پڕۆژەی بەهێماکردنی کارەساتی قاڕنێ

0
765

گوندی قاڕنێ یەک لە گوندەکانی موکریانی کوردستان و سەر بە شاری نەغەدەیە کە دەکەوێتە ٧ کیلۆمەتری باشووری ڕۆژئاوای شاری نەغەدە. لە نەخشەی ژێرەوەدا، گوندی قاڕنێ لە ناوچە‌دا دەستنیشانکراوە.

Free license – For download: http://www.kurd.no/qarne/Qarrne.bmp   Size on disk: 35 795 718 Bytes, Pixel Size: 2993 × 3963 Pixels, Resolution: 37:80 Pixels/Cm, Print Size: 79,19 × 104,85 Centimeters, Item Type: Bitmap Image

کورتەمێژوو:

کاتژمێر یەکی پاش نیوەڕۆی ڕۆژی ٢ی سێپتەمبری ساڵی ١٩٧٩ی زایینیی، پاسدارەکان بە پاڵپشتیی هێزی ئەڕتەشی ئێرانەوە گەمارۆی گوندی قاڕنێ‌یان دا. هەر لە دەرەوەی ئەم گوندە ڕا هەر کەسیان وەبەر دەستی کەوت، کوشتیان.

بکەرانی ئەو جەنایەتە، جیا لە پیر و جحێڵ و ژن و منداڵی ئەو گوندە، ئاژەڵ و باقی گیانلەبەرەکانی قاڕنێ‌شیان خستە بەر گوللەی تفەنگەکانیان.

پاسدارانی پڕچەکی حکومەت لە لایەن ئەڕتەش‌ەوە بە تانک و ئۆتۆمبیلی گەورە پشتیوانیکرابوون. جەنایەتکاران، نزیکەی سێ کاتژمێر لەم گوندە دا بە شێوەیەکی دڕەندانە کەوتنە گیانی هەرچی مرۆڤ و گیانلەبەرەوە و لە دەورووبەری کاتژمێر چواری ئێوارێ -پاش ئەوە کە  ژیانیان لەو گوندەدا کوشت- گوندەکەیان چۆل کرد و بەرەو بنکە سەربازییەکانی خۆیان گەڕانەوە.

بکوژانی خەلکی سیڤیلی قاڕنێ، تەرمی قوربانییەکانیان لەت‌لەت کرد و لە دەرەوەی گوند فڕێیان دا، بۆئەوە وا بنوێنن کە ئەو خەڵکە لە شەڕدا کوژرابوون.

Soran_Karbasian
سۆران کەرباسیان

پڕۆژەی بەهێماکردنی کارەساتی قاڕنێ:

لە ڕێکەوتی ٨ی ٥ی ٢٠١٦ی زایینیی نووسەر و لێکۆڵەری بواری مێژوو، سۆران کەرباسیان لە ئەکاونتی تایبەتی خۆی لە فەیسبووک پێشنیاری کرد کە بە مەبەستی بەهێماکردنی ئەو ڕووداوە تراژیکە، هەرکەس حەز دەکات دیارییەک بە نووسینی شێعر، تێکست، هونەری شێوەکاری یان پەیکەرتاشیی و هتد بۆ قاڕنێ ئامادە بکەن و بۆی بنێرن. هاونیشتمانیان بەدەم بانگەوازەکەی کاک سۆرانەوە هاتن و کۆمەڵێک کاری هونەری و ئەدەبی یان بۆ ڕەوانە کرد.لە ژێرەوە بەرهەمەکان بە تەرتیبی کاتبەندیی داندراون.

سۆران کەرباسیان لەبارەی ئەو کارە هاوبەشە دا دەڵێ:  لە داهاتوودا کە ئەو کۆمەلە پرۆژەیەی کاری گرووپیی تەواو بوون، لەسەر شێوەی بەکارهێنانی بەرهەمەکان لەگەڵ بەرهەمهێنەرەکان قسە دەکرێت و بڕیاری کۆتایی دەدرێت. گەر لە داهاتوودا کە گرووپ سەرقاڵی پرۆژەی دیکەن و کەسێک بیهەوێت بەرهەمێک بۆ قاڕنێ بنێرێت، دەتوانێت لەم پۆستگەی ژیرەوە کەڵک وەربگرێت.

‌سۆران کەرباسیان بەشێکی تایبەتی بۆ ئەو پرۆژەیە لە ماڵپەڕی تایبەتی خۆی بۆ ئەو کارە هاوبەشە تەرخان کردووە و نووسیویەتی: ئێوەی هێژا کە دەبینن ئەم پڕۆژەیە تەواو بووە و بابەتەکانی بلاو بوونەوە، لەم کارە دڵسارد مەبنەوە. ئێستاش درەنگ نییە و دەتوانی هەستی هەژێندراو و مرۆڤی خۆت بۆ قوربانیانی قاڕنێ لە ڕێگەی خوڵقاندنی بەرهەمێک دیاریی بکەی و بۆ پۆستگەی kurd@kurd.no ی بنێری.

‌‌


دیاری یای رەیدوون م. کەرباسیان بۆ قاڕنێ

تێبینی: لە ڕوانگەی یای ڕەیدوون کەرباسیان‌ەوە، خۆری ئازادی کوردان لە ڕۆژی دووی سێپتەمبری ساڵی ١٩٧٩ی زایینیی داکشا خوارێ. وەک دەبینن نیوەی خۆرەکە لە ئاڵای کوردستان‌دا دیار نییە. تاو نەیتوانیوە خۆی لە کارەساتی کوشتاری پلانداڕێژراوی ٦٨ کوردی قاڕنێ گێژ بکات و داکشاوە. یای ڕەیدوون لای وایە کەرامەتی هەتاوی ئازادیی کوردان لەو ڕۆژەدا شکاوە و ئەتکی ناسنامە کراوە.


 

دیاری کاک گۆران ئیبراهیم ئەحمەد

‌‌

من گوێلێک خۆڵەمێشى ونبووى
خۆرهەڵاتى ناوەڕاست
واتە قاڕنێ
بەهاوار بەگوێی ژیانیدا دەدەم
با سەر لەبەرى  خۆی
داڕنێ‌
‌‌

قاڕنێ، نەمزانی‌ بوو تۆش
هاوارێکی ترى هەناومی
ببورە
نەمزانی بوو لەبەرخۆبوون
٦٨ جار خراویتە
ناو کوورە

‌‌

من دەمرم و تۆش هاوارێکی
بەردەوامى سەرزەمینی
کوردەوارییت
تۆش وەک هەڵەبجە و دێرسیم
و قامیشلۆ
بۆ نەوەکان
یادگارییت

‌‌

گۆران ئیبراهیم ئەحمەد
سلێمانى ـ باشورى کوردستان


‌‌


‌‌


‌‌

‌ ‌


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دیاری یای سۆلاو موکریانی

“قیڕەی قارنێی”

هۆنراوەیەک پێشکەش بە شەهیدانی قارنێ

 

ئەی دایەی ڕەش پۆش، ئەی دایەی دڵ پەرۆش

ئەی دایەی خەمبار، ئەی دایەی هەژار

بێوەی بێ دڵدار، زگی پڕ سووتاو

وێنەی دڵ تەزێن، پەیکەری بێ گیان

ئاخۆ تۆ چاو، بۆکوێ ئەڕوانی؟

 

ساڵانیانی ساڵ، بە سەر هات ئوو چوو

ڵاڵ بم، تۆ لێرە هەر مایی ئوو نەچووی؟

 

تەنیا ئوو بێ کەس، بێ چار ئوو بێ بەش

بێ ناو ئوو بێ یاد، بێ دۆست ئوو بێ یار

بێ داد ئوو بێ بەخت، بێ ئاە ئوو بێ هەست

بێ رەنگ ئوو بێ دەنگ، بێ ناز ئوو دڵتەنگ

ئاخو تۆ چاوەروانی، کامە پەیامی؟

 

رۆژان ئوو شەوان، هەوتوو ئوو مانگان

هاوین ئوو سزتان، نەورۆز ئوو جێژنان

گۆڕانی دەوران، پیر بوونی زەمان

زیز بوونی بەهاران، پاش دەیان ساڵان

هێستاش تۆ بەرەو ئاسۆ ڕاماوی؟

ئاخ، بۆچی هەروا، بێ هەدادانی؟

 

ئاخر دەزانی، خاتووی بێ بورژان؟

لە ناو گشت دۆڵ ئوو هەموو چیاکان

لە ناو گشت دەشت ئوو هەموو زەوێکان

لە ناو گشت باخ ئوو هەموو مەزراکان

لە سەر گشت چۆم ئوو هەموو کانیێەکان

لە گشت شوێنەکان، یان کۆڵانانەکان

 

پاشی دەیان ساڵ، هەر وا بێ ووچان

لە کاتی بەیان، یان سەری شەوان

تا جەنگەی خەوان، هەروا بێ ووچان

دێتەوە بان گوێ، دێتەوە بیستن:

 

بانگ ئوو هاواری دڵ هەژێنت،

ئاە ئوو ناڵەی هەست بەزێنت،

شین ئوو هۆڕەی جەرگ کزێنت،

لاوک ئوو حەیرانی پڕ بڕینت،

زاری ئوو پرسەی پڕ پەشێوت،

دادە گیان چما هەر دەلۆرێنی؟

تۆخوڵا پێم بێژە، بۆ دەناڵێنی؟

 

فرمێسکێک کۆ بوو، تا هات ئو بڕژێ لە بەر چاوێوە، لە ناکاو ئیشک بووو لە بێ ئاوێوە

 

دایکی دڵ سووتاو، دایکی بەش خووراو

بە نیگای بێ نای، بەدەنگی بێ تای

ڕووی لە من کردوو،

وای دەست کردە باس:

 

“سوورە گۆڵەکەم، کچی کوردستان

هانای داپیران، هیوای شەهیدان

 

بوڕوانە بۆ ئەو دەشتە جووانە، بۆ ئەو دیمانە

ئاخر ئەمانە، ئەو کێلە بەردانە،

کێلە قەبری، ٦۸ کۆرپەی، ڕوح ئوو گیانمانە

یادگاری، ٦۸ ڕۆڵەی، بێ تاوانمانە

تەنیا پاش ماوەی، شە هیدانمانە

 

چیرۆکمان وابوو، ڕۆژێک لەڕۆژان

زاڵمی خوێنخوار، دوژمنی زۆردار

دڕندەی بێ ئار، زەهاکی ڕۆژگار

دای فەرمانێکی، جیهاد ئوو پێیکار

لەدژی كوردی ئاوارە ئوو هەژار

 

پاشی گەڵاوێژ، لە رۆژیکی ڕەش، تاڵ ئوو ژەهرئاوێژ

لەژێر تینی هەتاوی خەرمانانێکی بێ دەستاوێژ

بە سەرمان سەپاندرا، بەختێکی ڕەش ئو خەمی بێ ساڕێژ

 

خەڵتانی خوێن کران خەڵکانی قارنێی

لە پیر ئوو جەوان، لە جووتیار ئوو شوان

کچان ئوو داپیرەکان، لاوان ئوو مناڵەکان

باوان ئوو دایکەکان، کورپەی ڵانکۆڵەکان

پارچە پارچە کران تەرمی مەزلوومەکان

 

دوای ئەو ڕۆژە ڕەشە، ژیان لە من ڕما

خۆشی لەمن ڕوا، ڕۆژم  شەو هەڵگەڕا

جەرگم ئاور درا، سۆمای چاوم نەما

دڵم پارچە کرا، کۆشکی ئاواتم شکا

وەڵاتم گەمارۆ درا، نیشتمانم داگیر کرا

 

هێستاش ساڵیانی ساڵە،

من هەرلێرەماوم، بەرز وەستاوم

بەهەموو توانم،

تاکوو بزانن من قیڕەی قارنێم

دایکی وەڵاتم، چاو بە ئاواتم

 

ئاخر هەروەها من چاوەڕوانم،

چاوەڕوانی بەرز بوونی دارەکانی نیشتمانم

چاوەرڕوانی هاتنی بەهاری کەسک ئوو سوور ئوو زەردی سەر هەڵدانم

چاوەڕوانی ڕۆڵەکانی کوردستانم

چاوەڕوانی ئاسۆی ڕوونم

چاوەروانی مافی کوردم

هەتا کوو ماوم، هەرچاوەروانم

تا لە رۆژهەڵات خۆر سەر هەڵ بدا ژ بۆ ئازادی

تا بوڵبولەکان بە چریکە بیدەن موژدەی ڕزگاری.”

 

یای سۆڵاو مووکریانی زەحمەتی کێشاوە و شێعرەکەی خۆی بە دەنگیش ناردووە. کرتە لەسەر ئەم بەشەی ژێرەوە بکەن بۆئەوەی شێعرەکە بە دەنگی یای سۆلاو ببیستن.

‌ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

‌دیاری کاک شۆڕش ئاهی

بەمزوانە زانیاری سەبارەت بە بەرهەمانە بڵاو دەبێتەوە.

‌‌

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


دیاری کاک دیاکۆ دادگەر

چەن دانە داری ساوا

چاوم بڕیبووە جەستەی خوێناوی ئەو و مێشکم بە بێ ئیزنی خۆم خەریکی پەیوەندی گرتن لەگەڵ خودا بوو. پرسیار و پرسیار جارێک بە توندی و جارێکیش بە جۆرێک لە جۆرەکان، بە هەستێکی مەزڵوومانەوە…

ئەو ڕۆژە بۆ کڕینی چەن ڕیشەداری ساوا بەرەو شاری نەغەدە سەر لە بانگی بەیانی دوای نوێژ کردن وەڕێ کەوتم. زۆرم هەوڵ دا دیار، برا چکۆلەکەم بۆ یارمەتیم لەگەڵ خۆم بەرم بەڵام ئەو تازە خەریک بوو تام و چێژی جحێڵایەتی دەچێشت! کاک قادری قاڕنێ پیاوێکی ناسراو و خۆشناو بوو. لە داری دنیا سەروەت و سامانێکی زۆری هەبوو بەڵام کوڕی نەبوو. کاک قادر سی کچی هەبوو کە دیاری برام کەین و بەینی لەگەڵ کچە نێونجیەکەیان پێک هێنابوو و هەموو ڕۆژێک لەگەڵ کاک قادر و کچەکانی دەڕۆیشتنە سەر مووچە و مەزرای ئەوان بۆ یارمەتیدانیان. ئیتر هەر بەم شێوەیە دڵی خۆی دۆڕاندبوو و تەواو لە کار و باری ماڵی خۆمان دابڕابوو. بابم نەمابوو و من و دایکیشم سەرباقی تەواوی گرفتاری ژیان و کاری جوتیاری، دڵمان نەدهات هیچی پێ بڵێین…

ڕیشەدارم لە ماشێن داو دوای خواردنی نانی نیوەڕۆ بەرەو قاڕنێ وەڕێ کەوتم. دەمهەویست بۆ نوێژی عەسر بگەمەوە مزگەوت و بە شادی و خۆشیەوە ڕۆژی دواتر دارەکان لەگەڵ مامۆستای ئاوایی، بچێنم. مامۆستا پیاوێکی تەواو لێهاتوو بوو و زۆر هەوڵی بۆ بەرەو پێش بردنی کارە کۆمەڵایەتیەکان دەدا و هەموو کاتێک ڕێگە و بۆچوونێکی جوانی بۆمان هەبوو.

ئەو ڕۆژە سەیر لەوەدابوو لە جەنگەی هاتووچۆدا کەس ڕووبەڕووم نەدەهات. ڕێگا تەواو نەدەبوو و منیش لەبەر گەیشتن بۆ نوێژ هەتا بۆم کرابایە بە خێرایی تەواو ماشێنەکەم لێدەخوڕی تا لە دوورەوە قاڕنێ هاتە بەر چاوم و شوکری خودام بە جێ هێنا.

” باشە ئەوانە تاوانیان چیە خودایە؟ دیار!؟ دیار گیان ئاخری نەهاتی لەگەڵم. بریا بە بریای ئەو خودایە منیش دەستم شکابایە و نەڕۆیشتبایەم. دیار گیان بۆ ئاوا ڕۆیشتی؟”

قاڕنێ قەت ئاوا نەبوو. لەبیرم نایە بێدەنگیی تا ئەو ڕادەیە، وەک ئەو ئێوارێیە منی هەراسان کردبێت؟! بێدەنگیەکی زۆر تووند و گیراو. دەتگوت بە هەزار کەس قامکیان لە گوێم ناوە و هیچ نابیستم. دیسان پێموابوو لە چلۆن دۆخێدا خەریکم بە تەواوی هێزم هەوڵ دەدەم ئەو دەستانە لە دەموو چاو و قامکەکانیشیان لە کونی گوێم جیا دەکەمەوە و خۆم ڕزگار کەم.

“دیار دەنگە دەنگی سەر کۆڵان و خوێندنی کەڵەباب و هەراهەرای کایەی منداڵان بۆ نابیسترێ؟! دیار بۆ نەهاتی لەگەڵم؟”

لەگەڵ دووکەڵ، هەستم بە بۆنێکی نامۆ دەکرد. نامۆ بۆ ئەوەی کە بوونی بۆنی باڕووت لە نێو ئاوایی دا بۆ من جێی سەرسووڕمان بوو. خۆ قەیناکە زۆر جاران لە زەماوەندێ دا یەک دوو فیشەک دەرکرابایە بەڵام ئەو بۆنە بۆنی خوێنی تێکەڵاو بوو، بۆنی منداڵان و مێخەکی ژنان!

” حاجی مامۆستا! لەبەر دەستت مرم، بەقوربانی ئەو قورعانەی دەستت بم وا بە سنگتەوە ناوە! مامۆستا درەنگ گیشتمەوە بۆ نوێژ؟ دەبێ لای خودا بۆم بپاڕێیەوە.”

دارەکانم داگرت، دوای ئەوەی قسەی خۆم لەگەڵ خودا تەواو کردبوو. لەبیرمنایە چۆن شەو  داهات و وڵاتم لێ تاریک بوو. بۆنی خوێن و باڕووت مێشکمی شڵەقاندبوو.

” حاجی مامۆستا لەبیرتە وەعدم دا بوو لەسەر ڕێی مەزرا دار بچێنین؟ ئەی بۆ ئاوا زوو جێت هێشتم؟ بەڵام وەعد بێ دارەکان لە دەوری گۆڕستانەکەتان بچێنم. بۆ تۆ و دایکم و دیار و خۆشەویستەکەی لە پەنای یەک دەتانێژم و دوای چەن ساڵ تەمەنی دارەکان دەبێتە درێژیی تەمەنی گۆڕەکانتان”

بەرەو مزگەوت وەڕێ کەوتم. جەنازە و گۆشت و خوێن و قاپووڕی فیشەک. لاقم دەبوایە بەسەر خوێن و جەنازەدا هەڵێنایەتەوە بۆ ئەوەی کە کەس نەکەوێتە بەر پێم. زۆربەی خەڵکی ئاوایی بە جۆرێک شەهید کرابوون کە ناسینەوەیان ئەستەم بوو. شتێ وەک پەیکەرێکی بەهێز کە نیشان لە سومبولێکی جوان و پاک بوو، هاتەبەر چاوم. حاجی مامۆستا بوو. بە ڕێ و شوێنی دا دەکرا بزانی چ قەوماوە. وەک ئەوە وا بوو کە قورعانێکی بە سنگیەوە نابوو و بەرەو چەکدارەکان ڕۆیشتبوو تا لەبەر خاتری کەلامی خوداش بووبێ، ئەو جەنایەتە نەکەن. لە پێش هەموویانەوە بەرەو پیری دوژمن ڕۆیشتبوو بەڵام فیشەکێکیان لە سنگی دابوو کە پێش گەیشتن بە دڵی، قورعانەکی کون کردبوو جا کاری لە دڵی مامۆستا کردبوو. ئیتر دیار بوو دوای ئەوەی کە بە ناو و کەلامی خوداش دەستیان لەو جەنایەتە هەڵنەگرتبوو، تەواوی ئەو ٦٨ کەسی وا لەو ئێوارێ نەگبەتیە دا لە نێو ئاوایی مابوونەوە، بەر فیشەک درابوون و شەهید کرابوون.

” خودایە دژی کەلامت کوشتاری بە کۆمەڵ و بە ناحەق کراوە. دەزانی؟ ئێمەت خۆش ناوێ؟ کەمی و کورتی لە حەقت دا کرابوو؟ گوێت لێیە؟”

تەنیا لە ئاواییەکی پڕ لە مێژوو و جوانی، چەن نەمامێکم بۆ مابۆوە و ٦٨ تەرم کە بە زەحمەت دەکرا بیانناسمەوە و بیان نێژم. بەڵام ئەوەی سەیر بوو بەلامەوە و قەت لەبیرم نەکرد ژمارەی دارەکان بوو کە دەتگوت خودا پێش وەخت زانیبووی کە جنایەتێک ڕوو دەدا و منیش بە بێ ئاگا ٦٨ نەمامم گوڵبژێر کردبوو!

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دیاری کاک مەکۆ ڕەسووڵیفەرد

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

د‌‌یاری کاک خالید دروودی

 ‌قارنێ گوندێکی زۆر زۆر دوور لە شوێنی لەدایکبوونی من‌ە، بەڵام ناوێکی ئاشنایە. هێستا لاو بوم کە ناوی قارن‌ێم بیست، کۆماری ئیسلامیی لەوێ کۆمەڵکوژی کردبوو، ئاخر خومەینی رێبەری ئایینی ئێران دەستوری جیهادی دژی گەڵی کورد دابوو، پاسدارەکانیش بەرێوەبەری ئەو دەستورە بوون، لە چاو ئەوان کورد نەتەوەیکی کافرە و کوشتنیان هیچ حەڵاڵە، سەوابیشی هەیە. جەنایەتی قارنێ و گوندەکانی دەوروبەری یەکێک لە تاوانە گەورەکانی کۆماری ئیسلامیی ئێرانە دژ بە مرۆڤایەتی و نابێت لەبیر بکرێن.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

دیاری سۆران کەرباسیان بۆ قاڕنێ
بەر لە کوشتار
کاتژمێرێک دوای کوشتار

٦٨ مرۆڤ تەنیا بە تاوانی کوردبوونیان کوژران.

‌‌

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌

دیاری کاک ناسر فەتحی بۆ قاڕنێ

٦٨ ماڵ

٦٨ گۆڕ

٦٨ باڵەندە

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌

د‌‌یاری کاک ناسر قازی بۆ قاڕنێ

کاک ناسر قازی کە ئێستا لە جەرگەی خەباتدا چالاکە، لە خەیاڵ‌دا سەردانی ڕۆژهەڵاتی کوردستان‌ی کردووە و بەم شێوەیە لە مێشکی خۆیدا یادی قاڕنێ‌ی کردووە.

دەشتی لاجانێ بەهەشتی ئەرزە

خەڵکی ئەو ناوە هەموی سەربەرزە

گادەر ئەو چۆمی لە بن نەبڕاوم

ئاو دەدا دەشت و زەوی و بەنداوم

ئەتۆ سندوسی پڕی خێر و بەری

دیدەکەی ئێمەی و تۆ تاجی سەری

لە پەنات خەوتووە قاڕنێ ئێستێ

دەردی سەربارە سروشک ناوەستێ

لەشی بیمارە دڵی زامدارە

جەرگی پڕ خوێنە خەمی لێ بارە

ناخی سووتاوە و رەنگی زەردە

دەگریم رۆژ و شەوان بەو دەردە

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌


دیاری بەڕێزێک کە بە کێوین خۆی ناساندووە

Silaw le Qarne

Silaw le Shehidan

On the 2nd of September 1979, a genocide unfolded in Qarne, in Rojhelat. Exactly, twenty four years before I was born. A Kurdish village was wiped out of its entire population, sixty eight innocent people were killed. But, we the new generations will remeber the dark days in the history of our nation and keep the memory of our martyres alive.

This drawing shows the little Kurdish heros, putting poppies every where, raising Kurdistan flags and building a memorial for the martyres, in Qarne.

‌‌

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌

‌دیاری یای شایستە وەتمانی

‌‌ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌

دیاریی یای چرۆ قادر

قاڕنێ


بەری بەیانه و گزنگی خؤر ئەدات له قاڕنێ شەونم تک تک ئەڕژێته سەر گەڵای درەختەکان باڵندەکان ئاوازی ڕوژێکی نوێ ئەچڕن هەموو جوانییەکانی سروشت شەوق ئەداتەوه له پڕ هەورێکی چڵکنی پڕ له قینه ئەگرمێنێ بارانێکی خوێناوی ئەبارێنێ سەرتاپای قاڕنێکەم سووری ئەنوێنێ بێدەنگی سەراپای قاڕنێکەم دائەگرێ تەنها دەنگی قەلەڕەش دێ که شەست و هەشت پەپوولەی له نیشتمان ئەستاندووه قەلەڕەش نەیزانی ئەو پەپوولانەی گیانی ئەستاندن شێرییان له دوا جێماوه ئەمڕۆ بەرەوڕووی قەلەڕەش وەستاونوو سنگیان لەبەر گولله داناوه هەرچەند کەمیش بژین ئەمما کەڵ دەژین کؤ تاوبەند دەشکێنين و بەرەو سەرکەوتن دەڕوین

 

‌‌ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ‌

دیاریی کاک سیامەک داوودی

سەرچاوە؛
http://kurd.no/?page_id=682

 

سه‌رنج و كۆمێنت

كۆمێنت