لە هەر١٠٠ هەزار کەس ٨ کەس لە کرماشان خۆیان دەکوژن

0
179

رۆژی کورد: لە کاتێکدا، کارناسانی و چالاکانی کۆمەڵایەتی لە کوردستان بێکاری و هەژاری وەکوو سەرەکی‌ترین هۆکاری خۆکوژی لەقەڵەم دەدەن، لێپرسراوێکی حکوومەتی لە کرماشان هۆکاری خۆکوژی بۆ بەرچاوتەنگی و نەریتیی “تعصب” خەڵکی ناوچە جیاجیاکان دەگەڕێننەوە.

جێگری بەرپرسی ئیدارەی بێهزیستیی کرماشان سەبارەت بە ئاماری خۆکوژیی لەو پارێزگایە ڕایگەیاندووە لەو شوینانەی کە خەڵکەکەی بەرچاوتەنگن، ئاماری خۆکوژی لەسەرەوەترە.

وتەکانی ئەو بەرپرسە لەکاتێکدایە کە چالاکان و کارناسانی بواری کۆمەڵایەتی، بێکاری و هەژاری وەکوو هۆکاری سەرەکیی خۆکوژی لەقەڵەم ئەدەن و بەپێی ڕاپۆرتی ناوەندی ئاماری ئێران، کرماشان، زۆرترین ئاماری بێکاریی لەخۆ گرتووە.

ئیسلام‌ئابادی ڕۆژئاوا، سەرپێڵی زەهاو و گیلانی ڕۆژئاوا لە پاش ناوەندی ئەو پارێزگایە (کرماشان)، زۆرترین ئاماری خۆکوژییان لەخۆ گرتووە.

ناوەندی ئاماری ئیران، سەرەتای مانگی خاکەلێوەی ئەمساڵ ئامارێکی لەمەڕ بێکاری لە هاوینی ساڵی ڕابردوودا لە پارێزگای کرماشان بڵاو کردەوە کە بەو پێیە لەسەدا 45.3 لەسەدی بێکاریی لاوانی تەمەن ژێر ٣٠ ساڵ بێکارن و زۆرترین ئاماری بێکاریی بە بەراورد لەگەڵ پارێزگاکانی دیکەی لەخۆ گرتووە.

ئەو بەرپرسە حکوومەتییە ڕێژەی خۆکوژیی لە کرماشاندا لە هەر سەد هەزار کەس ٨ کەس ڕاگەیاندووە کە خۆکوژیی پیاوان لە ژنان زۆرتر بووە، بەڵام ژنان زیاتر لە پیاوان هەوڵی خۆکوشتنیان داوە.

ئەو بەرپرسە ژومارەی منداڵانی کاری لەو پارێزگایە ٤٠٠ منداڵ راگەیاندووە، بەڵام بەگوتەی خۆی، بەهۆی نەبوونی ئاماری دروست ئەو ژومارەیە لەوە زۆر زیاترە.

خاڵی جێگەی سەرنج ئەوەیە کە جێگری بەرپرسی ئیدارەی بێهزیستی  بۆ بەرنگاربوونەوە لەگەڵ دیاردەی خۆکوژی، باسی لە بەڕێوەبردنی خولێکی دان بەخۆدانان‌دا کردووە.

Related Post

سه‌رنج و كۆمێنت

كۆمێنت

‎وه‌ڵام بده‌وه‌