کۆنسێرتی نەوای تەنبوور لە بۆکان و مەهاباد بەرێوە دەچێ

0
124

رۆژی کورد
بڕیار وایە لە رۆژانی هەینی و شەممە کە دەکاتە 10 و 11 مانگی بانەمەڕ لە شارەکانی بۆکان و مەهاباد کۆنسێرتێکی گەورە بۆ موسیقای ئایینی یارسان بە ناوی (نەوای تەنبوور) بەرێوە بچێت.
لە کۆنسێرتەکەدا دوو مامۆستای بەناوبانگی مۆسیقای کوردی، مامۆستا عەلی ئەکبەر مورادی بە ئامێری تەنبوور (تەمیرە) و مامۆستا عەزیز کەنگەرلوو بە ئامێری زەرب بەشدار دەبن.

تەمیرە بە کۆنترین ئامێری زێهی دەناسرێ، مێژووی ئەو ئامێرە بۆ پێنج تا شەش هەزار ساڵ دەگەڕێتەوە، بەڵام بە داخەوە لە موکریان و پارێزگای کوردستان ئەو ئامێرە چاک نەناسراوە و ئاوڕێکی ئەوتۆی لێ نەدراوەتەوە. هەر ئەوەش بۆتە هۆی ئەوەی مامۆستاعەلی ئەکبەری مورادی بە هاوکاری عەزیزی کەنگەرلوو بڕیار بدەن بۆ زیاتر ناساندنی ئەو ئامێرە تروورێکی کۆنسێرت لەم شارانە بەڕێوە بەرن بۆ ناساندن و پەرە پێدانی ئەو ئامێرە و مەقامەکانی کە بریتین لە ٧٢ مەقام.

کۆنسێرتەکە لەسەر مەقاماتی تەمیرە دەبێ و ماوەکەشی ٩٠ خولەکە.

عەلی ئەکبەر مورادی ( لەدایکبووی ساڵی ١٣٣٦ هەتاوی لە گاوارەی سەر بە پارێزگای کرماشان) مەقام زان، ژەنیار و گۆرانیبێژی کوردە. عەلی ئەکبەر لە شەش ساڵییەوە دەستی دەوەتی ئامێری تەمیرە، لە خزمەت کەسانێکی وەک سەی وەلی حوسێنی وسەی مەحموودی عەلەوی وانەی تەمیرە فێر بووە. دواتر لە ساڵی ١٣٥٩ گرووپی تەمیرەی شەمسی دامەزراندووە و هەوڵێکی زۆری لە ناساندن و پەرە پێدانی ئەو ئامێرە داوە.  بە پێی گۆڤارێکی بریتانی بە نێوی ( signe line) مورادی یەکێکە لە باشترین ٥٠ کەسایەتیی ژەنیار لە جیھاندا.عەلی ئەکبەر لە زۆر فستیڤاڵی موسیقی جیهانیدا لە ئینگلستان و ئامریکا، بلژیک، کانادا، ئاڵمان و ئیسپانیا بەشدار بووە. لە گەڵ ھونەرمەندانێک وەکوو شارام نازری و کەیھان کەلھوڕھاوکاریی کردووە و ئەلبۆمی داوە.

عەزیز کەنگەرلوو ( لەدایکبووی ساڵی ١٣٦١ هەتاوی شاری بۆکان) ژەنیاری تۆمبەکە. لە تەمەنی دە ساڵانەوە دەستی دەوەتە ئەو ئامێرە و لە لای کەسانێکی وەک جەمشید کازمی، ڕەحمەت ئیبڕاهیمیان و فەربود یەدووڵاهی وانەی تومبەکی پێ گوتراوەتەوە، بە هاوکاری ئەنجومەنی موسیقی ئاوای کۆن لێکۆڵینەوەیەکیان کردووە لەسەر ڕیتم لە ڕۆژهەڵاتی کوردستان و بەم زووانە بڵاو دەبێتەوە، کتێبێکی بۆ فێر بوونی ژەنینی ئامێری زەرب بە هاوکاری ئومید دەباغی نووسیوە.

Related Post

سه‌رنج و كۆمێنت

كۆمێنت

‎وه‌ڵام بده‌وه‌