دۆسیەی تایبەتی رۆژی کورد سەبارەت بە بەرەی کوردستانی
بۆچی لە پاش 37 ساڵ دەسەڵاتداریی کۆماری ئیسلامی ئێران، پارت و لایەنە سیاسییەکانی رۆژهەڵاتی کوردستان، هەوڵ نادەن هێز و توانای سیاسی و نیزامی خۆیان لە چوارچێوەی بەرەیەکی سیاسی یەکگرتوودا بەکار بێنن؟ لەمپەرەکانی بەردەم پێکنەهاتنی ئەو بەرە یان هاودەنگییە سیاسییە چییە؟ چۆن دەکرێ لایەنە سیاسییەکان لە دەوری یەک پلاتفۆرمی هاوبەش کۆ ببنەوە و خەباتێکی هاوبەشی سیاسی و نیزامی لەدژی کۆماری ئیسلامی بکەن؟
ماڵپەڕی رۆژی کورد لە پێناو لێک نزیککردنەوەی هێز و لایەنەکان و لێک تێگەیشتنیان لەسەر پرس و بابەتی پەیوەندیدار بە پێکهێنانی بەرەیەکی کوردستان ئەم دۆسیەی کردۆتەوە و ڕای ئەندامانی رێبەریی حیزبەکان و هەروەها کەسایەتییە سیاسییەکانی رۆژهەڵات و شرۆڤەکارانی سیاسی وەرگرتووە.
بەرێز عوسمان جەعفەری، سەرۆکی یەکێتی دیموکراتی کوردستان وەڵامی پرسیارەکانی رۆژی کورد دەداتەوە.
رۆژی کورد : گرینگی پێكهاتنی بەرەی كوردستانی بۆ كوردستانی ڕۆژهەڵات لە چی دایە و زەروورەتەكانی پێكهێنانی ئەم بەرەیە چین؟
جەعفەری : بۆ ئەوەی كە بزانین گرینگی درووستبوونی بەرەی كوردستانی و زەروورەتی درووست بونەكەی لە چیدایە دەبێ لە دوو ڕەهەندی ناوخۆیی و دەرەكیەوە بۆی بڕوانین یەكەم ڕەهەندی نێوخۆیی چ وەك گۆڕەپانی سیاسی لە ئێران و كوردستان و چ وەك پەیوەندی نێوخۆیی هێزەكان و نێوماڵی كوردی و دووهەم ڕەهەندی دەرەكی پێكهاتنی ئەو بەرەیە كە لە ئاستی جیهانی و ناوچەیی چ گرینگی و زەروورەتێكی هەیە و كاریگەریەكان و لێكەوتەكانی چی دەبن. هەموو هێزە سیاسییەكانی كوردستانی خۆرهەڵات ئەو ڕاستیە دەزانین كە ئەوڕۆكانە سیاسەتی ڕۆژئاوا و تایبەت ئەمریكا بەرامبەر بە ئێران و تایبەت بە پرسی برنامە ئەتۆمیەكەی لە سیاسەتی دژایەتی و بەربەست بوون بۆ هاوكاری گۆڕدراوە و بە چاوی خۆمان دەبینین كە دەرئەنجامی ئەو گۆڕانی سیاسەتەش گەڕانەوەی وڵاتانی ڕۆژئاوایە بۆ بەدەستهێنانی بازاڕی ئابووری ئێران, ڕاستە كە ئەو گۆڕانی سیاسەتەی ڕۆژئاوا جۆرێك لە بووژانەوەی ئابووری و گوزەرانی خەڵكی لێدەكەوێتەوە بەڵام ئەوە تەنیا ڕووی پشتەوەی ژیانی ئابووری گشتی خەڵكی ئێرانە و ڕووی سەرەكی و بنەڕەتی ژیانی گەلانی ئێران و تایبەت كوردستانی خۆرهەڵات ئەو سیمای دەسەڵاتەیە كە تا ناخی پڕە لە گەندەڵی و خەڵك بێ بەشە لە سەرمایەی گشتی وڵات كە سەرەڕای ئەوەش كە گەلانی ئێران و تایبەت كورد لە ڕووی سیاسیەوە خوازیاری گۆڕانكاری سیاسین لە سیستەمی سیاسی ئێستای كۆماری ئیسلامی ئێرانەوە بۆ سیستەمێكی دیموكرات كە گەلانی ئێرانی خاوەن ئیرادەی سیاسی ئازاد و دیموكراتیكی خۆیان بن, گەڕانەوەی وڵاتانی ڕۆژئاوا بۆ بازاڕە ئابووریەكەی كۆماری ئیسلامی ئێران سەرەڕای هەبوونی ئەو سیستەمە گەندەڵە ئابووریەو ئەو سیستەمە فاناتیك و سەركۆتگەریە, نەبوونی یكدەنگی و قورسایی دەنگی ناڕەزایەتی و كەمكاری و نەبوونی هاوكاری ڕاستەوخۆ و بێ پلانی ئۆپۆزسیۆنی ئێرانە بە گشتی و لە پلەی دووهەمدا لە نێو هێزە كوردییەكان وەك چالاكترین هێزی سیاسی ئۆپۆزسیۆن, دەبوو هیزە كوردستانیەكان بۆ ئەوەی كە كاریگەی و قورسایی خۆیان لە سەر بڕیارە نێونەتەوەییەكان دابنێن یەكگرتوو و خاوەن بەرە بۆ پێشكەشكردنی پلانی خۆیان بن ، لە ساڵانی ڕابردوودا كورد ئەیتوانی بە یەكخستنی دەنگی خۆی لە ناوەندە نێونەتەوەییەكان كاریگەری لە سەر بڕیارەكان دابنێت و باردۆخەكەی بە شێوەیەكی دڵخوازانەتر بگۆڕێت بەڵام بە داخەوە بەو شێوەیە نەبووە و بۆ نموونە كاتی شەڕی ئێران و عێراق، زۆرینەی ڕای جیهانی و هێزە جیهانیەكان و ناوچەكە دژی ئێران بوون بەڵام ئۆپۆزسیۆنی كوردی خۆرهەڵات بە هۆی پرش و بڵاوی خۆی نەیتوانی ئەو باردۆخە بەكار بهێنێت بۆ گەیشتن بە ئامانجەكانی، ساڵی 1988 و دوای شەڕی عێراق و ئێران هەموو كەس پێی وابوو كە بزووتنەوەی كورد لە كوردستانی باشوور بەرەو پاشەكشە بڕوات بەڵام هەر ئەو ساڵە هێزە سیاسییەکانی ئەو پارچەیە بەرەی كوردستانیان درووست كرد و ناكۆكیەكانیان وەلا ناو و توانیان مێژووییەكی نوێ بخولقێنن، ڕاست پێچەوانەی هێزەكانی كوردستانی خۆرهەڵات، كە بە هۆی پرش و بڵاوییان تا هات پاشەكشەیان كرد و پاشەكشەیان پێكرا و بە داخەوە بو بە هۆی تیرۆر بوونی دەیان ڕێبەر و كادر و پێشمەرگەی ئەو حیزبانە و نەیانتوانی وڵامدانەوەیان و كاردانەوەیان لە ئاستی ئەو ستەم و دەستدرێژیە بێت كە كراوتە سەریان. لەوە بترازێ ئێمە با ئەم یەك دەیەی ڕابردوو بخەینە بەر باس كە هەلی مێژوویی لە ئارادا بوو بۆ درووست كردنی ئەگەری گۆڕانكاری جیدی لە ئێراندا هەم ڕای جیهانی و هەم هێزە جیهانیەكان و هەمیش خەڵك لە ناوخۆوە ئامادەیی ئەوەیان تێدا بوو كە گۆڕانكاری بە سەر ئەو سیستەمە دیكتاتوریەتە دا بێنن بەڵام بە داخەوە لە ماوەی ئەو یەك دەیە و دوای ساڵی 2004 زیاترین كەم كاری كرا بۆ درووست كردنی بەرە، زیاترین لەمپەر و بیانویان داتاشی بۆ درووست نەبوونی بەرە، ئەوە لە حاڵێكدا بوو كە دەكرا ئەو هەلە مێژووییە بقوزینەوە بۆ كاریگەری دانان لە سەر بڕیاری نێو نەتەوەیی بە یەكدەنگی و كۆ كردنەوەی هێزەكانمان لە بەرەیەكی كوردستانیدا بەڵام مەخابن بینیمان كە هێزە کوردییەکانی كوردستانی خۆرهەڵات زیاتر تووشی لێك ترازان و ئینشعاب بوونەوە.
عوسمان جەعفەری: پێكهێنانی بەرەیەك لە نێوخۆی هێزەكانی كوردستانی خۆرهەڵات پێویستە و زەرووەتێكی مێژووییە
بۆ ئێمە هێزە سیاسیەكان گرینگە كە خوڵقێنەری هەلی خەبات و تێكۆشان بین و بە بڕوای من دوای ئەم چارەسەری پرسی ئەتومیەی ئێران دەبێ خۆمان نوێ كەیەنەوە و لێرەوە بە دواوە دەورەیەكی نوێ لە خەباتی رزگاریخوازیمان دەست پێدەكات، بە هەمان شێوە كە وتمان لە ساڵی 1988 بێ هیواییەك زاڵ ببوو كە بزووتنەوەی كورد لە بەرامبەر رژێمی بەعسدا بە چۆكدادێت و ئاراستەی هاوكێشە سیاسییەکانی ناوچەكە بە قازانجی كورد نەبوو بەڵام دەبینین كە بە هەست كردن بە ئەركی ئازادیخوازی و خەباتگێڕییان بەرەی كوردستانیان ساز كرد بە هەمان شێوە لەم كاتەشدا كە هاوكێشە سیاسەكانی ناوچەكە و جیهان لە قازانجی كۆماری ئیسلامیدایە و بێ هیوایەك باڵی كێشاوە بە سەر سیمای ئۆپۆزسیونی ئێرانیدا،هێزە کوردییەکانی كوردستانی خۆرهەڵات زەروورە لە سەریان كە مۆراڵ و هیوایەك بۆ هەم خەڵك و هەمیش بزوتنەوە ئازادیخوازەكەمان بگێڕێتەوە و ئەویش تەنیا بە درووست كردنی بەرەی كوردستانی دەبێت . یەكێكیتر لە زەروورەتەكانی درووست بوونی بەرەی كوردستانی، بەرەنگار بوونەوەی سیاسەتە ناوخۆیی و ناوچەییەكانی كۆماری ئیسلامیە كە هیزە کوردییەکانی كوردستانی خۆرهەڵات دەتوانن بە هەبوونی بەرە و هاوكاری نێوانیان پەرچدانەوەی پێویست و بەهێزیان هەبێت و گۆڕەپانەكە چۆڵ نەبێت بۆ تاودانەكانی كۆماری ئیسلامی ئێران، ئەوە بۆ هەموو لایەك ڕوونە كە ئەو حكومەتە لە ڕێگەی جۆراوجۆرەوە دزە كردووەتە هەناوی ناوچەكە و ئەوڕۆ خاوەن هەڵوێست و بڕیاری خۆیەتی لە ناوچەكەدا و بەو شێوازەی كە خواستیەتی ، ئاراستەی سیاسەت و ڕووداوەكان دەگۆڕێت و دەقاودەق بۆ هێزە كوردستانیەكانیش ئەوەی گواستوەتەوە و لە ڕێگەی هێزی تر و لە رشێگەی كەسانی تایبەتی خۆی، كاریگەری لە سەر هێزە سیاسییەکانی كوردستانی خۆرهەڵات داناوە و كاریگەری خۆی داناوەتە سەر بزاوتی كوردی و بۆ رزگار بوون لەو دۆخەو بۆ بەرنگار بوونەوە و پەرچدانەوەی سیاسەتەكانی كۆماری ئیسلامی پێكهێنانی بەرەیەك لە نێوخۆی هێزەكانی كوردستانی خۆرهەڵات پێویستە و زەرووەتێكی مێژووییە، چوونكوو بێتوو بەرە پێكنەهێنرێت بۆ بەرەنگار بوونەوەی سیاسەتە زیادەڕۆییەكانی كۆماری ئیسلامی ئەوا بە دڵنیاییەوە بزووتنەوەی كورد لە خۆرهەڵاتی كوردستان لە ژێر هەڕەشەی جیدی مان و نەمانی دا دەبێت. لە ڕووی دەرەكیشەوە زەروورە كە ئەو ڕاستیە بسەلمێنرێت بۆ ئەرووپا و ئامریكا و زلهێزەكانی تر و هەروەها ناوەندە بڕیار بەدەست و ڕای گشتی ئازادیخواز و دیموكراسیخوازانی جیهان كە گەلی كورد خاوەن هێزی كارای سیاسیە كە ئامانجی بە دیموكراتیزە كردنی ئێران و پەرەپێدانی شارستانیەتی دیموكراتیكە لە ناوچەكە و تایبەت ئێراندا و ناكرێت ئەوان فایلی مافی مرۆڤ و نەتەوە و كەمە ئایینی و دین و توێژە جیاواز و جیابیرەكانی كۆمەڵەی ئێرانی لە بیر بكەن و بیكەن بە قوربانی پەیوەندییەکانی خۆیان لە گەڵ ئێراندا . هەر بۆیە ئەوەش تەنیا لە ڕێگەی یەك هەڵوێستی و كۆكردنەوەی هێزی گشتی حیزبە سیاسی و ڕێكخراوە جۆراوجۆرەكانی سەر گۆڕەپانی سیاسی و چالاكیە جۆراوجۆرەكانی تر دەستەبەر دەكرێت.
رۆژی کورد : هۆكار ، بەربەست و لەمپەرەكان لە بەردەم پێكنەهاتنی بەرەی كوردستانی لە كوردستانی ڕۆژهەڵات چین؟
جەعفەری: هەموومان ئەو ڕاستیە دەزانین كە هەم گرینگە و هەمیش زەروورە كە بەرەیەك درووست بێت لە لایەن هێزە سیاسییەکانی كوردستانی خۆرهەڵاتەوە بەڵام بەداخەوە دوو فاكتەری سەرەكی بوونی هەیە جیاواز لە فاكتەرە گرینگەكانی تر كە هۆكار و بەربەست بوون بۆ درووست كردنی بەرەیەك، كە ئەوەش نەبوونی ئیرادەی سیاسی بەهێز و دووهەم بێ هیواییە بە نسبەت گۆڕانی سیاسی و جووڵەی ناوخۆیی خەڵك و جەماوەری ئێران. ئەم دوو فاكتەرە، دوو فاكتەری سەرەكین كە تا هەنووكە نەیهێشتووە فاكتەرە بەربەست و خاڵە ناكۆكەكانی تری نێوان لایەنە سیاسیەكان بڕەوێتەوە و هەنگاو بەرەو بەرە بهاوێژرێت، بوونی ئیرادەی سیاسی بەهێز زەروورەتێكی حەتمیە بۆ سێ شتی سیاسی گرینگ ، یەكەم بڕیاردانی سەربەخۆییانە لە سەر كردارە سیاسیەكان و دووهەم هەبوونی جورئەتی سیاسی بۆ بڕیاردان و سێهەم هەست بەبەرپرسیارێتی كردن بەرامبەر بە ستەم و ئازاری خەڵك، بەداخەوە گرێدراوی بە هێزەكانی دەرەوەی كوردستانی خۆرهەڵات و گرێدانی بڕیارە سیاسیەكان بە بڕیاری هێزەكانی دەرەوەی كوردستانی خۆرهەڵات یەكێك لەو بەربەستانە بووە كە نەیهێشتووە تا هەنووكە بەرەیەك درووست ببێت و و جۆرئەتی ئەویان نەكردووە كە مەیلی یەك هەڵوێستی بنوێنن لە گەڵ هێزەسیاسییەکانی تردا و خۆیشیان بە بەرپرسیار نازانن بۆ بەگژداچوونەوەی ستەمی كۆماری ئیسلامی و تەنیا خۆیان وەك خاوەن خەڵك لە سەر كاغەز وێنا كردووە، هەنگاوەكان و هەوڵەكانی پێشووتر بۆ بەرە ئەو ڕاستەییەی پێ ووتین.
بێ هیوا بوون لە درووست بوونی گۆڕانکاری سیاسی لە ئێران و نەبوونی جووڵەی سیاسی كاراو ئەكتیڤی جەماوەری لە ناوخۆ، رۆحی شۆڕشگێرێتی بۆ هەندێك لەو هێزانە نەهێشتووتەوە، ئەوە لە حاڵێكدایە كە ئەركی هێزی سیاسیە كە جووڵەی جەماوەری درووست بكات بۆ گۆڕانكاری سیاسی و هەڵگیرسانی و بەردەوام كردنی شۆڕش, هەندێك لەو هێزانە و تایبەت تاكە كاریگەرەكانی نێۆ ئەو هێزانە لە بیریان چووەتەوە كە ئەوان ئەبێ شۆرشگێڕ بن و ئەو بەرنامەیە كە هەنگاویان بۆ هەڵگرتووە دەبێ بیخەنە پێش بەرژەوەندی تاكە كەسی و ڕەوتی و حیزبی خۆیانەوە، هەر بۆیە دەبینین كە لەمپەر و بەربەستی تر دێتە كایەوە كە ناهێلێت بەرە درووست ببێت ئەویش بەڕژەوەندی تاكە كەسی و حیزبی و ڕەوتیە كە نایهەوێت ئەو ئیرادەیە درووست ببێت كە هەنگاو بۆ درووست بوونی بەرە بنێت، ئەوان بەرژەوەندی خۆیان پێش بەرژەوندی گشتی خستوە و نەیانهێشتووە كە بەرەیەك بۆ كوردستانی خۆرهەڵات كە لە بەرژەوەندی گشتیدایە درووست ببێت ، بوونی بەرژەوەندی تاكە كەسی و حیزبی لە نەبوونی بەرەدا بە ڕوونی لە هەنگاوەكانی پێشوو بۆ بەرەدا دیار بوو.
یەكێكی تر لە فاكتەرە بەربەستەكانی تری بەرە، بەداخەوە نەبوونی كلتووری یەكتر قەبووڵ كردن و دوور بوون لە بەها دیموكراتیكەكانە، هەندێك لە هێزە سیاسییەکانی كوردستانی خۆرهەڵات تەنها لە سەر كاغەزی ئەساسنامەكانیان وشەی دیموكراسی و باوەڕ بە پلۆرالیزم بوونی هەیە و زێهنییەتیان زێهنییەتی پاوانخوازی و بەرەنگار بوونەوەی دیموكراسیە و پڕە لە وەهم و خەیاڵی خۆ بە زل زانین، تا كاتێك ئەم زێهنییەتە بوونی هەبێت و ئەو كلتوورە نادیموكراتیك و خۆبەزل زانینە بوونی هەبێت نەك بەرە بەڵكوو باسی دیموكراسی و جووڵەی فراوانی كۆمەڵایەتیش هەر نایەتە گۆڕێ ، چوونكوو هێزەكانی تر و ڕەوتە فیكریە جیاوازەكانی تر لە بەرەی دووژمن دادەنێت و خۆی نیشتمان پەروەر و خاوێن و پاك نیشان ئەدات و ئەوانیتر بە ناپاك و خۆفرۆش و نیشتمان فرۆش و ناشۆڕشگیڕ بوون تاوانبار دەكات. لە وەها دۆخێكدا هیچ حەسێبێك بۆ هیزەكانی تر ناكرێت تاكوو لە گەڵیاندا بچێتە بەرەیەكەوە.
بەداخەوە گرفتەكان و لەمپەرەكانی بەردەم پێكهێنانی بەرە فراوانن و بە ئەم عەقڵیەتی ئێستای هێزە سیاسییەکانی كوردستانی خۆرهەڵاتەوە كە خوێندنەوەیەكی زانستیانەی بۆ ڕەوتی ڕووداوەكان و واقعیتە سیاسیەكان نیە و ناتوانێت ئاراستە سیاسیەكان بخوێنێتەوە و شوێنكەوتە و جێماوی ڕووداوەكانە و جورئەتی ریسك و توانای مانۆڕی نییە لە نێو ڕووداو و هاوكێشە سیاسیەكاندا و نەیتوانیوە لە هەلە مێژووییەكان كەڵك وەر بگرێت و هەلی مێژوویی ڕوویداوە بەڵام جۆرئەتی ئەوەی نەبووە كە بڕیاری چارەسەر بدات و لە نێو هاوكێشە سیاسیەكان و ڕووداوە مێژووییەكاندا نەیتوانیوە خۆی بەهێزكات كە ئەویش لە ڕێگەی هاوپەیمانی لە گەڵ هێزەكانی تر و درووست كردنی بەرەیەك كە بتوانێت هەم ڕای گشتی جەماوەری ناوخۆیی بۆ لای خۆی ڕاكێشێت و هیوا بەخش و ڕاچڵەكێنەری حەماسەتی خەڵكی بێت وهەمیش بۆ كاراكترە یاری كەرەكنی نێو سیاسەتی ناوچەكە و ئێران ببێت بە ئەمری واقیعی كارتێكەر كە شوێن پێی و بڕیارەكانی دیار بێت.
رۆژی کورد : به‌ره‌ی كوردستانی به چ مكانیزم و شێوه‌یه‌ك پێك بێ كه هه‌موو لایه‌نه‌كان خۆی تێدا ببینه‌وه پێشنیارتان بۆ خێرایی به‌خشین به دروست بوونی به‌ره‌یه‌كی یه‌كگرتوو چیه و چ ڕێكارگه‌لێك ده‌توانن ببنه ڕێخۆشكه‌ر بۆ پێك هێنانی به‌ره؟
جەعفەری: دەستەواژەی بەرەی كوردستانی بۆ خۆی پێناسەی خۆی پێیە یانی كۆكەرەوەی هەموو هێز و ڕەوت و ڕێكخراو و تاكە كەسی حقوقی وسیاسی و چالاك لە بوارە جیاجیاكانی خەباتی سیاسی و مافخوازی چین و توێژە جیاوازەكانی كۆمەڵگە كە لە گۆڕەپاندا بوونیان هەبێت و هەموو ئەوانەی دەرەوە و ناوخۆی وڵات دەگرێتەوە. دیارە كە هێزەكانی كوردستان دابەش بوون بە سەر بیر و ڕا و ئایدیا جیاوازەكان و هەر هێز و رێكخراو وتاكە كەسێك پرۆژە و بەرنامەی تایبەتی سیاسی خۆی هەیە بۆ داهاتووی ئێران و كوردستان و بەرنامە سیاسی و فیكرییەكان جیاواز و جۆراوجۆرن، هێزمان هەیە كە داوای فیدرالیزم دەكات هێزی تر داوای خودموختاری یان ئیسلامی یان سەربەخۆیی دەكات یان هەمانە كە بەس دیموكراسی دەوێت ، لێرە دەبێت خاڵی هاوبەش لە بەرچاو بگیردرێت و خاڵی هاوبەشی هەموو هێزەكان بە پێی بەرنامە و پرۆگرامی خۆیان دیموكراسی و باوەڕ بە پلۆرالیزمە هەر بۆیە باشترین مكانیزم بۆ پێكهێنانی بەرە دیموكراتیك بوون و قەبووڵ كردنی یەكتر و باوەڕی ڕاستەقینەبێت بۆ بەشداری گشتی كە هەموو فیكر و ڕا جیاوازەكان لە ژێر بەرنامەیەكی كاری تایبەت بە بەرەدا كۆ بكرێنەوە هەم هێزەكانی دەرەوە و هەم هێزەكانی ناوخۆ لەم بەرەیەدا بەشدار بن. ئەوەی كە لە پرسیارەكانی پێشوودا باسم كرد دەبێ لە بەرچاو بگیردرێت و ئیرادەی سیاسی و جورئەتی سیاسی ئەوێت كە بتوانین هەنگاو بەرەو بەرە بنێین و ئامانجمان دیموكراسی ڕاستەقینە و بەدیهێنانی خەون و ئاواتی نەتەوەكەمان بێت. لە ساڵانی ڕابردوودا بە داخەوە حیزبەكانی كوردستان تووشی كێشەو گرفتی ناوخۆیی فراوان بوونەوە كە بوو بە هۆی لێكترازان و جیا بوونەوە و ئینشعاب و ئەوەش درووست بوونی بەرەی تا ڕادەیەك نامۆمكین كرد دەبێ دەست پێشخەرییەكی بوێرانە لە لایەن هێزە خاوەن كاریگەریەكانی كوردستانی خۆرهەڵات ئەنجام بگرێت كە هەموو هێزەكان كۆ بكرێنەوە و پێش هەموو شتێك ئاشتەواییەك لە نێوان هێزەكانی كوردستانی خۆرهەڵات درووست ببێت و پەیوەندییەکانیان لە گەڵ یەكتر ئاسایی بكرێتەوە و هەموویان دان بە فەرمی بوون و سەربەخۆ بوون و خاوەن ڕێكخستن و سیستەم بوونیان دا بنرێت و بە ڕای من ئەوە ئەتوانێت ڕێگە خۆشكەر بێت بۆ پێكهێنانی بەرە، ئەگەر چی زۆر چاك دەبێت كە پێش هەموو شتێك ماڵی دوو حیزبی دیموكرات و كۆمەڵە ڕێكبخرێنەوە كە ئەگەری درووست بوونی بەرەی لێ دەكەوێتەوە.
ئەگەریش ئەوە ڕووی نەدا یان جێبەجێ نەكرا دوو ڕێگای تر هەیە كە دەكرێت تاقی بكرێنەوە و ڕێخۆشكەر بن بۆ پێكهاتنی بەرە یەكەم ئەوەی كە لایەنێك یان دوو لایەن بە ئەوپەڕی لێبووردەییەوە دەستپێشخەری بكەن و ئێواش ئێواش پێش هەموو شتێك پلاتفۆرمێك لە لایەنە سیاسیەكان پێك بێنن و خۆێندنەوە بۆ هەموو ڕێگاكان بكرێن كە كامیان دەتوانێت درووستكەری بەرەیەكی بەرفراوان بێت، دووهەم ئەوەی كە كەسانی بێلایەن و كەسایەتییە بەناوبانگ و سەربەخۆكانی كوردستانی خۆرهەڵات هەوڵی درووست كردنی پلاتفۆرمێك بدەن و لایەنەكان بانگ بكەن بۆ كۆ بوونەوە لە دەوری پلاتفۆرمێكی هاوبەش و دواتریش هەنگاو نان بەرەو پێكهێنانی بەرە، كە هەموو هێز و ڕێكخراو و كەسایەتیە چالاكەكان خۆیان لە نێوی دا ببیننەوە.
