر و بەرچاو لە زەوی و زاری خەڵکی ئەو ناوچەیە کەوتووە بەڵام هیچ  خەسارێکی گیانی بۆ خەڵکی ناوچەکە بەدواوە نەبووە و تەنیا بەختیار قادر پەیامنێری تیمیی ڕوودار کە بەمەبەستی ڕووماڵ کردنی تۆپبارانەکە وێڕای تیمی ڕووداو لەو شوێنە ئامادە بوو، بەسووکی بریندار بوو

ڕۆستەم جەهانگیری، یەکێک لە بەرپرسانی شوورای نیزامیی حیزبی دێموکراتی کوردستانی ئێران پشتڕاستی کردۆتەوە کە ڕێژیمی ئێران لە تۆپی جۆری فسفۆڕی کەڵکی وەرگرتووە.

لەلایەکی ترەوە هەواڵنێری ماڵپەڕی کوردستان میدیا لە بەربزین ڕایگەیاندووە کە؛ تۆپخانەکانی ڕژیمی ئێران کاتژمێر ٥ی ئێوارەی ئەمڕۆ، دیسانەوە دەستیان بە تۆپبارانی ناوچەکە کردووەتەوە و هەروەها فڕۆکەیەکی ڕژیمی ئێرانیش بە سەر ناوچەکەدا سووڕاوەتەوە.

لە ماوەی حەوتووی ڕابردوودا هەواڵنێری ناوەندی ڕۆژی کورد لە  باژێڕی شنۆ، باسی لە تێپەڕبوونی ٥ فڕۆکەی سەربازیی ڕژیم بە سەر ئاسمانی شنۆ و ئورمێ دا کرد کە بە ئاسمانی ئەو دو باژێڕەدا بەرەو کێلەشین تێپەڕ ببوون و گەڕابوونەوە باژێڕی ئورمیە بەڵام هیچ هێرشێکیان ئەنجام نەدابوو.

هەروەها لە ماوەی ٢ مانگی ڕابردوودا تا ئێستا ٢ جار فڕۆکەی بێ سەرنشین لە ناو ئاسمانی باژێڕی ئورمیە و لە چیاکانی سنووریی نێوان کوردستانی ڕۆژهەڵات و هەرێمی کوردستانی باشووردا بیندراوە.

لە ماوەی هاوینی ئەمساڵدا ئەوە دووهەم جارە کە ڕژیمی ئێران ئەو ناوچە سنوورییانە تۆپباران دەکات.

 

سه‌رنج و كۆمێنت

كۆمێنت