كێ لە شەڕ و ئاكامەكانی شەڕ بەرپرسیارە؟

0
1056
ڕەسووڵ سوڵتانی
ڕەسووڵ سوڵتانی

هیچ كوردێك جگە لەوانەی دەستیان لەگەڵ داگیركەران تێكەڵ كردووە، حەز ناكات هیچ دایك و خوشكێك رەشپۆشی مەرگی كورِ و برایان بن و هیچ ژنێك لە سۆنگەی دەستوتفەنگی كوردەوە بێوەژن بكەوێتەوە و هیچ منداڵێكیش بێ باوك بێت. بەڵام كاتێ داگیركەر دێت و لەگەڵ داگیركردنی ماڵ و حاڵەكەت لە هەموو مافێكی ئینسانیش بێبەشت دەكات و هەموو سەرمایە و توانایشی دەخاتە گەرِ بۆ ئەوەی ئاسەوارێكت لێ نەهێڵێ، ئیتر ئەو كاتەیە پێشمەرگە لێی رادەپەڕێت و دەستی لێ دەداتە چەك و بەرەنگاری دەبێتەوە.
لێرە بەدوا داگیركەر دەكەوێتە خاپووركردنی گوند و شاری كورد و تەنانەت كوشتاری بەكۆمەڵی خەڵكیش. جا لەو كوشتار و خاپووركرانەدا كێ بەرپرسیارە؟ ئێمە كە دیفاغ لە خاك و نامووس و مانەوەمان دەكەین، یان ئەوانە كە هاتوون بمانتوێننەوە و لە ئاكامی بەرگریی ئێمەدا وەحشیانەتر لەناومان دەبەن؟
ئاخر زۆر جار تەنیا بۆ كوتانی حیزبێك، پاساو دەهێنرێتەوە بۆ داگیركەری و تاوانەكانی داگیركەرانی كوردستان و دەڵێن، ئەگەر فڵانە حیزب چالاكیی سیاسی و چەكداریی نەبوایە ئەوا رژیمەكەش كوردستانی خاپوور نەدەكرد. ئەوە ئەستۆپاككردنەوەی جینایەتكاران و داگیرەكەرانە، ئەوە پاساوهێنانەوەیە بۆ دڕندەیی خومەینی و ئەتاتورك و سەدام حوسێن و ئەردۆغانەكان. ئەو كەسانەی لە خەباتی رەوای میللەتی كورددا پێشمەرگە و پاسدار دەخەنە یەك تای تەرازووەوە و خەتاكەیان وەك یەك بەسەردا بەش دەكەن، ئەوانە زیاتر لەوەی مەنتقێكیان گرتبێتە بەر، لە سەنگەری داگیركەران و كوردكوژاندا سەنگەریان لە میللەتی كورد گرتووە.
ئەرێ گەلۆ، ئەگەر كورد واز لە خەبات بێنێ و داوای مافەكانی نەكا، تۆ بڵێی شار و گوندی كوردستان زۆر ئاوەدان كرابانەوە و مافەكانی گەلی كورد هەموو دابین كرابان؟ بەداخەوە قەدەر و چارەنووسی ئەو میللەتە وەهایە كە رزگاربوون و ئازادییەكەی لە لوولەی تفەنگ و لە دڵۆپی خوێنی سوور و ئاڵی شەهیدەكانیدا بێ. ئەوە چارەنووسێكی تاڵ و نەخوازراوە كە میللەتێك لە پێناو ئازادیدا كە سەرەتاییتری مافی خۆیەتی ئوقیانووسێكی خوێن لەبەر بڕوات و سەرەڕای ئەوەش كۆمەڵێك قەڵەمفرۆش و نیشتمانفرۆش بێن رۆڵە گیانلەسەردەستەكانی ئەو میللەتە، پێشمەرگە فیداكارەكانی ئەو نیشتمانە تاوانبار بكەن و تاوانی خاپووركرانی نیشتمان بەدەستی داگیركەری دڕندە بخەنە ئەستۆی ئەوان.
لەوە بەژانتر ئەوەیە، كە مەسەلەی مافی مرۆڤ تا ئەم دەموساتەش تەنیا كارتێكی بازرگانییە بەدەست زلهێزەكانەوە و مافی كورد تا ئێستایش وەك مافی مرۆڤ لە لایەن ناوەندەكانی بەرگریكەر لە مافەكانی مرۆڤەوە بەرگریی لێ نەكراوە و بەگوێرەی پێویست باسی نەكراوە، چونكە داگیركەرانی كوردستان و پێشێلكەرانی مافەكانی ئەو میللەتە بەرژەوەندیە ئابوورییەكانی ئەو وڵاتانە دابین دەكەن كە كلیلی سندووقەكانی مافی مرۆڤیان بەدەستەوەیە. كەچی لەگەڵ ئازادبوونی كوردستان، زوومی كامێرا و سەرنجی ئەو دامودەزگا قسرانە دێنە سەر كوردستان و میللەتی كورد لە سەر سزادانی كۆمەڵێك جاش و نیشتمانفرۆشی جینایەتكار تۆمەتبار دەكەن بە پێشێلكەری مافەكانی مرۆڤ. بەڵام ئێستا لە هەمبەر قڕكردنی میللەتێكدا بەدەستی داگیركەران بێدەنگن. ئیتر ئەودەم لە تەختایی و نەرمایی ئازادیدا و بەر لەوەی دادگا درۆزنەكان بكەونە كار و بەر لەوەی زماندرێژەكانی ئەو ناوەندانەمان لێ وەخۆ بكەون، پێویستە نیشتمانپەروەران و شۆڕشگێڕەكان وەخۆ بكەون و نەهێڵن ئەوانەی ئێستا دەستیان بەخوێنی لاوانی كورد سوورە كاریان بگاتە ئەو شوێنانەی بە بیانوویەك بكەونە بەر لێخۆشبوون و قوتار بن. ئەوانە لە هەر سەردەمێكدا و لە هەر جێیەكی ئەم جیهانە بن، پێویستە سزا بدرێن و نابێ مافی ئەوەیان پێ بدرێ هەوای ئەو ئازادییە هەڵمژن، كە ئێستا دژی راوەستاون و فیشەكی پێوە دەنێن.

سه‌رنج و كۆمێنت

كۆمێنت